ၵူၼ်းဝဵင်းၸေႊၵဝ်ႇ ၾင်ႇမိူင်းၶႄႇ ဢၼ်မီးတေႃႇၼႃႈၵၼ် တၢင်းဝဵင်းမူႇၸေႊ ၸိုင်ႈတႆး ပွတ်းႁွင်ႇၼၼ်ႉ  လူင်ပွင်ၸိုင်ႈၶႄႇႁွင်ႉၵႂႃႇ ၵၵ်းတူဝ် တီႈမိူင်းမၢဝ်း – မိူင်းၶွၼ် တင်းမူတ်း ဝႃႈၼႆ။

တေႃႇထိုင် ဝၼ်းတီႈ 26/8/2021 ၼႆႉ ဝႆႉပဵၼ်ဝၼ်းလိုၼ်းသုတ်းသေ ၵူၼ်းမိူင်း ၼႂ်းဝဵင်းၸေႊၵဝ်ႇ ၾင်ႇမိူင်းၶႄႇ ပီႈ ၼွင်ႉတႆး ပီႈၼွင်ႉၶႄႇ ႁႅင်းၵၢၼ်မိူင်းႁူမ်ႈတုမ်တင်းမူတ်း ဢၼ်မီးဝႆႉ ၼႂ်းဝဵင်းၸေႊၵဝ်ႇ ၼၼ်ႉ လူင်ပွင်ၸိုင်ႈမိူင်းၶႄႇ ႁွင်ႉႁႂ်ႈမိူဝ်း ၵၵ်းတူဝ်  ဝႆႉတီႈမိူင်းမၢဝ်း – မိူင်းၶွၼ် တႃႇၵုမ်းၵမ်ႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 တႃႇၶၢဝ်းတၢင်း 14 ဝၼ်း ထိုင် 21 ဝၼ်း ၼႆယဝ်ႉ။

ၵူၼ်းၸေႊၵဝ်ႇ ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈဝႃႈ – “တေႃႇထိုင် ဝၼ်းတီႈ 26 ၼႆႉ ပဵၼ်ဝၼ်းလိုၼ်းသုတ်းၶႃႈ ႁႂ်ႈဢွၼ် ၵၼ်ၵႂႃႇ။  ၵူၼ်းၸိူဝ်းယူႇၼႂ်းၸေႊၵဝ်ႇ တင်းမူတ်း ။ ဢမ်ႇဝႃႈ ၵူၼ်းပိုၼ်ႉတီႈ ပီႈၼွင်ႉႁႅင်းၵၢၼ် ႁႂ်ႈဢွၼ်ၵၼ် ၵႂႃႇၵၵ်းတူဝ်ဝႆႉ တီႈမိူင်းမၢဝ်း – မိူင်း ၶွၼ် တႃႇၶၢဝ်းတၢင်း 14 ဝၼ်း ဢမ်ႇၼၼ် 21 ဝၼ်းၶႃႈ။ ယၢမ်းလဵဝ် တီႈၸေႊၵဝ်ႇတႄႉ မိူၼ်မိူင်းႁၢမ်း လူင်ဝႆႉ ယဵၼ်ဝႆႉၶႃႈဢေႃႈ”- ဝႃႈၼႆ။

ယၢမ်းလဵဝ် တီႈဝဵင်းၸေႊၵဝ်ႇတႄႉ   လိူဝ်သေ ၽူႈႁၢပ်ႇၵၢၼ်လူင်ပွင်ၸိုင်ႈ၊ သိုၵ်းလႄႈ ၵူၼ်းပႂ်ႉႁိူၼ်းယေး ၵမ်ႈၽွင်ႈၼၼ်ႉ ဢွၼ်ၵၼ်ၵႂႃႇၵၵ်းတူဝ်မူတ်းယဝ်ႉ ။

“ယၢမ်းလဵဝ် တီႈၸေႊၵဝ်ႇၼႆႉ တေၵိုတ်းဝႆႉ သိုၵ်း ယဝ်ႉၵေႃႈ ၽူႈႁၢပ်ႇၵၢၼ်လူင်ပွင်ၸိုင်ႈ လိူဝ်ၼၼ်ႉၵူၼ်းပႂ်ႉႁိူၼ်း။ ၼိုင်ႈ ဢွင်ႈတီႈလႂ် ၵူၼ်းပႂ်ႉႁိူၼ်း 2-3 ၵေႃႉ ႁဵတ်းၼႆဝႆႉ တင်းမူတ်းတေမီးမွၵ်ႈ 1,000 ၼႆႉၵႃႈ ႁူဝ်ၵူၼ်းတႄႉ”- ၵူၼ်းၸေႊၵဝ်ႇ သိုပ်ႇလၢတ်ႈၼႄၼင်ႇၼႆ။

ၵူၼ်းမိူင်း ဢၼ်လုၵ်ႉၸေႊၵဝ်ႇ ၶဝ်ႈၵႂႃႇမိူင်းမၢဝ်း – မိူင်းၶွၼ်ၼၼ်ႉ ၵမ်ႈၼမ် ၶီႇၵႃးမၢၼ်ႇလူင်ႇသေ သႂ်ႇၶူဝ်း PPE ၵၼ် ၵႂႃႇၵူႈၵေႃႉ မၢင်ၸိူဝ်း ဢဝ်ရူတ်ႉၵႃးသုၼ်ႇတူဝ်ၸဝ်ႈၵဝ်ႇၵႂႃႇၵေႃႈမီး ၼႆယဝ်ႉ။ ယၢမ်းလဵဝ် တၢင်းပဵၼ်ၶူဝ်ႊဝိတ်ႉ 19 ၼႆႉ ၽႄႈလၢမ်းၶိုၼ်ႈမႃးႁၢဝ်ႈႁႅင်းထႅင်ႈသေ ဢမ်ႇဝႃႈတၢင်းၾင်ႇမိူင်းၶႄႇ မိူင်းတႆး ၸဵမ်ၸိူဝ်းၼႆႉ။ မိူၼ်ၼင်ႇ တၢင်းၸႄႈဝဵင်းမူႇၸေႊ – ၼမ်ႉၶမ်း ဢၼ်တိတ်းၸပ်းၵၼ်တၢင်းၾင်ႇမိူင်းၶႄႇၼၼ်ႉၵေႃႈ မီးၵူၼ်းတိတ်းၸပ်း ၽိူမ်ႉၶိုၼ်ႈယူႇၵူႈဝၼ်း ၼႂ်းၸႄႈဝဵင်းၼမ်ႉၶမ်း ၵူၼ်းတိတ်းၸပ်းတၢင်းပဵၼ် ၶူဝ်ႊဝိတ်ႉ 19 တေႃႇထိုင် ဝၼ်းတီႈ 23 ၼႆႉ မီး 1,036 ၵေႃႉ၊ လူႉတၢႆ 59 ၵေႃႉ၊ လူင်းႁူင်းယႃ 847 ၵေႃႉလႄႈ တိုၵ်းယူတ်းယႃ 130 ၵေႃႉ