သၢႆၵၢၼ်မိၼ်ၶႄႇ China Eastern ၶိူင်ႈမိၼ်မၢႆ Boeing 737 ဢၼ်တၢင်ႇၵူၼ်းမႃး 132 ၵေႃႉသေ တူၵ်းၵွႆၵႂႃႇၼၼ်ႉ ပႃးၵူၼ်းမိူင်းၼႂ်းဢိူင်ႇတႂ်ႈၶူင်း (ၼႃႈလိၼ်ၽွင်းငမ်းတူဝ်ၵဝ်ႇတႆး) 41 ၵေႃႉ ၊ ၼႂ်းၼၼ်ႉ ပႃးဢေတႆး( ယိင်းသၢဝ်တႆး) 4 ၵေႃႉ လူႉတၢႆမူတ်း။
ပူၼ်ႉမႃး မိူဝ်ႈဝၼ်းတီႈ 21/3/2022 ယၢမ်းၵၢင်ၼႂ် ၶိူင်ႈမိၼ်ၶႄႇမၢႆ MU 5735, Boeing 737 ၼႆႉတၢင်ႇ ၵူၼ်း 132 ၵေႃႉ လုၵ်ႉတီႈဝဵင်းၶုၼ်ႊမိင်သေ မိၼ်မိူဝ်းဝဵင်းၵႂၼ်းၵျဵဝ်ႊ ။ ၵိုင်ႉၵၢင်ႉတူၵ်းၵွႆ ၼႂ်းၵႄႈၵႂၼ်းၵျဵဝ်ႊ – ၵႂၼ်းသီႊ တီႈၼိူဝ်လွႆ ၸဵင်ႇ ၸၢၼ်းဝၼ်းတူၵ်း ဝဵင်းဝူႊၸူဝ်ႊ ၸိုင်ႈမိူင်းၶႄႇ ။ ၼႂ်းၶိူင်ႈမိၼ်ၼၼ်ႉ ပႃးယိင်းသၢဝ်တႆး ၵူၼ်းၼႂ်းဢိူင်ႇတႂ်ႈၶူင်း လူႉတၢႆၸွမ်း 4 ၵေႃႉ။
ၵူၼ်းၼႂ်းမိူင်းမၢဝ်းၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်လႆႈႁူႉမႃး ပႃးဢေတႆးႁဝ်းၶႃႈ 4 ၵေႃႉ ၊ ပဵၼ်ၵူၼ်းမၢၼ်ႈမွၼ်း၊ ၶုၼ်ပၼ် လႄႈ ဝၼ်းတဵင်ႈ ၊ ဢၼ်တေႃႇၼႃႈၵၼ် တၢင်းဝဵင်းပၢင်ႇသၢႆး ၼၼ်ႉၶႃႈ။ ဢႃယု တေမီးၵႃႈႁိုဝ်လၢႆလၢႆတႄႉ ဢမ်ႇႁူႉၶႃႈ။ ယဝ်ႉၵေႃႈ လႆႈႁၼ်လူင်ပွင်ၸိုင်ႈၶႄႇ ပိုၼ် ၽၢဝ်ႇဝႃႈ ပႃးမိူင်းမၢဝ်းၵႂႃႇၸွမ်း 11 ၵေႃႉၼႆၶႃႈ ။ ၵူၺ်းၵႃႈ ပဵၼ်ၽႂ် ၽူႈလႂ် ၸိူဝ်းၼႆႉတႄႉ ဢမ်ႇလႆႈပိုၼ်ၽၢဝ်ႇပႃးၶႃႈ”- ဝႃႈၼႆ။
ၶိူင်ႈမိၼ်ၶႄႇ ဢၼ်တူၵ်းၵွႆၼၼ်ႉ တင်းမူတ်း သဵၼ်ႈမၢႆၵူၼ်းၶီႇ မီး 133 ၵေႃႉ ၊ ၼႂ်းဝၼ်းၼၼ်ႉ ၽူႈၸၢႆးၶႄႇၵေႃႉၼိုင်ႈ ဢမ်ႇပဵၼ်ၵႂႃႇၸွမ်းလႄႈ ပႃးၵႂႃႇ ၼႂ်းၶိူင်ႈမိၼ်ၼၼ်ႉ 132 ၵေႃႉၵူၺ်း ႁွင်ႈၵၢၼ်ၶၢဝ်ႇၶႄႇ ပိုၼ်ၽၢဝ်ႇၼင်ႇၼႆ။
သၢႆၵၢၼ်မိၼ် China Eastern ဢၼ်ပၵ်းလုမ်းဝႆႉတီႈဝဵင်း သျႅၼ်ႊႁၢႆႊ ၼႆႉ ပဵၼ်သၢႆၵၢၼ်မိၼ်ၸိုဝ်ႈသဵင်ယႂ်ႇသုတ်းထိ 3 ၼႂ်းမိူင်းၶႄႇသေ၊ တေႃႉ သူင်ႇ ၵူၼ်းဢွၵ်ႇတၢင်း တႃႇ 248 တႃႈ – ပတ်းပိုၼ်ႉလုမ်ႈၾႃႉ၊ ပဵၼ်သၢႆၵၢၼ်မိၼ် ဢၼ်ၸိုဝ်ႈသဵင်လီလႄႈၵူၼ်းၵျိူၵ်ႈၼမ် ဢၼ်ၼိုင်ႈ လႆႈ ႁူႉၼင်ႇၼႆ။
