တီႈဝဵင်းတႃႈၶီႈလဵၵ်း လႅၼ်လိၼ်တႆး-ထႆး ၼႆႉ တၢင်းပဵၼ်ၶူဝ်ႊဝိတ်ႉ 19 လၢမ်းၽႄႈတိတ်းၸပ်းၵၼ်ႁၢဝ်ႈႁႅင်း ၼႂ်းၶၢဝ်းတၢင်းႁိမ်းၸမ် 3 လိူၼ်ၼႆႉၵူၼ်းပဵၼ်ၶူဝ်ႊဝိတ်ႉမီး 2000 ပၢႆ လူႉတၢႆ မီး 50 ပၢႆ ။
ၾၢႆႇပၢႆးယူႇလီ ၵူတ်ႇထတ်းထူပ်းႁၼ် ၵူၼ်းၸပ်းတၢင်းပဵၼ် ၼိုင်ႈဝၼ်း မီးၼႂ်းၵႄႈ 30 ထိုင် 60 ၵေႃႉသေ ၵူၼ်းလူႉတၢႆယွၼ်ႉတၢင်းပဵၼ်ၼႆႉ ၼိုင်ႈဝၼ်းမီး 3 ၵေႃႉထိုင် 5 ၵေႃႉ ၵူႈဝၼ်း။
“ၵူၼ်းတႄႉၵႂႃႇမႃး ပိုတ်ႇလၢၼ်ႉၶၢႆၶူဝ်းၶိုၼ်း ၶႆႈဝႃႈမိူၼ်ၵဝ်ႇယဝ်ႉၶႃႈ တီႈတႃႈၶီႈလဵၵ်းၼႆႉ။ ဢမ်ႇပိုတ်ႇလၢၼ်ႉၵေႃႈသမ်ႉလူဝ်ႇႁႃၵိၼ်လဵင်ႉတွင်ႉၶႃႈလူးၼေႃ။ ၵွပ်ႈၼႆ ဢၼ်ၸပ်းတၢင်းပဵၼ်ၼႆႉၵေႃႈၵူတ်ႇထတ်းႁၼ်ယူႇၵူႈဝၼ်းဢေႃႈ။ ၵူၼ်းလုၵ်ႉမိူင်းထႆး မိူင်းလၢဝ်းမႃးၵေႃႈ မီးယူႇတိၵ်းတိၵ်းဢေႃႈ“ ၵူၼ်းတႃႈၶီႈလဵၵ်း ဢၼ်ပိုၼ်ႉႁၢၼ်ႉၶၢႆၶူဝ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈၼင်ႇၼႆ။
ၵူၼ်းမိူင်းႁူမ်ႈတုမ်ဢၼ်ၵႂႃႇႁဵတ်းၵၢၼ်တၢင်းမိူင်းထႆး မိူင်းလၢဝ်းၵေႃႈ ပွၵ်ႈႁိူၼ်းၶိုၼ်းမီးယူႇၵူႈဝူင်ႈ ။ ၾၢႆႇၽွင်းငမ်း ၊ၾၢႆႇၵႅတ်ႇၵင်ႈၶူဝ်ႊဝိတ်ႉ ႁပ်ႉၶဝ်ႈတႃႈၶီႈလဵၵ်း ၵူတ်ႇထတ်းတၢင်းပဵၼ်သေ ၶိုၼ်းသူင်ႇပွၵ်ႈႁိူၼ်း- ၾၢႆႇၸွႆႈထႅမ်တူင်ႇဝူင်းၵူၼ်း တီႈတႃႈၶီႈလဵၵ်း ပိုၼ်ၽၢဝ်ႇဝႆႉၼင်ႇၼႆ။
“ၵူၼ်းၸပ်းတၢင်းပဵၼ် 2000 ပၢႆ ၼႆႉ ဢမ်ႇၸႂ်ႈၼႂ်းဝဵင်းတႃႈၶီႈလဵၵ်း ၵူၺ်းၶႃႈ။ ပဵၼ်တၢင်းဝၢၼ်ႈ ၽွင်ႈ ၊ တၢင်းမိူင်းၽူင်း တႃႈလိူဝ်ႇ ၽွင်ႈ ၊ ၵူၼ်းတၢႆၵေႃႈ တေပဵၼ်ၵူၼ်းဢႃယုသုင်။ ႁႅင်းဢွၵ်ႊသီႊၵျိၼ်ႊတူၵ်း ၶႃႈဢေႃႈ။ ဢွၵ်ႊသီႊၵျိၼ်ႊတႄႉ ၵမ်ႈၼမ် တေသင်ႇဢဝ်တၢင်းလၢႆႇၼႃႈ (မႄႈသၢႆ) ၊ မႄႈၵျၼ်း ပုၼ်ႉမႃးဢေႃႈ။ ၶဝ်ပၼ်တေႃႉၶဝ်ႈ တေႃႉဢွၵ်ႇယူႇၶႃႈ။”- ၵူၼ်းၼုမ်ႇၸွႆႈထႅမ်တူင်ႇဝူင်းၵူၼ်း တႃႈၶီႈလဵၵ်း လၢတ်ႈထႅင်ႈၼင်ႇၼႆ။
တွၼ်ႈတႃႇၸွႆႈထႅမ်ႁႅင်းၵၢၼ်ယၢၼ်မိူင်း ပွၵ်ႈႁိူၼ်းၶိုၼ်းတႄႉ ၸဝ်ႈတူၼ်ၶူးဝတ်ႉၵျွင်း ၼၵႃး 2 တူဝ်( ဝတ်ႉသၢႆမိူင်း) လႄႈ ၸဝ်ႈသြႃႇ ဝၸီႇပိၵ်ႉ ၊ ဢိၵ်ႇ ၽူႈၼမ်းၸိၵ်းၸွမ်ၾၢႆႇသိုၵ်းယိုတ်းမိူင်း လႄႈၾၢႆႇၽွင်းငမ်း ၸုမ်းသိုၵ်းယိုတ်းမိူင်းၶဝ် ႁူမ်ႈၵၼ် ၶိုင်ပွင်ၸတ်းၵၢၼ် – ၾၢႆႇၽွင်းငမ်းဝဵင်းတႃႈၶီႈလဵၵ်းၵေႃႈပိုၼ်ၽၢဝ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ