ၼႂ်းၸႄႈဝဵင်းမိူင်းၵိုင် ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ 19 တင်းမူတ်းမီး 70 ၵေႃႉ ဝႃႈၼႆ။
တႄႇဢဝ် ႁၢင်လိူၼ်ၵျုၼ်ႊမႃး တေႃႇထိုင် ဝၼ်းတီႈ 30/8/2021 ၼႆႉ ၼႂ်းၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တင်းမူတ်းမီးၵႂႃႇ 70 ၵေႃႉ လူႉတၢႆ ဢမ်ႇ မီး ယၢမ်းလဵဝ် တိုၵ်ႉယူတ်းယႃတူဝ်ဝႆႉ 19 ၵေႃႉ ၼႆယဝ်ႉ။
ၵူၼ်းၼုမ်ႇ မိူင်းၵိုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၵူၼ်းပဵၼ်ဢၼ်ၵူတ်ႇထတ်းႁၼ်ၸိူဝ်ႉမႅင်း တီႈမိူင်းၵိုင်ၼႆႉတႄႉ ၵမ်ႈၼမ် ပဵၼ်ၵူၼ်း လုၵ်ႉတၢင်ႇၸႄႈဝဵင်းမႃး လႄႈ ၵူၼ်းႁေႃႈလႅင်းၵႃး ဢေႃႈ။ ၵူၼ်းပိုၼ်ႉတီႈ ၸိူဝ်း ၸပ်းၼၼ်ႉတႄႉ လေႃးလေးၵၼ်ၶႃႈ ၵူၼ်းၼုမ်ႇ၊ ပၢၼ်ၵၢင်၊ ၵူၼ်းထဝ်ႈ ၸိူဝ်းၼႆႉ” – ဝႃႈၼႆ။
ၼႂ်းလိူၼ်ဢေႃႊၵတ်ႊသ် တႄႇဢဝ် ဝၼ်းတီႈ 1-30 ၼႆႉၵူၺ်း ၼႂ်းၸႄႈဝဵင်းမိူင်းၵိုင် မီးၵူၼ်းတိတ်းၸပ်း 53 ၵေႃႉ။ လူင်း ႁူင်းယႃယဝ်ႉ 34 ၵေႃႉ ယၢမ်းလဵဝ် တိုၵ်ႉယူတ်းယႃဝႆႉ 19 ၵေႃႉ၊ ၼႂ်းလိူၼ်ၼႆႉၵူၺ်း ဢၼ်လႆႈဢဝ်ၶိူင်ႈ RDT သေ ၵူတ်ႇ ထတ်း တင်းမူတ်း 256 ၵေႃႉ ၼႆယဝ်ႉ။
တၢင်းပဵၼ် ၶူဝ်ႊဝိတ်ႉ 19 ၽႄႈလၢမ်းပွၵ်ႈၵမ်းၼႆႉ တုမ်ႉယွၼ်ႈၵၢၼ်ႁႃၵိၼ်လဵင်ႉတွင်ႉၵူၼ်းမိူင်း၊ ၵိၼ်းၸႂ်ယၢပ်ႇၽိုတ်ႇတႃႇ ၵိၼ်ယမ်ႉ။
“ဢၼ်ယၢပ်ႇၽိုတ်ႇ လိူဝ်ႁႅင်းတႄႉ ၵူၼ်းႁႃၸဝ်ႉၵိၼ်ၶမ်ႈ ၵူၼ်းၶၢႆၵၢတ်ႇ။ ၵၢတ်ႇတႄႉ ပိုတ်ႇယူႇ ၵူၺ်းဢမ်ႇမီးၵူၼ်းၶဝ်ႈ သိုဝ်ႉၸၢႆႇၼၼ်ႉၶႃႈယဝ်ႉ။ ႁႃငိုၼ်းယၢပ်ႇၶႃႈ ဢမ်ႇမီးတႃႇလႆႈသင်။ ၶွင်ၵိၼ်ယႅမ်ႉၵေႃႈၶိုၼ်ႈၵူႈမဵဝ်း ၵိူဝ်ၽွင်ဝၢၼ် ၸိူဝ်းၼႆႉ ၵေႃႈၶိုၼ်ႈ မိူဝ်ႈၵူႈပွၵ်ႈ ၼိုင်ႈထူင် 500 တေႃႈလဵဝ် ၶိုၼ်ႈၵႂႃႇပဵၼ် 1,000 ၶႃႈဢေႃႈ”- ဝႃႈၼႆ။
လိူဝ်သေ မိူၼ်ၼင်ႇ ၽုၼ်ႇၸႂ်ႉၼႂ်းသူၼ်ႁႆႈၼႃး ၸိူဝ်းၼႆႉၵေႃႈ ၶိုၼ်ႈၶၼ်မူတ်း လွင်ႈၼႆႉ ၸဝ်ႈသူၼ်ႁႆႈၼႃးၵေႃႈ ထူပ်း တၢင်းယၢပ်ႇၽိုတ်ႇၵိၼ်းၸႂ် မိူၼ်ၵၼ်။
“ၵူႈပီလႆႈသိုဝ်ႉ မေႇဢေႃးၸႃႇ သၢၼ်လမ် သၢၼ်လႅင် ၼိုင်ႈထူင်လႂ် 19,000 ပျႃး။ ယၢမ်းလဵဝ် ပုင်ႈၶိုၼ်ႈ 39,000 ပျႃးဢေႃႈ။ သၢၼ်ၶၢဝ်သမ်ႉ 35,000 ပျႃး ပုင်ႈၶိုၼ်ႈ 58,000 ပျႃးၶႃႈ။ ယွၼ်ႉဝၢၼ်ႈမိူင်းဢမ်ႇမီးလွင်ႈၼိမ်သဝ်းၵေႃႈပိူင်ၼိုင်ႈ တၢင်းပဵၼ် ၵေႃႈပိူင်ၼိုင်ႈ ယွၼ်ႉၶူဝ်းဢမ်ႇၶဝ်ႈမႃးလႄႈ သင်ဝႃႈ ၵႂႃႇတေႃႇၶူဝ်းၵုၼ်ႇမႃးသမ်ႉ လႆႈထုၵ်ႇမႃးၵၵ်းတူဝ်ဝႆႉတႃႇ 14 ဝၼ်း”- ၵူၼ်းၼုမ်ႇ မိူင်းၵိုင် သိုပ်ႇလၢတ်ႈၼႄၼင်ႇၼႆ။
ယွၼ်ႉတၢင်းပဵၼ်ၶူဝ်ႊဝိတ်ႉ 19 ပွၵ်ႈၵမ်းသၢမ် ၽႄႈလၢမ်းႁၢဝ်ႈႁႅင်းၼႆႉသေ ယူႇတီႈသင်ၶၸဝ်ႈ မူၺ်ႇတေႃႇ ထၢတ်ႈၸႅတ်ႈ လူင်မိူင်းၵိုင်ၵေႃႈ ဢွၵ်ႇလိၵ်ႈ ပွင်ႇလႅင်းထိုင် တၵ်ႉၵႃႇသတ်ႉထႃး ၵူၼ်းမိူင်း မိူဝ်ႈဝႃး ဝၼ်းတီႈ 30 ၼႆႉဝႃႈ – ပီၼႆႉ ယွၼ်ႉငဝ်း လၢႆး တၢင်းပဵၼ်ၶူဝ်ႊဝိတ်ႉ 19 သေ ပေႃးထိုင်မႃးလိူၼ် ၵဝ်ႈလပ်း ၵၢင်ဝႃႇၼႆႉ ပွႆးၾိင်ႈထုင်းတႆႈတဵၼ်းပႅၵ်ႇလူႇတၢၼ်း တီႈမူၺ်ႇတေႃႇထၢတ်ႈၸႅတ်ႈ မိူင်းၵိုင် တေဢမ်ႇပဵၼ်ယဝ်ႉ။ ဢမ်ႇၶႂ်ႈႁႂ်ႈ တၵ်ႉၵႃႇ ၵူၼ်းဝၢၼ်ႈ/ မိူင်း မႃး ၶွၼ်ႈ တုမ်ၵၼ်။ သင်ဝႃႈ ၵူဝ်လႆႈၸိူင်ႉၵၢတ်ႈ ၸိုင် ႁႂ်ႈတႆႈ ၼႃႈႁိူၼ်းၽႂ်မၼ်းသေ ယိူင်းၸူးလူႇတၢၼ်းၵႂႃႇၼႆႉ လီတီႈသုတ်းယဝ်ႉ – ဝႃႈၼႆ။
