ၸႄႈဝဵင်းမိူင်းပၼ်ႇ ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ့်မႅင်းတၢင်းပဵၼ်ၶူဝ်ႊဝိတ့် 19 မီးၵႂႃႇ 300 ပၢႆ လူ့တၢႆယဝ့် 2 ၵေႃ့ ဝႃႈၼႆ။
တၢင်းပဵၼ်ၶူဝ်ႊဝိတ့် 19 ပွၵ်ႈၵမ်းသၢမ် ၽႄႈလၢမ်းတိတ်းၸပ်း ၵူၼ်းမိူင်းပိုၼ့်တီႈ ၼႂ်းၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈ တႆး ပွတ်းၸၢၼ်း တေႃႇထိုင် ဝၼ်းတီႈ 27/9/2021 ၼႆ့ မီးၵူၼ်းတိတ်းၸပ်း တင်းမူတ်း 300 ပၢႆ လူ့တၢႆ 2 ၵေႃ့ ၵူၼ်းမိူင်းပိုၼ့်တီႈ မႆႈၸႂ် ၵူဝ်တိူဝ်းၶိုၼ်ႈႁႅင်း ၼႆယဝ့်။
ၵူၼ်းပိုၼ့်တီႈ မိူင်းပၼ်ႇ ၵေႃ့ၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တၢင်းပဵၼ်ၼႆ့ တိူဝ်းၶိုၼ်ႈ ထႅင်ႈၶႃႈဢေႃႈ တေႃႇထိုင် မိူဝ်ႈၼႆ့ ဝၼ်းတီႈ 27 မီးၵူၼ်းတိတ်းၸပ်း ၸိူဝ့်မႅင်းတၢင်းပဵၼ် 307 ၵေႃ့ လူ့တၢႆ 2 ၵေႃ့။ ၵူၼ်းပဵၼ်ဢၼ်တိူဝ်းၶိုၼ်ႈမႃးၼႆ့ တေပဵၼ်ၵူၼ်းၵဝ်ႇ ဢၼ်မူၵ်း ယူႇၸွမ်းႁိူၼ်းယေးၸိူဝ်းၼၼ့် ဢမ်ႇယွမ်းၵႂႃႇၵူတ်ႇၸိူဝ်းၼၼ့်ၶႃႈ။ ၵမ်းၼႆ့ ၵူၼ်းၸိူဝ်းၼၼ့်သမ့် ၵႂႃႇၽႄႈလၢမ်း ၼႂ်းၶွပ်ႈၶူဝ်းၶဝ်ၼၼ့် ၶႃႈၼႃႇ”- ဝႃႈၼႆ။
ဢိင်ၼိူဝ် လွင်ႈတၢင်းပဵၼ်ၶူဝ်ႊဝိတ့် 19 ၽႄႈလၢမ်း ၼႂ်းၸႄႈဝဵင်းမိူင်းပၼ်ႇၼႆ့ ၵူၼ်းမိူင်းပိုၼ့်တီႈ မၢင်ၵေႃ့ ၸိူဝ်းတိတ်းၸပ်း ၸိူဝ့်မႅင်း ဢမ်ႇယွမ်းၵႂႃႇယူတ်းယႃတူဝ် တီႈႁူင်းယႃ ဢွၼ်ၵၼ် မူၵ်းယူႇႁိူၼ်းယေးသေ ယူတ်းယႃၵၼ်ၸိူဝ်းၼၼ့်ၵေႃႈ မီးတင်းၼမ် ၼႆယဝ့်။
“မီးၼမ်ၼႃႇၶႃႈ တီႈမိူင်းပၼ်ႇႁဝ်းၶႃႈၼႆ့ ဢၼ်ယူႇတီႈႁိူၼ်းယေးသေ ယူတ်းယႃၵၼ် ၸိူင့်ၼၼ်ၵေႃႈမီးၶႃႈဢေႃႈ။ ဢမ်ႇယွမ်းၵႂႃႇယူတ်း ယႃ တီႈႁူင်းယႃၵၼ်ၶႃႈ။ ၵူၺ်းၵႃႈ ပိူင်ႈၵၼ်ၼႃႇ ပီႈၼွင့်မၢၼ်ႈတင်း ပီႈၼွင့်တႆးၼႆ့။ ပေႃးပဵၼ်ပီႈၼွင့်မၢၼ်ႈ ၶဝ်ဢမ်ႇလႆႈသႅဝ်ဢႆသင် ၼႆ ၵေႃႈလႅၼ်ႈၵႂႃႇႁူင်းယႃ ယူတ်းယႃၵမ်းလဵဝ်။ ပေႃးပဵၼ်ပီႈၼွင့်တႆးသမ့် ဢမ်ႇၸႂ်ႈၸိူင့်ၼၼ် ဢမ်ႇၵႂႃႇ ဢမ်ႇႁႃ ပေႃးၵႂႃႇႁႃသမ့် ၵူၼ်းၼႂ်းၶွပ်ႈ ၶူဝ်းလဵဝ်ၵၼ် သမ့်ပၢႆလႃႇပွင်ႇၵၼ် မႂ်းတေၵႂႃႇႁဵတ်းသင် ၵမ့်တေလႆႈဢွၼ်ၵၼ်ထုၵ်ႇၵၵ်းတူဝ် မူတ်းဢိူဝ်ႈ သမ့်ပႆဝႃႈၸိူင့်ၼႆၵေႃႈမီးၶႃႈ ဢေႃႈ”- ၵူၼ်းပိုၼ့်တီႈမိူင်းပၼ်ႇ သိုပ်ႇလၢတ်ႈၼႄၼင်ႇၼႆ။
ၼွၵ်ႈလိူဝ်ၼၼ့် ၵၢတ်ႇၽၵ်းၶဵဝ် ဢၼ်ပိုတ်ႇၶၢႆ တီႈၼႃႈဝတ့်မူၺ်ႇတေႃႇ ၵၢင်ဝဵင်း မိူင်းပၼ်ႇ ၼၼ့်ၵေႃႈ မီးၵူၼ်းၶဝ်ႈသိုဝ့်ၸၢႆႇၵၼ် ၵိုၼ်း ၶွၼ်ႈၼမ် လွင်ႈၼႆ့ ၵူၼ်းမိူင်းၵမ်ႈၼမ် ဢွၼ်ၵၼ် ထတ်းသၢင်ဝႃႈ တၢင်းပဵၼ်ၼႆ့ ၵူဝ်ၽႄႈလၢမ်းႁႅင်းထႅင်ႈၵူၺ်းယဝ့် ဝႃႈၼႆ။
“ၵၢတ်ႇၽၵ်းၶဵဝ်ၼႆ့ ၵူၼ်းၵိုၼ်းၶွၼ်ႈၵူႈဝၼ်း။ မိူဝ်ႈၼႆ့ ၶႅၼ်းၵိုၼ်း။ ၵူၼ်းၵႂႃႇၶၢႆ ၵေႃႈၼမ် ၵူၼ်းၵႂႃႇသိုဝ့်ၵေႃႈၼမ် ၵိုၼ်းလူင်ဝႆ့ယဝ့်။ သင် ပဵၼ်လႆႈ ႁဵတ်းသင် ၶဝ်ဢမ်ႇၵႂႃႇပိုတ်ႇၶိုၼ်း ၵၢတ်ႇလူင်ၼၼ့် မီးတၢင်းၶဝ်ႈဢွၵ်ႇ ၽၵ်းတူဝႆ့ တေလႆႈၵူတ်ႇထတ်း ၵူၼ်းၶဝ်ႈဢွၵ်ႇ ၵူႈၵေႃ့ သင်ဝႃႈ ထတ်းတူၺ်းလႄႈ လႆႈႁူ့မီးတၢင်းပဵၼ်ၼႆၵေႃႈ ဢဝ်ၵႂႃႇယူတ်းယႃၵမ်းလဵဝ်။ တီႈၵၢတ်ႇလူင်ၼၼ့် ၶဝ်တေလႆႈၵူတ်ႇထတ်းၵူၼ်း လႆႈလီလီ။ ၵၢတ်ႇၽၵ်းၶဵဝ်ၼႆ့ ဢမ်ႇၸႂ်ႈၸိူင့်ၼႆလူင် ၽႂ်ၶႂ်ႈၶဝ်ႈသိုဝ့်တၢင်းလႂ်ၵေႃႈလႆႈ ပဵၼ်ၵၢတ်ႇၵၢင်တၢင်းၵူၺ်း တၢင်းၶဝ် မီးၵူႈႁူး လွင်ႈၼႆ့ ၵေႃႈ ၶႅၼ်းလီမႆႈၸႂ်ၵွၼ်ႇၶႃႈဢေႃႈ။ သင်ဝႃႈ ၼႂ်းၵၢတ်ႇၽၵ်းၶဵဝ်ၼၼ့် မီးၵူၼ်းပဵၼ် 3 ၵေႃ့လူး တိတ်းၵၼ်တၢင်းၵၢတ်ႇၵွၼ်ႇၶႃႈဢေႃႈ”- ၵူၼ်းပိုၼ့်တီႈ မိူင်းပၼ်ႇ သိုပ်ႇလၢတ်ႈ ၼႄၼင်ႇၼႆ။
ၵၢတ်ႇလူင် မိူင်းပၼ်ႇလႄႈ ႁၢၼ့်ၶၢႆၶူဝ်း ၸွမ်းၵၢင်ဝဵင်းၼၼ့် တႄႇပိၵ့်ဢိုတ်းမႃး တင်ႈတႄႇ ဝၼ်းတီႈ 19/9/2021 ၼၼ့်သေ တေ ပိၵ့်ဢိုတ်းတႃႇၶၢဝ်းတၢင်း 2 ဝူင်ႈ တေႃႇထိုင်ဝၼ်းတီႈ 2/10/2021 ၼႆ့ယဝ့်။
ယၢမ်းလဵဝ် ၼႂ်းၸႄႈဝဵင်းမိူင်းပၼ်ႇတႄ့ ယဵၼ်သီႇၵူၼ်းဢွၵ်ႇၼွၵ်ႈႁိူၼ်းယေး 3 ပုၼ်ႈ 1 ပုၼ်ႈ ဝႃႈၼႆသေတႃ့ ၵူၺ်းၵႃႈ ၵူၼ်းတိတ်းၸပ်း တၢင်းပဵၼ်ၶူဝ်ႊဝိတ့် 19 တိုၵ့် တိူဝ်းၶိုၼ်ႈယူႇ။
