ၸဝ်ႈလႅင်းၵႃး/ ႁပ်ႉၸၢင်ႈတၢင်ႇၵူၼ်း မူႇၸေႊ – လႃႈသဵဝ်ႈ – ဝဵင်းလိူဝ်ႇ ဢွၼ်ၵၼ် ထူပ်းတၢင်းယၢပ်ႇၽိုတ်ႇၵိၼ်းၸႂ် ယွၼ်ႉၼမ်ႉမၼ်းရူတ်ႉၶိူင်ႈပုင်ႈၶိုၼ်ႈႁႅင်း၊ မၢင်ၵေႃႉထိုင်တီႈလႆႈၵိုတ်းလိုဝ်ႈၵၢၼ်ဝႆႉ။
တႄႇဢဝ်ႁူဝ်လိူၼ်မၢတ်ႊၶျ် 2022 ၼႆႉမႃး ၸဝ်ႈၵႃး မၢင်ၵေႃႉ ထိုင်တီႈပေႃးလႆႈ ၵိုတ်းယင်ႉၵၢၼ် ဝႆႉၸူဝ်ႈၶၢဝ်းၵေႃႈမီး။ မၢင် ၵေႃႉ တေႃႉတႄႉ ၵိုတ်းငိုၼ်းလိူဝ် မိုၼ်ႇပၢႆ တေႃႇဝၼ်းၵေႃႈၵႃႈလႆႈၶၢမ်ႇႁိူဝ်ႉသေႁဵတ်းတႃႇႁႃလဵင်ႉၼႃႈႁိူၼ်း။
ၸဝ်ႈၵႃး ဢၼ်လဵၼ်ႈတၢင်း မူႇၸေႊ – လႃႈသဵဝ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ လိူဝ်မိုၼ်ႇ မိုၼ်ႇပၢႆၵေႃႈ ၵႃႈလႆႈလႅၼ်ႈဢေႃႈ ဢမ်ႇၸၢင်ႈႁဵတ်းႁိုဝ်ၶႃႈ ။ ပေႃး ဢမ်ႇလႅၼ်ႈ ၵူဝ်ပီႈၼွင်ႉမိတ်ႉသူၺ်ႇႁဝ်းၶႃႈႁၢႆ။ ပေႃးၶိုၼ်ႈၵႃႈ ၵႃးၵေႃႈ ၵူဝ်မိတ်ႉသူၺ်ႇႁဝ်းၶႃႈ ဢမ်ႇၶီႇ။ ၵႃႈၶၼ်မၼ်းတႄႉ မိူၼ်ၵဝ်ႇၵူၺ်း 3 မိုၼ်ႇပျႃး ၼမ်ႉ မၼ်း ၶိုၼ်ႈၵေႃႈ ဢမ်ႇၸၢင်ႈၶိုၼ်ႈ ၸွမ်း။ မၢင် ဝၼ်းလိူဝ် 2-3 မိုၼ်ႇ ၼမ်ၼႃႇယဝ်ႉ။ မၢင်ဝၼ်းလိူဝ် 1 မိုၼ်ႇပၢႆ ၵူၺ်းၵေႃႈမီးဢေႃႈ”- ဝႃႈၼႆ။
တႄႇဢဝ် ႁူဝ်လိူၼ်မၢတ်ႇၶျ်ၼႆႉမႃး ၼမ်ႉမၼ်းရူတ်ႉ/ ၸၢၵ်ႈ ၸိူဝ်းၼႆႉ ပုင်ႈၶိုၼ်ႈႁႅင်း 1 လိတ်ႉလၢႆ ထိုင် 2,000 ပၢႆ။ မၢင်တီႈ 1 လိတ်ႉလၢႆ ထိုင် 2,500 ပျႃး ၵႃႈၼႆႉၵေႃႈမီး။
“ မၢင်ၵေႃႉ ၵႃႈလႆႈၵိုတ်းယင်ႉဝႆႉ ၵၢၼ်ငၢၼ်းၶႃႈဢေႃႈ။ မိူဝ်ႈၼမ်ႉမၼ်းပႆႇၶိုၼ်ႈ ပေႃးႁဝ်းၶႃႈမႃးႁၢၵ်းၵႃႈၸႂ်ႉၸၢႆႇ ၵႃႈၼမ်ႉမၼ်းဢွၵ်ႇယဝ်ႉ လိူဝ် 8-9 မိုၼ်ႇၼႆႉဢေႃႈတေႃႇဝၼ်း”- ၸဝ်ႈၵႃး မူႇၸေႊ – လႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။
ၵွၼ်ႇသိုၵ်းမၢၼ်ႈ ပႆႇယိုတ်းဢႃႇၼႃႇ ၸိုင်ႈမိူင်းၼၼ်ႉၵႃႈၵႃး မူႇၸေႊ – ဝဵင်းလိူဝ်ႇ ၼိုင်ႈၵေႃႉ 35,000 – 40,000 ပျႃး။ တေႃႈလဵဝ် ပေႃးၼင်ႈၼႃႈ ၵေႃႉ 80,000 ပျႃး ၼင်ႈတၢင်းလင်ၵေႃႉ 65,000 ပျႃး ။