ၸဝ်ႈၵူဝ်ႇယိၼ်ႇလေး ထမ်ႈၸၢင်ႉႁူဝ်ပူင်း လူႉလွၼ်ႇၶဝ်ႈသူၼ်မၢၵ်ႇႁၢၵ်ႈၶမ်းလူၺ်ႈတၢင်းပဵၼ်ၶူဝ်ႊဝိတ်ႉ 19 ၾၢႆႇပၢႆးယူႇလီၵူတ်ႇထတ်းပၼ်တၵ်ႉၵႃႇ တပႄးဢၼ်ယူႇၸမ်လုမ်းလႃးၸဝ်ႈၵူဝ်ႇယိၼ်ႇလေး ၼၼ်ႉ ထူပ်းႁၼ်ၵူၼ်းၸပ်းတၢင်းပဵၼ်ၶူဝ်ႊဝိတ်ႉထႅင်ႈ 6 ၵေႃႉ။
ၵူၼ်းၼုမ်ႇပဢူဝ်း ဝဵင်းႁူဝ်ပူင်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ- “ၾၢႆႇယူႇလီၵူတ်ႇထတ်းပၼ်ၶဝ်မိူဝ်ႈဝၼ်းတီႈ 1/9/2021 ၵမ်းလဵဝ်ၶႃႈ။ ထူပ်းႁၼ်ၵူၼ်းမီးၸိူဝ်ႉမႅင်း 6 ၵေႃႉ။ မေႃယႃၵေႃႈယိုၼ်ယၼ် ၶွၼ်ႊၾိူမ်ႊ ဝႃႈၶဝ်ၸပ်းတၢင်းပဵၼ်။ ၵူၺ်းၵႃႈၶဝ်ဢမ်ႇယွမ်းႁပ်ႉဝႃႈၶဝ်ၸပ်းတၢင်းပဵၼ်။ တေႃႇထိုင်တလဵဝ်ၵေႃႈ ၶဝ်ဢမ်ႇယွမ်းၵၵ်းတူဝ်လႄႈ ဢမ်ႇယွမ်းယူတ်းယႃတူဝ် ” – ဝႃႈၼႆ။
ၸိူဝ်းၶဝ်ယုမ်ႇယမ်ဝႃႈ ၶဝ်ႈၵၵ်းတူဝ် ယူတ်းယႃတူဝ် 14 ဝၼ်းၼႆႉႁိုင်ၼၢၼ်းၼႃႇ။ လူဝ်ႇၸတ်းတၢင်းလူႇႁႅၼ်းသွမ်းပၼ်ၸဝ်ႈၵူဝ်ႇယိၼ်ႇလေး လႄႈဢမ်ႇယွမ်းၵၵ်းတူဝ် – ၵူၼ်းၼုမ်ႇပဢူဝ်းၼၼ်ႉလၢတ်ႈထႅင်ႈၼင်ႇၼႆ။
ၾၢႆႇၼိုင်ႈဝၼ်းသၢင်းၵဵဝ်ႇၽဝ်ၶၢပ်ႈတူဝ်ၸဝ်ႈၵူဝ်ႇယိၼ်ႇလေးၼၼ်ႉ သိုၵ်းမၢၼ်ႈ သိုၵ်းပဢူဝ်းလႄႈ ၵူၼ်းမိူင်းဢွၼ်ၵၼ်ၸွမ်းသူင်ႇဝႆႈသႃ တင်းၼမ်တင်းလၢႆ ဢမ်ႇတိုဝ်းၽႃႈပူၵ်ႉပၢၵ်ႇၵၼ်။
ၸၢႆးၼုမ်ႇၵူၼ်းမိူင်းႁူဝ်ပူင်းၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ- “ပဵၼ်ၵူၼ်းတၢင်းဝၢၼ်ႈဢေႃႈ ဢွၼ်ၵၼ်ၸွမ်းသူင်ႇ။ ႁဝ်းၶႃႈယူႇၼႂ်းဝဵင်း ပေႃးပဵၼ်သင်မႃး ၶိုတ်းတၼ်းၵူႈမဵဝ်း ႁဝ်းယင်းမႆႈၸႂ်ဢမ်ႇႁတ်းဢွၵ်ႇႁိူၼ်း။ ဢၼ်ၶဝ်ယူႇတီႈဝၢၼ်ႈ ၵႂႃႇမႃးယၢပ်ႇၼၼ်ႉ ၶဝ်ဢမ်ႇၵူဝ်သင်။ ပေႃးယုမ်ႇယမ်လိူဝ်ႁႅင်းၵေႃႈ ဢမ်ႇမီးတၢင်းဝူၼ်ႉသင်ယဝ်ႉ ။ မႆႈၸႂ်ၶဝ်ၼႃႇၶႃႈ။ ဢၼ်ၶဝ် Live တီႈၾဵတ်ႉသ်ပုၵ်ႉၼၼ်ႉလႆႈႁၼ်ယူႇၶႃႈလူးၼၼ်ႉ ။ ၵမ်ႈၼမ်ဢမ်ႇတိုဝ်းၽႃႈပူၵ်ႉပၢၵ်ႇ” – ဝႃႈၼႆ။
ဝၢႆးၵႂႃႇသူင်ႇၽဝ်ၶၢပ်ႈတူဝ်ၸဝ်ႈၵူဝ်ႇယိၼ်ႇလေးပွၵ်ႈၶိုၼ်းႁိူၼ်းၽႂ်မၼ်းၼၼ်ႉ ႁႂ်ႈၵႂႃႇလၢႆးငၢၼ်းတီႈၵူၼ်းလူင်ဝၢၼ်ႈဢိူင်ႇပွၵ်ႉယွမ်ႇၽႂ်မၼ်းသေ ၵၵ်းတူဝ် ၶဝ်ႈ Quarantine ႁင်းၽႂ်မၼ်း – ၼႆ ၸုမ်းပဢူဝ်း PNO ပိုၼ်ၽၢဝ်ႇဝႆႉၼင်ႇၼႆ။
ၵူၼ်းဢၼ်သူင်ႇၶၢပ်ႈတူဝ် ၸဝ်ႈၵူဝ်ႇယိၼ်ႇလေးၼၼ်ႉ လိူဝ်သေၵူၼ်းတီႈဝၢၼ်ႈႁူဝ်တိုဝ်ႉ ဝဵင်းႁူဝ်ပူင်းယဝ်ႉ တၵ်ႉၵႃႇဢၼ်လုၵ်ႉမိူင်းပွၼ်၊ တူၼ်ႈတီး ၸိူဝ်းၼႆႉမႃးၵေႃႈမီး ။
ၵူၼ်းတူၼ်ႈတီး ၶၢင်းပွင်ႉဝႃႈ “ၵူၼ်းဢၼ်တိတ်းၸပ်းတၢင်းပဵၼ်ၶူဝ်ႊဝိတ်ႉတႄႉ ပေႃးႁူႉတူဝ်ၶိုတ်းတၼ်းလႄႈလႆႈယူတ်းယႃလီၵေႃႈယင်းတေႁၢႆ။ ပေႃးဢမ်ႇႁၢႆၵေႃႈတၢႆ။ ၵူၺ်းၵႃႈ ၵူၼ်းမိူင်းဢၼ်ဢမ်ႇၸပ်းတၢင်းပဵၼ်လႄႈဢၼ်ဢမ်ႇဢွၵ်ႇႁိူၼ်းသမ်ႉတေၺႃးလွင်ႈတုမ်ႉတိူဝ်ႉယွၼ်ႉမၼ်း ။ တေဢမ်ႇၸၢင်ႈဢွၵ်ႇႁႃၵိၼ်လဵင်ႉတွင်ႉသေပွၵ်ႈ ။ပႃးၵၼ်ဢိုပ်း ပႃးၵၼ်ယၢပ်ႇတင်းမိူင်းဢေႃႈ။ ၽွင်းၶူဝ်ႊဝိတ်ႉၽႄႈၼႆႉတႄႉ ၵူႈၵေႃႉလူဝ်ႇပၼ်တၢင်းႁူမ်ႈမိုဝ်းယူႇဢေႃႈ ”- ဝႃႈၼႆ။
ၸဝ်ႈၵူဝ်ႇယိၼ်ႇလေးၼႆႉလူႉလွၼ်ႇဝၼ်းတီႈ 1/9/2021 ယၢမ်းၵၢင်ဝၼ်း 11 မူင်း 45 မိၼိတ်ႉ။ တၵ်ႉၵႃႇလႄႈ ၵူၼ်းဝၢၼ်ႈ ဢၼ်ယုမ်ႇယမ်ၼပ်ႉထိုဝ်မၼ်းၸဝ်ႈဝႃႈ မၼ်းၸဝ်ႈၶိုၼ်းတေလုၵ်ႉတိုၼ်ႇၶိုၼ်ႈမႃးၶိုၼ်းၼႆသေ ဢမ်ႇယွမ်းပၼ်ၸဝ်ႈၼႃႈတီႈၽဝ်ဝၼ်းၼၼ်ႉၵမ်းလဵဝ် ။ထိုင်တီႈဝၼ်းတီႈ 2/9/2021 ယၢမ်းဝၢႆးဝၼ်းၸင်ႇၸၢင်ႈၽဝ်ၶၢပ်ႈတူဝ်။