ၵႃးၽႃႇရူတ်ႉၶိူင်ႈ ၼိူဝ်သဵၼ်ႈတၢင်းလူင် လႃႈသဵဝ်ႈ-မၢၼ်းတလေး ႁိမ်းဝၢၼ်ႈတၼ် တီႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ မိူဝ်ႈဝၼ်းတီႈ 12/11/2022 ၵၢင်ၶမ်ႈ 7 မူင်း ၵူၼ်းၼုမ်ႇ 2 ၵေႃႉ တၢႆထင်တီႈ၊ ၸဝ်ႈၵႃးပၢႆႈ။
ၽူႈတူင်ႉၼိုင် ၸုမ်းၶႅၵ်ႇလီပၢင်ၸႃႉတႆးၼမ်ႉၶူင်း ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ- “ ၶဝ်ႈတေၽႃႇၵၼ် မွၵ်ႈ 7 မူင်းပၢႆပၢႆၼႆႉၵႂႃႈ။ မီးၵူၼ်းထူဝ်းမႃးလၢတ်ႈသေ ၽိူဝ်ႇႁဝ်းထိုင်ပုၼ်ႉၵေႃႈ 8 မူင်းယဝ်ႉဝႃႈ။ ပဵၼ်ၼိူဝ်သဵၼ်ႈတၢင်းလူင် ပျီႇထွင်ႇၸု ၼၼ်ႉၶႃႈယဝ်ႉ။သွင်သၢမ်လိူၼ် ၼိုင်ႈပွၵ်ႈတႄႉ ၵႆႉၵႆႉၽႃႇၵၼ်ၼႃႇတၢင်းသဵၼ်ႈၼႆႉ။ မိူဝ်ႈႁဝ်းၵႂႃႇထိုင်တႄႉ ၸဝ်ႈၵႃးၵေႃႈ ဢမ်ႇတၼ်းႁၼ်ယဝ်ႉ ပၢႆယဝ်ႉၼႃႇၼေႃႈ ။ ႁၼ်လုၵ်ႈဢွၼ်ႇၸၢႆးၵေႃႉၼိုင်ႈၵူၺ်း ဢၼ်ၼွၼ်းၽႄႇယူႇ ပေႃးဢမ်ႇမီးၸႂ်ယဝ်ႉၼၼ်ႉ။ ဝၢႆးသေႁဝ်းၸွႆႈမႃးသမ်ႉ ၵူၼ်းႁိမ်းႁွမ်းၼၼ်ႉ သမ်ႉႁၼ်ထႅင်ႈၵေႃႉၼိုင်ႈၼႆ ၼၼ်ႉတႄႉ ဢမ်ႇၸႂ်ႈၸုမ်းႁဝ်းၵႂႃႇဢဝ် ပဵၼ်ထႅင်ႈၸုမ်းၼိုင်ႈ” ဝႃႈၼႆ။
ၽူႈၶဝ်ႈၸုမ်း ၸုမ်းၸွႆႈထႅမ်ပရႁိတ (ကမ်းလင့်လက်များ လူမူကူညီရေးအသင်း) ၵေႃႉၼိုင်ႈလၢတ်ႈၼႄဝႃႈ “ ၸႂ်ႈဢေႃႈ ၸုမ်းႁဝ်းလႆႈၵႂႃႇတေႃႉတူဝ်တၢႆၵေႃႉၼိုင်ႈၶႃႈဢေႃႈၼၼ်ႉ။ မၼ်းတူၵ်းၵႂႃႇမီးဝႆႉတီႈၾင်ႇႁွင်ႈၼၼ်ႉဢေႃႈ ။ တီႈၼၼ်ႉယုမ်းသမ်ႉႁူၵ်ႉၼႃႇ ။ လၢႆလႄႈဢမ်ႇႁၼ် ။ မိူဝ်ႈၶဝ်ၽႃႇၵၼ်ၼၼ်ႉ မၼ်းတေသဵၼ်ၵႂႃႇၵႆဢိတ်းၼိုင်ႈၶႃႈၵႂႃႈ။ ထိုင်ၵၢင်ၼႂ်မႃး မီးၵူၼ်းထူဝ်းမႃးလၢတ်ႈဝႃႈ မီးၵူၼ်းတၢႆ ၼႆလႄႈၽိူဝ်ႇၵႂႃႇတူၺ်း ၸင်ႇႁၼ်” ဝႃႈၼႆ။
တူဝ်တၢႆဢၼ်ၸုမ်းၼမ်ႉၶူင်း တေႃႉဢဝ်မိူဝ်းၼၼ်ႉ ၸိုဝ်ႈ ၸၢႆးငဝ်းလႅင်း ဢႃယု 19 ပီ ။ တူဝ်တၢႆထႅင်ႈၵေႃႉၼိုင်ႈ ၸုမ်း ကမ်းလင့်လက်များ လူမူကူညီရေးအသင်း ၸွႆႈတေႃႉမိူဝ်းၼၼ်ႉ ပဵၼ် ၸၢႆးသႃႇဢေး ဢႃယု 17 ပီ ။ ပဵၼ်ၵူၼ်းဝၢၼ်ႈ ၵုင်းၵေႃႇ ဢိူင်ႇၶိူဝ်းၼိမ်းၼင်ႇၵၼ်။
သဵၼ်ႈတၢင်းလူင်ပျီႇထွင်ႇၸု ၸႄႈဝဵင်းၵျွၵ်ႉမႄးၼႆႉ ၵူၼ်းတၢႆယွၼ်ႉၽေးၵိုင်ႉၵၢင်ႉ 1 ပီမီး သိပ်းသိပ်းပၢႆ ပေႃးပဵၼ်ၵၢင်ၶမ်ႈၵၢင်ၶိုၼ်း တေလႆႈဝႆႉၾၢင်ႉၼၵ်းၼၵ်းၼႃၼႃသေ ႁေႃႈရူတ်ႉၵႃး ယွၼ်ႉလပ်းသိင်ႇလႄႈ ၸၢင်ႈၽႃႇၵၼ်ငၢႆႈ။
