သင်ဝႃႈၸုမ်းၸၢဝ်းၶိူဝ်း ပဵၼ်လူင်းလၢႆးမိုဝ်းတူဝ်ႈမိူင်း NCA ၼမ်လိူဝ်မႃးထႅင်ႈ၊ တေမီးႁႅင်းသဵတ်ႈၵႃႈသဵတ်ႈႁူဝ် ၵၢၼ်မိူင်းလိူဝ်မႃးထႅင်ႈ။ ၵူၺ်းၵႃႈ သင်ဝႃႈဢမ်ႇပဵၼ်လူင်းလၢႆးမိုဝ်းသေ ၶၢတ်ႇၵၼ်ၵႂႃႇ မိူဝ်းၼႃႈမႃးတေပဵၼ်ၸိူင်ႉႁိုဝ်ၼၼ်ႉ လွင်ႈၼႆႉ ၽူႈၶၢၼ်ပၢၵ်ႇ RCSS/SSA ၸဝ်ႈသိုၵ်းလူင်ၸၢႆးငိုၼ်း တွပ်ႇလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈ ဝႆႉၼင်ႇၼႆ။

ထၢမ်-ပေႃးဝႃႈဢမ်ႇပဵၼ်လူင်းလၢႆးမိုဝ်း NCA သေၶၢတ်ႇၵၼ်ၵႂႃႇ တေမီးမႃးၽွၼ်းလီၶႃႈႁႃႉ ၽွၼ်းၸႃႉၶႃႈႁႃႉ ပဵၼ်ၸိူင်ႉႁိုဝ်ၽွင်ႈၶႃႈ?။

တွပ်ႇ-ႁဝ်းလၢတ်ႈၽွၼ်းလီမၼ်းဢွၼ်တၢင်း၊ မိူဝ်ႈလဵဝ်ၸုမ်းလူင်းလၢႆးမိုဝ်းမီး 8 ၸုမ်း၊ သင်ၸိူဝ်ႉဝႃႈၶဝ်ၸဝ်ႈ မႃးလူင်းလၢႆးမိုဝ်းထႅင်ႈ 4-5-6 ၸုမ်း ႁဝ်းၶႃႈတေမီးမွၵ်ႈ 13-14 ၸုမ်း၊ ပေႃးဢဝ်ၸုမ်းမၼ်းဝႃႈၵေႃႈမၼ်းၼမ်မႃး၊ မၼ်းမီးႁႅင်း၊ မၼ်းပဵၼ်ၽွၼ်းလီယူႇ။ ပေႃးၶဝ်ၸဝ်ႈၶဝ်ႈမႃး တင်း 8 ၸုမ်းမႃးႁူမ်ႈၵၼ်ၼႆၵေႃႈ ပေႃးႁဝ်းဢုပ်ႇၵၢၼ်မိူင်း မၼ်းတေမႃးၵမ်ႉပၼ် ႁႅင်းသဵတ်ႈၵႃႈသဵတ်ႈႁူဝ်ႁဝ်းတေၼမ်၊ ပေႃးဝႃႈၶဝ်ႈမႃး ဢၼ်လိူဝ်မႃးမၼ်းတေမီးထႅင်ႈ ၸၢဝ်းၶိူဝ်းမွၼ်း၊ ၸၢဝ်းၶိူဝ်းယၢင်းလႅင်။ ပေႃးၶဝ်ၶဝ်ႈမႃး ၶဝ်ၵေႃႈတေၸၢင်ႈႁဵတ်း ပၢင်ၵုမ်လူင်ၸၼ်ႉၸိူဝ်ႉၸၢတ်ႈ ၸၢဝ်းၶိူဝ်းၽႂ်ၸၢဝ်းၶိူဝ်းမၼ်း၊ ပေႃးၸိူင်ႉၼၼ် သဵင်ၵူၼ်းမိူင်းၶဝ်ၵေႃႈတေၶဝ်ႈမႃး၊ ဢၼ်ၼႆႉၵေႃႈပဵၼ်ၽွၼ်းလီမၼ်း။ ပေႃးၶဝ်ၶဝ်ႈမႃး ၸၢဝ်းၶိူဝ်းႁဝ်းၶႃႈတေၶႅၼ်းၼမ်၊ ႁဝ်းၶႃႈတေလႆႈဢုပ်ႇၵၼ်လီလီ၊ ႁဝ်းၶႃႈတေၶႅၼ်းလူင်ႉလႅင်းၵၼ်၊ ႁႅင်းႁဝ်းၶႃႈတေမီးမႃး။

ၽွၼ်းႁၢႆႉမၼ်းၸမ်း။ သင်ၸိူဝ်ႉဝႃႈ မၼ်းဢဝ်ၶိုၼ်းၶမ်ၵၼ်သေ ၶဝ်ၵေႃႈဢမ်ႇလူင်းလၢႆးမိုဝ်းယဝ်ႉ၊ ၵမ်းဢၼ်တေမႃးၼႆႉ ပဵၼ်ၵမ်းလိုၼ်းသုတ်းယဝ်ႉၼႆ ပေႃးဝႃႈဢမ်ႇလူင်းလၢႆးမိုဝ်းလႆႈၼႆၵေႃႈ ၼႄႉၼွၼ်းယဝ်ႉမၼ်းတိုၼ်းဢမ်ႇလီ။ ၵူဝ်မၼ်းၸၢင်ႈၶိုၼ်းပဵၼ်ပၢင်တိုၵ်း၊ ပေႃးဝႃႈပဵၼ်ပၢင်တိုၵ်းမႃး ၵမ်းသိုဝ်ႈမၼ်း မၼ်းတေမႃးတုမ်ႉတိူဝ်ႉၵူၼ်းမိူင်းၵူၺ်း၊ ငဝ်းလၢႆးမၼ်းၸၢင်ႈပဵၼ်ၸိူင်ႉၼႆ။

ၵူၺ်းၵႃႈ ၶႃႈႁဝ်းမုင်ႈမွင်းဝႃႈ တေႃႈလဵဝ်ၼႆႉ တင်းသွင်ၾၢႆႇၵေႃႈ ၼင်ႇႁိုဝ် ငဝ်းလၢႆးမၼ်းတေဢမ်ႇႁၢႆႉၸႃႉၼၼ်ႉ ၶဝ်တေၸၢင်ႈငူပ်ႉငီႉၵၼ်လႆႈယူႇ၊ ႁႂ်ႈမၼ်းပေႃးလီတင်းသွင်ၾၢႆႇ၊ ႁႂ်ႈမၼ်းပေႃးမီးၽွၼ်းလီတႃႇၵူၼ်းမိူင်းႁဝ်း၊ တႃႇမိူင်းႁူမ်ႈတုမ်ႁဝ်း၊ ႁႂ်ႈမိူင်းႁဝ်းပေႃးၶိုၼ်ႈယႂ်ႇမႂ်ႇသုင် ၵတ်းၸိုၼ်ႈသိူဝ်းသႃႇ။ ယုမ်ႇယမ်ဝႃႈ တင်းသွင်ၾၢႆႇ တေဢဝ်ၸိူဝ်းၼႆႉပဵၼ်လွင်ႈယႂ်ႇသေ ၸၢင်ႈဢုပ်ႇၵၼ်ယူႇ၊ ယွၼ်ႇယၢၼ်းႁႃၵၼ်ယူႇ၊ ၶဝ်ႈႁႃၵၼ်သေလူင်းလၢႆးမိုဝ်း လႆႈယူႇ ႁဝ်းၶႃႈတႄႉမုင်ႈမွင်းၸိူင်ႉၼၼ်။

ထၢမ်-ပိူဝ်ႈတႃႇႁႂ်ႈၶဝ် (ၸုမ်းၸၢဝ်းၶိူဝ်း)ပေႃးမႃးလူင်းလၢႆးမိုဝ်း NCA ၼၼ်ႉ ၸွင်ႇတေမီးငဝ်းလၢႆး တေလူင်းဢမ်ႇလူင်းၶႃႈ?။

တွပ်ႇ-လွင်ႈၼႆႉ ပေႃးဝႃႈၾၢႆႇလူင်ပွင်ၸိုင်ႈၼႆၵေႃႈ ၶဝ်မီးၸုမ်းဢုပ်ႇဢူဝ်းၶဝ် ၶွမ်ႊမသျိၼ်ႊငမ်းယဵၼ် (PC) ၊ ၵဵဝ်ႇၵပ်းၵၢၼ်ငမ်းယဵၼ်ၼႆႉ ၸုမ်းၼႆႉဢဝ်ပုၼ်ႈၽွၼ်းဢုပ်ႇ။ ပေႃးဝႃႈၾၢႆႇ ၶွင်ႇသီႇၾႅတ်ႊၻရႄႊၸၢဝ်းၶိူဝ်းၽွမ်ႉႁူမ်ႈ (UNFC) ၶဝ်ၵေႃႈ ၶဝ်မီးၸုမ်းတူဝ်တႅၼ်းဢုပ်ႇဢူဝ်းၵၢၼ်မိူင်း ဢၼ်ဝႃႈ DPN ။ သွင်ၾၢႆႇ လူင်ပွင်ၸိုင်ႈၸုမ်း PC တင်းၸုမ်း DPN ၶဝ်မႃးထူပ်းၵၼ်ၼႆႉ မီး 7 ပွၵ်ႈယဝ်ႉ။ ဢၼ်ၶဝ်မႃးထူပ်းၵၼ်သေ ၼင်ႇႁိုဝ်ၸုမ်း UNFC ၶဝ်ပေႃးတေမႃးလူင်းလၢႆးမိုဝ်း NCA ၼႆႉ ၶဝ်တေႁဵတ်းၸိူင်ႉႁိုဝ်၊ ၶဝ်တေယွၼ်ႇယၢၼ်းပၼ်ၸိူင်ႉႁိုဝ်၊ ၶဝ်ၶႂ်ႈမူၼ်ႉမႄးၸိူင်ႉႁိုဝ် ၶဝ်မႃးဢုပ်ႇၵၼ်။

ပေႃးမႃးထတ်းတူၺ်းငဝ်းလၢႆးမၼ်း ဢၼ်ၶဝ်မႃးဢုပ်ႇၵၼ်ၼႆႉ လႆႈဝႃႈမၼ်းၶိုပ်ႈၼႃႈမႃးတင်းၼမ်၊ လႆႈငိၼ်းဝႃႈၼႂ်းဝၼ်းတီႈ 8 လိူၼ်ၼူဝ်ႊဝႅမ်ႊၿိူဝ်ႊၼႆႉ ၶဝ်တေၺႃးၵၼ်တီႈတႃႈၵုင်ႈထႅင်ႈၵမ်းၼိုင်ႈ၊ ၶဝ်ဝႃႈၺႃးၵၼ်ပွၵ်ႈၵမ်းၼႆႉ တေၸၢင်ႈပဵၼ်ၵမ်းလိုၼ်းသုတ်းလႆႈယူႇ။ တင်းသွင်ၾၢႆႇၵေႃႈတေၶတ်းၸႂ် ႁႂ်ႈမၼ်းယဝ်ႉ။ ယဝ်ႉဢၼ်ဝႃႈၼႆႉ တီႈပွင်မၼ်းတေမီး 2 ပိူင်- တေၶတ်းၸႂ်ႁႂ်ႈမၼ်းလႆႈလူင်းလၢႆးမိုဝ်း NCA ။ ပေႃးလူင်းလၢႆးမိုဝ်းဢမ်ႇလႆႈၵေႃႈ မၼ်းတေၸၢင်ႈၶၢတ်ႇၵၼ်ၵႂႃႇၵမ်းလဵဝ်ႁိုဝ် တေမီးၸိူင်ႉၼၼ်။

ၵမ်းၼႆႉ ပေႃးမႃးထတ်းသၢင်တူၺ်းငဝ်းလၢႆးတႄႉ ဢၼ်ၶဝ်ဢုပ်ႇၵၼ်မိူဝ်ႈပူၼ်ႉမႃးၼႆႉ လွင်ႈပွင်ႇၸႂ်ၵၼ် မီးၼမ်တႄႉတႄႉ။ ၵူၺ်းၵႃႈ ပဵၼ်ႁိုဝ်ၵေႃႈလီ ပေႃးမႃးတူၺ်းငဝ်းလၢႆးတၢင်းၾၢႆႇတပ်ႉသိုၵ်းၼႆႉ ၸွင်ႇၶဝ်တေယွမ်းပၼ် ဢမ်ႇယွမ်းပၼ်ၽွင်ႈ၊ ယွၼ်ႇယၢၼ်းပၼ် ဢမ်ႇယွၼ်ႇယၢၼ်းပၼ် UNFC မၼ်းတေမီးတီႈၼၼ်ႈ။ ငဝ်းလၢႆးမၼ်း တေလူင်းလၢႆးမိုဝ်းဢမ်ႇလူင်းဢၼ်ဝႃႈၼၼ်ႉ ႁဝ်းၶႃႈပႆႇၸၢင်ႈလၢမ်းၶၢတ်ႈ၊ တေလႆႈပႂ်ႉတူၺ်းဝၼ်းတီႈ 8 ၊ မၼ်းတေဢွၵ်ႇမႃးၸိူင်ႉႁိုဝ်။

မိူဝ်ႈၶဝ်ၺႃးၵၼ်ၵမ်းတီႈ 7 ၼၼ်ႉ တင်းသွင်ၾၢႆႇၵေႃႈလၢတ်ႈၵၼ်ဝႃႈ- ဢၼ်ႁဝ်းမႃးၺႃးၵၼ်ထႅင်ႈၵမ်းၼိုင်ႈၼႆႉ ႁႂ်ႈပဵၼ်ၵမ်းလိုၼ်းသုတ်း၊ ပွင်ႇဝႃႈတေၶတ်းၸႂ်ႁႂ်ႈမၼ်းလႆႈ။ ပေႃးဝႃႈၸိူင်ႉၼၼ် လႆႈဝႃႈငဝ်းလၢႆးမၼ်းတႄႉ ၶႅၼ်းမႃးထႅင်ႈဢိတ်းၼိုင်ႈယူႇႁိုဝ် မွၵ်ႈၸိူင်ႉၼၼ်ၵူၺ်း။ ႁဝ်းပႂ်ႉတူၺ်းဝၼ်းတီႈ 8 ၊ ၵွပ်ႈပိူဝ်ႈဝႃႈၶဝ်ၵေႃႈၽိတ်ႈမွၵ်ႇ တင်းၸုမ်းဢၼ်ႁဝ်းၶႃႈလူင်းလၢႆးမိုဝ်း 8 ၸုမ်းၼႆႉ ၵႂႃႇၶိုၼ်ႈလဵပ်ႈႁဵၼ်းၸွမ်း တီႈတႃႈၵုင်ႈ။ မိူဝ်ႈၼၼ်ႉတႄႉ တၢင်းႁဝ်းၶႃႈၵေႃႈတေၵႂႃႇထႅင်ႈၵမ်းၼိုင်ႈ။ ငဝ်းလၢႆးမၼ်း တေၶႅၼ်းမႃးလိူဝ်ၵဝ်ႇဢိတ်းၼိုင်ႈ ႁဝ်းၶႃႈၸၢင်ႈလၢတ်ႈၸိူင်ႉၼၼ်ၵူၺ်း။ လိုၵ်ႉလိုၵ်ႉတႄႉ မၼ်းတေမီးတီႈတင်းသွင်ၾၢႆႇ မိူဝ်ႈဢုပ်ႇၵၼ်ၼၼ်ႉ ၸွင်ႇတေၸၢင်ႈဢုပ်ႇၵၼ်လႆႈလီ၊ တေၸၢင်ႈယွၼ်ႇယၢၼ်းႁႃၵၼ်ၵႃႈႁိုဝ် ဢၼ်ၼႆႉႁဝ်းၶႃႈပႂ်ႉတူၺ်း၊ ငဝ်းလၢႆးမၼ်းပဵၼ်ၸိူင်ႉၼၼ်ၶႃႈ။

(ၶႅၼ်းတေႃႈပႂ်ႉသိုပ်ႇဢၢၼ်ႇတွၼ်ႈ မိူဝ်ႈလဵဝ်ပၢင်ၵုမ် ND တႆးပႆႇလႆႈၸတ်းႁဵတ်း၊ တႃႇတေၶဝ်ႈႁူမ်ႈပၢင်ၵုမ်လူင် ႁူဝ်ပၢၵ်ႇပီ 21 ပၢင်လူင်ပွၵ်ႈၵမ်း 3 ၸွင်ႇတႆးပႃႈတူဝ်ႈတၼ်း)