ဝၼ်းတီႈ 19/4/2022 မိူဝ်ႈၼႆႉ ၵူၼ်းမိူင်းၸိူဝ်းယူႇဝဵင်းလူင်တႃႈၵုင်ႈ ၵႂႃႇပႂ်ႉသိုဝ်ႉ/ထႅမ်ၼမ်ႉမၼ်းရူတ်ႉၵႃး ၵိုတ်းၸွတ်ႇဝႆႉသမ်ႉပေႃး ယိုတ်ႈယၢဝ်းပဵၼ်သၢႆ၊ ၵမ်ႈၽွင်ႈဝႃႈ ပဵၼ်ယွၼ်ႉ ၼမ်ႉမၼ်းၸၢၵ်ႈ ဢမ်ႇၶဝ်ႈမႃးထႅင်ႈ ယဝ်ႉလႄႈ ၸင်ႇလႆႈႁိမ်ၵၼ်သိုဝ်ႉဝႆႉ ၊ ၾၢႆႇၼိုင်ႈ သိုၵ်းမၢၼ်ႈၵမ်ၶၼ်ငိုၼ်းတေႃႇလႃႇလႄႈ ႁဵတ်းႁႂ်ႈ ၼမ်ႉမၼ်း ဢမ်ႇၶဝ်ႈမႃးလႆႈပဵင်းၵူႈပွၵ်ႈဝႃႈၼႆ။

ၸၢႆးၼုမ်ႇ တႆး ဢၼ်ယူႇသဝ်းတီႈတႃႈၵုင်ႈၵေႃႉၼိုင်ႈလၢတ်ႈဝႃႈ – “ၶၢဝ်ႇလွင်ႈဝႃႈၼမ်ႉမၼ်းၸၢၵ်ႈ တေၶၢတ်ႇ ၼႆၼႆႉ လိုဝ်းဝႆႉၸဵမ်မိူဝ်ႈဝႃး ယဝ်ႉၶႃႈ။ ၼႂ်ၼႆႉၵေႃႈတီႈပမ်ႉၼမ်ႉမၼ်းၵူႈတီႈတီႈ ရူတ်ႉၵႃးပေႃးတဵမ်လူင်ဝႆႉယဝ်ႉၶႃႈ ။ ပမ်ႉမၢင်တီႈၵေႃႈ ၽႂ်မႃးသိုဝ်ႉၵွၼ်ႇၵေႃႈၶၢႆပၼ်ၵေႃႉၼၼ်ႉ။ မၢင်တီႈၵေႃႈ ၸႅၵ်ႇၶၢႆပၼ် ၼိုင်ႈၵေႃႉ 4 ၵႃႊလၼ်ႊ ၼႄႇ 5 ၵႃႊလၼ်ႊ ၼႄႇ ၼႆၶၢႆပၼ်ႁႂ်ႈလႆႈၽဵင်ႇၵၼ် ၼႆဢေႃႈ။ၶဝ်ဝႃႈ ၼမ်ႉမၼ်းဢမ်ႇၶဝ်ႈထႅင်ႈလႄႈ လႆႈပႅင်းသေၶၢႆ ဝႃႈၼႆဢေႃႈ ”- ဝႃႈၼႆ။

လွင်ႈဢၼ်ၵူၼ်းမိူင်းႁိမ်ၵၼ်သိုဝ်ႉၼမ်ႉမၼ်းရူတ်ႉၵႃးယူႇမိူဝ်ႈၼႆႉ လႆႈငိၼ်းဝႃႈ – ၼမ်ႉမၼ်းၸၢၵ်ႈ ဢၼ်လုၵ်ႉ ၼွၵ်ႈမိူင်းမႃး၊ ဢၼ်ဢဝ်ၶဝ်ႈတၢင်းၽၵ်းတူ တႃႈၼမ်ႉ သီႇလဝႃႇ ဝဵင်းတႃႈၵုင်ႈၼၼ်ႉ ၶၢတ်ႇၵႂႃႇ။ မိူဝ်ႈၵူႈပွၵ်ႈ ၽွင်းၼမ်ႉမၼ်းသူင်ႇၶဝ်ႈမိူင်းဢမ်ႇထၢတ်ႇၼၼ်ႉ ယင်းမီးၼမ်ႉမၼ်းၵဵပ်း/ၵႅမ်ဝႆႉ တႃႇ 5 လၢၼ်ႉၵႃႊလၼ်ႊ တႃႇသေႇ ။ ဢိင်ၼိူဝ် သိုၵ်းမၢၼ်ႈယိုတ်းမိူင်း ၸႂ်ႉလၢႆး ႁုၵ်ႉႁၢႆႉ ပူၼ်ႉပႅၼ် သုၼ်ႇလႆႈၵူၼ်း တေႃႇၵူၼ်းမိူင်းသေ မိူင်းမလေးသျႃး သိင်ႇၵပူဝ်ႇ သၢၼ်ၶတ်းသိုၵ်းမၢၼ်ႈ ပၼ်တူတ်ႈတၢမ်ႇလူၺ်ႈ ဢိုတ်းႁႅတ်ႉ ပၢႆးမၢၵ်ႈမီး တေႃႇသိုၵ်းမၢၼ်ႈ ၊ ဢမ်ႇသူင်ႇၼမ်ႉမၼ်းၶဝ်ႈမိူင်းမၢၼ်ႈ။

 ၾၢႆႇၼိုင်ႈ ၽွင်းယိုတ်းဢႃႇၼႃႇဝၢၼ်ႈမိူင်းမႃး  ပီပၢႆၼႆႉ သိုၵ်းမၢၼ်ႈသမ်ႉ ဢွၵ်ႇၶေႃႈပူင်ဝႃႈ – ၼမ်ႉမၼ်းၸၢၵ်ႈ ဢၼ်ၶင်ဝႆႉ ၵဵပ်းဝႆႉတီႈတႃႈႁိူဝ်း သီႇလဝႃႇ ၼၼ်ႉ တေလႆႈထုၵ်ႈ/ၸႅၵ်ႇပၼ် တႃႇတပ်ႉသိုၵ်းၸႂ်ႉတိုဝ်း ၼိုင်ႈဝၼ်းလႂ် 1 မိုၼ်ႇၵႃႊလၼ်ႊ ၵူႈဝၼ်းၼႆလႄႈ ယၢမ်းလဵဝ်ထိုင်တီႈ ၼမ်ႉမၼ်းၸၢၵ်ႈ တႃႇၵူၼ်းမိူင်းၸႂ်ႉ ပေႃးလႆႈ ၶၢတ်ႇ/ၵိုတ်းၵႂႃႇ – ၵူၼ်းမိူင်းလႆႈယၢပ်ႇၽိုတ်ႇ ဝႃႈၼႆ။

ဝၢႆးလင်မလေးသျႃး သိင်ႇၵပူဝ်ႇ ဢမ်ႇသူင်ႇၼမ်ႉမၼ်းၶဝ်ႈမိူင်းမၢၼ်ႈယဝ်ႉ မိူင်းၶႄႇ ဢၼ်ၵမ်ႉထႅမ် သိုၵ်းမၢၼ်ႈ တႃႇသေႇၼၼ်ႉသမ်ႉ သူင်ႇၼမ်ႉမၼ်းၸၢၵ်ႈလတ်းမိူင်းသီလင်းၵႃ  မႃးၶဝ်ႈတီႈ တႃႈၼမ်ႉ သီႇလဝႃႇ။ ယၢမ်းလဵဝ် မိူင်းသီလင်းၵႃသမ်ႉပၢႆးမၢၵ်ႈမီးတူၵ်း၊ ယၢပ်ႇၽိုတ်ႇလွင်ႈတေႃႉသူင်ႇလႄႈ ထိုင်တီႈဢမ်ႇၸၢင်ႈ သူင်ႇၼမ်ႉမၼ်းမႃးတီႈတႃႈႁိူဝ်း မိူင်းမၢၼ်ႈ -သိုဝ်ႇၶၢဝ်ႇ ဢီႊရႃႊဝတီႊ မၢၼ်ႈတႄႉဢွၵ်ႇဝႆႉၼင်ႇၼႆ။

ၾၢႆႇၼိုင်ႈသိုၵ်းမၢၼ်ႈသမ်ႉၵုမ်းၵမ် ငိုၼ်းတေႃႊလႃႊ၊ ၵႃႈပဵၼ်တေႃႊလႃႊ တဵၵ်းသိုဝ်ႉဝႆႉမူတ်းလႄႈ သင်ဝႃႈ ယူႇတီႈ ၸဝ်ႈပၢႆးမၢၵ်ႈမီးၶႂ်ႈဢဝ်ၼမ်ႉမၼ်းၶဝ်ႈမိူင်းမႃးၶၢႆ ၸွင်ႇသိုၵ်းမၢၼ်ႈတေ ပၼ်ၸႂ်ႉငိုၼ်းတေႃႊလႃႊ ပဵင်းပေႃးၼင်ႇၵူၼ်းမိူင်းၶႂ်ႈၸႂ်ႉဢမ်ႇႁူႉ။ ၵွပ်ႈဝႃႈပေႃးတေၸႂ်ႉငိုၼ်းတေႃႇလႃႇၵေႃႈ လႆႈတၢင်ႇသဵၼ်ႈမၢႆၸူးသိုၵ်းမၢၼ်ႈၵူႈၵမ်း။ ၵွပ်ႈၼႆ ၸဝ်ႈႁၢၼ်ႉၼမ်ႉမၼ်း လႆႈပႅင်းၶၢႆၼမ်ႉမၼ်း ဝၼ်းဢိတ်းဢိတ်း ၵူၺ်း – ၵူၼ်းႁဵတ်းၵၢၼ်ၼမ်ႉမၼ်း တီႈတႃႈၵုင်ႈၵေႃႉၼိုင်ႈၵေႃႈလၢတ်ႈၼင်ႇၼႆ။

ၼႂ်းဝၼ်းတီႈ 19/4/2022 မိူဝ်ႈၼႆႉ ပမ်ႉၼမ်ႉမၼ်း ၵူႈတီႈ ၸႅၵ်ႇၶၢႆပၼ် ၼမ်ႉမၼ်း ရူတ်ႉၵႃးၼိုင်ႈလမ်း ဢမ်ႇပၼ်သိုဝ်ႉလိူဝ် 5 မိုၼ်ႇပျႃး ႁဵတ်းႁႂ်ႈၵူၼ်းမိူင်းယၢပ်ႇၽိုတ်ႇလိူဝ်ႁႅင်းဝႆႉ – ဝႃႈၼႆ။ ၵဵဝ်ႇၵပ်းလွင်ႈၼႆႉ ၼႂ်းမိူင်းတႆးတႄႉ တေႃႇထိုင်ယၢမ်းလဵဝ် ပႆႇမီးလွင်ႈတူင်ႉတိုၼ်ႇၸွမ်းသင်။