သင်ၶလႄႈၵူၼ်းမိူင်းၼမ်ႉၶမ်း တုၵ်းယွၼ်း CSSU ၶိုင်ၵၢၼ်လွင်ႈၽွမ်ႉႁူမ်ႈ

ပိူဝ်ႈတႃႇႁႂ်ႈၵူၼ်းမိူင်းၼမ်ႉၶမ်း ပႃႇတီႇတႆးတီႈဝဵင်းၼမ်ႉၶမ်း ၽွမ်ႉႁူမ်ႈၵၼ်၊ ပဵၼ်ၼမ်ႉၼိုင်ႈၸႂ်လဵဝ်ၵၼ် ၽွမ်ႉသဵင်ပဵင်းပၢၵ်ႇၵၼ်ၼၼ်ႉ ယူႇတီႈတူဝ်တႅၼ်းသင်ၶၸဝ်ႈလႄႈ ၵူၼ်းမိူင်း လႆႈႁဵတ်းလိၵ်ႈတၢင်ႇထိုင်တီႈ ၵေႃပွင်ၵၢင်ၽွမ်ႉႁူမ်ႈၸိုင်ႈတႆး (CSSU) ၵႂႃႇ။ လွင်ႈၼႆႉ ၸဝ်ႈၶူးထမ်ႇမသီႇရိ ႁူဝ်ပဝ်ႈသင်ၶထုင်ႉမၢဝ်း၊ ဝတ်ႉၸေယသုၶ ဝဵင်းၼမ်ႉၶမ်း တွပ်ႇလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ။

ထၢမ်-လွင်ႈဢၼ်လႆႈတႅမ်ႈလိၵ်ႈထိုင် CSSU ၼၼ်ႉ တႃႇႁႂ်ႈပႃႇတီႇတႆးၶွတ်ႇလိူတ်ႈၽွမ်ႉႁူမ်ႈၵၼ် ဢၼ်ဝႃႈၼၼ်ႉ မီးယိူင်းဢၢၼ်းၸိူင်ႉႁိုဝ်သေ လႆႈတႅမ်ႈလိၵ်ႈထိုင်ၶႃႈဢေႃႈ။ ပိုင်ႈၸဝ်ႈႁဝ်းတွပ်ႇပၼ်သေၵမ်းၶႃႈ?။

တွပ်ႇ-ၸဝ်ႈႁဝ်းၶဝ်လႆႈတႅမ်ႈလိၵ်ႈၵႂႃႇထိုင်တီႈ ၼႂ်းၸုမ်း CSSU ၼၼ်ႉ ယိူင်းမၢႆမၼ်းမီးလၢႆၸိူဝ်ႉလၢႆပိူင်။ ယိူင်းဢၢၼ်းဢၼ်ႁဝ်း လႆႈတႅမ်ႈလိၵ်ႈၵႂႃႇထိုင်တီႈၸုမ်း CSSU ၼႆႉ ၵွပ်ႈပိူဝ်ႈဝႃႈ ၶႂ်ႈႁႂ်ႈၸုမ်းႁဝ်းၵူႈမူႇၵူႈၸုမ်း ၸုမ်းဢၼ်ၶဝ်ႈပႃးၼႂ်း CSSU ၸိူဝ်းၼႆႉ ၸုမ်းပႃႇတီႇႁူဝ်သိူဝ်၊ ၸုမ်းပႃႇတီႇသိူဝ်ၽိူၵ်ႇ၊ ၸုမ်းတႆးႁဝ်းၼႂ်းမိူင်းၼွၵ်ႈမိူင်း ၸိူဝ်းဢၼ်ၶဝ်ႈပႃးၸိူဝ်းၼၼ်ႉ ႁႂ်ႈလႆႈႁဵတ်းၵၢၼ် တွၼ်ႈတႃႇပေႃႈမႄႈၵူၼ်းမိူင်းတႆးႁဝ်း တင်းဝၢၼ်ႈမိူင်းႁဝ်း၊ ၵူႈမူႇၵူႈၸုမ်းႁႂ်ႈလႆႈၽွမ်ႉသဵင်ပဵင်းပၢၵ်ႇၵၼ်သေလႄႈ ႁဵတ်းတႄႉတႄႉ။ ယႃႇပေၵူၺ်းလၢတ်ႈလၢႆလၢႆ၊ ထုၵ်ႇလီႁဵတ်းသၢင်ႈႁၢင်ႈပွင်ပၼ်ယဝ်ႉ။

လိူဝ်သေၼၼ်ႉ ယိူင်းဢၢၼ်းတႄႉ ၵွပ်ႈပိူဝ်ႈဝႃႈၸုမ်း CSSU ၼႆၵေႃႈ ႁဵတ်းပၢင်ၵုမ်မႃးလၢႆပီလၢႆၵမ်းယဝ်ႉ၊ ၵူၺ်းၵႃႈ ၸွမ်းၼင်ႇႁဝ်းမုင်ႈမွင်း ၶႂ်ႈလႆႈၶႂ်ႈပဵၼ်ၼၼ်ႉ လွင်ႈၽေႃႇၼမ်ႉၽေႃႇတူဝ်မႃးၼၼ်ႉ မၼ်းဢမ်ႇပေႃးႁၼ်။ ၵွပ်ႈၼၼ် ယူႇတီႈႁဝ်းၸုမ်းပေႃႈမႄႈၵူၼ်းမိူင်းလႄႈ ၸဝ်ႈသင်ၶၼုမ်ႇတႆးႁဝ်း တီႈဝဵင်းၼမ်ႉၶမ်း ၸွမ်းၼင်ႇဢၼ်ႁဝ်း လႆႈၶၢမ်ႇမႃး ၼႂ်းၵႄႈၵၢင် လွင်ႈလူၺ်ႈပႃႇတီႇဢမ်ႇမႅၼ်ႈၵၼ်သေ ႁိမ်ၼႃႈတီႈၵၼ်၊ ပေႃႈမႄႈၵူၼ်းမိူင်းၼႆႉ ၶၢမ်ႇၸၢၵ်ႇမၼ်းမႃး ႁဝ်းလႆႈသုမ်းပႃႇတီႇတၢင်ႇဢၼ် ၸဵမ်ၵႂႃႇၸိူဝ်းၼႆႉ။ ၵွပ်ႈပိူဝ်ႈဢမ်ႇၶႂ်ႈပဵၼ်ၸိူင်ႉၼင်ႇထႅင်ႈ ၸင်ႇဝႃႈထုၵ်ႇလီတုၵ်းယွၼ်း ထုၵ်ႇလီတၢင်ႇလိၵ်ႈယွၼ်းထိုင် ႁႂ်ႈလႆႈႁူႉထိုင်။ ပေႃႇလသီႇၽႂ်မၼ်းၸိူဝ်းၼႆႉ ႁႂ်ႈၶိုၼ်းမႃးဢုပ်ႇၵၼ်လီလီသေ လႆႈတႅမ်ႈတၢင်ႇထိုင်ၼႂ်းၸုမ်း CSSU ၼင်ႇၵၼ်။

တီႈဢၼ်တႅမ်ႈတၢင်ႇၵႂႃႇ ၸုမ်းပေႃႇလသီႇၽႂ်မၼ်းၼၼ်ႉ ၶိုၼ်းမႃးထတ်းသၢင်ၸွမ်းၵၼ်သေ ထုၵ်ႇလီႁဵတ်း ၸွမ်းဢၼ်လႂ် ႁႂ်ႈဢုပ်ႇၵၼ်လီလီသေ တႅပ်းတတ်းပၼ်။ ႁႂ်ႈၶိုၼ်းႁဵတ်းၵၢၼ်ၽေႃႇၼမ်ႉၽေႃႇတူဝ်၊ ၵၢၼ်ထူပ်းမိုဝ်း ၸဵမ်ၸိူဝ်းၼႆႉ ႁႂ်ႈႁဵတ်းဢွၵ်ႇမႃးလႆႈတႄႉတႄႉ။ ၵွပ်ႈပိူဝ်ႈၼၼ်လႄႈ ၸွမ်းၼင်ႇၶၢဝ်းယၢမ်း တေလိူၵ်ႈတင်ႈထႅင်ႈ၊ ပေႃးလိူၵ်ႈတင်ႈမိူဝ်ႈပီ 2020 ဢၼ်တေထိုင်မႃးၽွင်းၼၼ် ႁႂ်ႈႁဝ်းလႆႈပဵၼ်သဵင်ၶေႃႈလဵဝ်၊ ဢၼ်လႆႈဢွၵ်ႇသဵင် ၵႂႃႇၼၼ်ႉ ႁႂ်ႈလႆႈပဵၼ်ဢၼ်လဵဝ်။ ပေႃးႁဝ်းတိုၵ်ႉတႅၵ်ႇၵၼ် ပဵၼ်ၽႂ်ပဵၼ်မၼ်းယူႇၼႆႉ ၽဝၵျၢမ်ႇၵျမ်ႇမႃႇတႆးႁဝ်းၵေႃႈ တေပဵၼ်ၼႆၵႂႃႇတိၵ်းတိၵ်း။ ၵွပ်ႈပိူဝ်ႈဢမ်ႇၶႂ်ႈႁႂ်ႈပဵၼ်ၸိူင်ႉၼႆလႄႈ ၸင်ႇဝႃႈႁဝ်းထုၵ်ႇလီတုၵ်းယွၼ်း တႅမ်ႈတၢင်ႇထိုင်ၼႂ်းၸုမ်း CSSU ။

ထၢမ်-ပၼ်ႁႃ ဢၼ်လႆႈႁူပ်ႉလႆႈႁၼ်ယူႇယၢမ်းလဵဝ် သမ်ႉမီးၸိူင်ႉႁိုဝ်ၽွင်ႈၶႃႈ?။

တွပ်ႇ-ပၼ်ႁႃၼႂ်းၼမ်ႉၶမ်းၼႆႉ ပိူင်လူင်မၼ်းတႄႉမီး ၸုမ်းႁူဝ်သိူဝ်လႄႈ ၸုမ်းပႃႇတီႇသိူဝ်ၽိူၵ်ႇ။ သွင်ဢၼ်ၼႆႉ မိူဝ်ႈပူၼ်ႉမႃး မိူဝ်ႈပႆႇထိုင်ပီ 2015 ၼၼ်ႉ ႁဝ်းၸုမ်းၸဝ်ႈႁႆႈၸဝ်ႈၼႃး၊ ၸုမ်းပႃႇတီႇသိူဝ်ၽိူၵ်ႇ ႁူဝ်သိူဝ်ၸိူဝ်းၼႆႉ ႁူမ်ႈႁွမ်းၵၼ်သေႁဵတ်းၵၢၼ်မႃး။ ၵူၺ်းမိူဝ်ႈလဵဝ်ၼႆႉ ႁဝ်းတေႁဵတ်းသင်ၼႆၵေႃႈ မၼ်းဢမ်ႇၽွမ်ႉသဵင်ပဵင်းပၢၵ်ႇၵၼ် မိူၼ်ၼင်ႇၵူႈပွၵ်ႈ။ ပိူင်တႅၵ်ႈမၼ်း ႁဝ်းတေႁဵတ်းၵၢၼ်ပိူဝ်ႈတႃႇတေၵႅတ်ႇၶႄ လွင်ႈၽေးၵူႈလွင်ႈလွင်ႈၼႂ်း တူင်ႇဝဵင်းႁဝ်း ၸဵမ်ၵႂႃႇၸိူဝ်းၼႆႉ ႁဝ်းဝႃႈမၼ်းဢမ်ႇမိူၼ်ၵူႈပီပူၼ်ႉမႃး၊ ဢမ်ႇမိူၼ်မိူဝ်ႈပီ 2015 ။

ပၼ်ႁႃမိူဝ်ႈလဵဝ် မိူၼ်ၼင်ႇမိူင်းၶႄႇတေၵၢႆႇၶူဝ်မႃး တီႈတၢင်းမိူင်းၼမ်ႉၶမ်းၸိူဝ်းၼႆႉ လွင်ႈဢၼ်ႁဝ်းတေ ၵႅတ်ႇၶႄႁႄႉၵင်ႈ၊ မိူၼ်ၼင်ႇဝႃႈတေၼႄၵၢင်ၸႂ် ၸဵမ်ၵႂႃႇၸိူဝ်းၼႆႉ ပေႃႈမႄႈၵူၼ်းမိူင်းႁဝ်းၼႆႉ ပေႃးဝႃႈၸုမ်း သိူဝ်ၽိူၵ်ႇဢွၼ်ႁူဝ်ႁဵတ်းၼႆၵေႃႈ ၸုမ်းႁူဝ်သိူဝ်ဢမ်ႇၶႂ်ႈမႃး၊ ပေႃးၸုမ်းႁူဝ်သိူဝ်ႁဵတ်းၼႆၵေႃႈ ၸုမ်းသိူဝ်ၽိူၵ်ႇ ဢမ်ႇၶႂ်ႈၵႂႃႇ။ လိူဝ်ၼၼ်ႉဢမ်ႇၵႃး ပၼ်ႁႃၼႆႉ ပေႃးဝႃႈမီးၶႅၵ်ႇလီပၢင်ၸႃႉၸဵမ်ၵႂႃႇၸိူဝ်းၼႆႉ ၵိၼ်ၶဝ်ႈဢမ်ႇႁူမ်ႈမူႇၵၼ်ႁိုဝ်ႉ၊ ၽိတ်ႈမွၵ်ႇၵၼ် ဢမ်ႇမႃးၶိုၼ်ႈႁွတ်ႈႁိုဝ်ႉ မၼ်းပဵၼ်ၸိူင်ႉၼၼ်မႃး။

ၵွပ်ႈပိူဝ်ႈၼၼ်လႄႈ ပၼ်ႁႃၸိူဝ်းၼႆႉ ပေႃးပဵၼ်သိုပ်ႇလၢမ်းတၢမ်းၵႂႃႇတိၵ်းတိၵ်း ပေႃႈမႄႈၵူၼ်းမိူင်းၼမ်ႉၶမ်းႁဝ်း တေမီးတၢင်းယၢပ်ႇၽိုတ်ႇ၊ တေသုမ်းပိူၼ်ႈထႅင်ႈ။ ၵွပ်ႈပိူဝ်ႈၼၼ်လႄႈ ၸင်ႇဝႃႈပၼ်ႁႃၸိူဝ်းၼႆႉ ႁဝ်းဢမ်ႇၶႂ်ႈႁႂ်ႈမၼ်းမီးယဝ်ႉ။

ထၢမ်- မီးယိူင်းဢၢၼ်းၶႂ်ႈႁႂ်ႈပဵၼ်ၸိူင်ႉႁိုဝ်ၶႃႈ?။

တွပ်ႇ-ႁဝ်းပဵၼ်တႆးၼင်ႇၵၼ်၊ ႁဝ်းပဵၼ်ၵူၼ်းၶိူဝ်းလဵဝ်ၵၼ်ၼႆႉ ပေႃးၵုမ်ႇတိုၵ်ႉပဵၼ်ၽႂ်ပဵၼ်မၼ်း၊ ပေႃးၵုမ်ႇဢဝ်ဢတ်ႉတ မၢၼ်ႇမႃႇၼသေ ႁဵတ်းၵၢၼ်ၸွမ်းၵၼ်ၵႂႃႇမိူဝ်းၼႃႈၼႆႉ တီႈဢၼ်ႁဝ်းမုင်ႈမွင်း၊ တီႈဢၼ်ႁဝ်းယိူင်းဢၢၼ်း ႁဝ်းၶႂ်ႈလႆႈလွင်ႈထၢင်ႇႁၢင်ႈၵတ်းယဵၼ်၊ လွင်ႈဢၼ်ႁဝ်းၶႂ်ႈလႆႈသုၼ်ႇလႆႈသုၼ်ႇပဵၼ် ၽဵင်ႇပဵင်းၵၼ်တင်းၸုမ်းၸၢဝ်းၶိူဝ်း တၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉ မၼ်းတေဢမ်ႇပဵၼ်မႃးလႆႈ။

ၵွပ်ႈပိူဝ်ႈၼၼ်လႄႈ ႁဝ်းလႆႈႁဵတ်းၵၢၼ်မိူင်းမႃး၊ လႆႈယူႇတႂ်ႈမိုဝ်းၽူႈၶဵၼ်မႃး၊ ယူႇတႂ်ႈမိုဝ်းလူင်ပွင်ၸိုင်ႈ ဢၼ်ႁဝ်းဢမ်ႇၶႂ်ႈမီး ဢမ်ႇမုင်ႈမွင်းၸိူဝ်းၼၼ်ႉ ယူႇတႂ်ႈမိုဝ်းၶဝ်မႃး ႁဝ်းၵေႃႈလႆႈၶၢမ်ႇၸၢၵ်ႇမၼ်းတင်းႁိုင်းယဝ်ႉ။ ၵွပ်ႈပိူဝ်ႈၼႆ လုၵ်ႉဢဝ်ၼႆႉၵႂႃႇမိူဝ်းၼႃႈ ပေႃးတေႁဵတ်းၵၢၼ်မိူင်းၵႂႃႇထႅင်ႈၼၼ်ႉ လွင်ႈၶဝ်ႈဢွၵ်ႇၵၼ်၊ လွင်ႈႁူမ်ႈၵၢၼ်ၵၼ်တႄႉတႄႉ၊ လွင်ႈတူဝ်ထူပ်း လွင်ႈထူပ်းမိုဝ်း ၽေႃႇၼမ်ႉၽေႃႇတူဝ်တႄႉတႄႉၼၼ်ႉ မၼ်းထုၵ်ႇလီႁဵတ်းၸိူင်ႉႁိုဝ်ၵႂႃႇထႅင်ႈၼႆ ဢၼ်ပဵၼ်ၽူႈယႂ်ႇၵူၼ်းလူင်ႁဝ်း ၼႂ်းၸုမ်း CSSU သမ်ႉၶႅၼ်းတေႁူႉ လိူဝ်သေၸဝ်ႈႁဝ်းၶဝ်၊ ႁူႉလိူဝ်သေပေႃႈမႄႈၵူၼ်းမိူင်း။ ၵွပ်ႈၼၼ် ၶႂ်ႈႁႂ်ႈၶဝ်ၸဝ်ႈႁဵတ်းၽေႃႇၼမ်ႉၽေႃႇတူဝ် တႄႉတႄႉ။ လွင်ႈဝႃႈႁဝ်းႁူမ်ႈသၢင်ႈ ႁူမ်ႈၵၼ်ႁဵတ်း ၽွမ်ႉၵၼ်ႁဵတ်း ၶဝ်ႈဢွၵ်ႇၵၼ်၊ ႁူမ်ႈၵၼ်ႁဵတ်းသၢင်ႈ ၸိူဝ်းၼႆႉ မၼ်းထုၵ်ႇလီၽေႃႇၼမ်ႉၽေႃႇတူဝ်မၼ်းတႄႉတႄႉယဝ်ႉ။ ဢမ်ႇၸႂ်ႈဝႃႈ တေလႆႈႁဵတ်းဢဝ်ၸိုဝ်ႈ ဢဝ်သဵင်မၼ်း၊ ႁဝ်းပဵၼ်ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး ႁဝ်းထုၵ်ႇလီႁဵတ်းပၼ်ႁႂ်ႈပေႃႈမႄႈၵူၼ်းမိူင်းတႆး ႁဝ်းတႄႉတႄႉယဝ်ႉ၊ ၸဝ်ႈႁဝ်းၶဝ်ႁၼ်ထိုင်ၸိူင်ႉၼၼ်သေ ၸင်ႇဝႃႈဢဝ်ၼႆႉၵႂႃႇမိူဝ်းၼႃႈ ၵူႈမူႇၵူႈၸုမ်း ၶႂ်ႈႁႂ်ႈပဵၼ်ဢၼ်လဵဝ်ၵၼ်။

ထၢမ်-ၵူၼ်းမႃးၶိုၼ်ႈပၢင်ၵုမ် လႆႈၸႂ်ၵၼ်မီးလၢႆၸုမ်း၊ ပဵၼ်ၸိူဝ်းလႂ်လၢႆလၢႆၶႃႈ?။

တွပ်ႇ-ဢၼ်ၵူၼ်းမႃးၶိုၼ်ႈႁွတ်ႈၶဝ်ႈႁူမ်ႈပၢင်ၵုမ် တီႈၵျွင်းၼၼ်ႉ ႁူဝ်ၵူၼ်းဢၼ်လူင်းလၢႆးမိုဝ်း ၸဵမ်ၵူၼ်းႁိူၼ်း ၵူၼ်းၵျွင်းမီး 97 ၵေႃႉ။ ၸဝ်ႈၶဝ်မီး 13 တူၼ်။ ၵူၼ်းၸိူဝ်းဢၼ်ၶိုၼ်ႈႁွတ်ႈလႄႈသင်၊ ၸဝ်ႈၶဝ်သင်ၶလႄႈသင် ပဵၼ်ၽူႈတၢင်တူဝ်ၵူႈမူႇၵူႈၸုမ်း။ ပဵၼ်ၸုမ်း ဢၼ်ႁဝ်းလႆႈ ၵႂႃႇၸွႆႈထႅမ်ပီႈၼွင်ႉၵူၼ်းမိူင်းၸိူဝ်းလႆႈထူပ်းၽေးသိုၵ်း မိူဝ်ႈပၢင်တိုၵ်းတီႈမိူင်းဝီး တီႈႁူဝ်ပၢင်ႇ ဢၼ်လႆႈၶၢမ်ႇဢွၵ်ႇဝၢၼ်ႈဢွၵ်ႇသၢၼ်ၼၼ်ႉ။ တင်းမူတ်းမီး 9 မူႇ 9 ၸုမ်း၊ ၸုမ်းၸဝ်ႈႁႆႈၸဝ်ႈၼႃး၊ ၸုမ်းၸဝ်ႈသင်ၶၼုမ်ႇ၊ ၸုမ်းသိူဝ်ၽိူၵ်ႇ၊ ၸုမ်းၼၢင်းယိင်း၊ ၸုမ်းၵူၼ်းၼုမ်ႇ၊ ၸုမ်းပေႃႈၸႄႈမႄႈဝဵင်း၊ ႁူဝ်ပဝ်ႈၼႃႈမၢၼ်ႈတႃသူၼ် ၸဵမ်ၸိူဝ်းၼႆႉ ႁဝ်းမီးဝႆႉ 9 ၸုမ်း။ ၸိူဝ်းတၢင်တူဝ်မႃး ၶိုၼ်ႈႁွတ်ႈၼႆႉ ပဵၼ်ၸိူဝ်းၼႆႉ။ ၸင်ႇဝႃႈ ၸုမ်းၸိူဝ်းႁဝ်းၼႆႉ ၸဵမ်မိူဝ်ႈႁဝ်းတႄႇႁႅၵ်ႈႁဵတ်းမႃးၼၼ်ႉ မၼ်းၵေႃႈတၢင်တူဝ်လႆႈပေႃႈမႄႈၵူၼ်းမိူင်းယဝ်ႉ။

ၵွပ်ႈပိူဝ်ႈၼၼ်လႄႈ မိူၼ်ၼင်ႇႁဝ်းတၢင်ႇၵႂႃႇၸိူဝ်းၼႆႉၵေႃႈ ႁႂ်ႈလႆႈႁူမ်ႈသဵင်ပဵင်းပၢၵ်ႇၵၼ်ယဝ်ႉ။ မိူဝ်ႈဝႃးၵေႃႈ ဢွၼ်ၵၼ်လႆႈၸႂ် ႁၼ်လီႁင်းၽႂ်ႇႁင်းမၼ်း ႁူမ်ႈႁွမ်းၸွမ်းၵၼ်၊ မိူၼ်ၼင်ႇဝႃႈ ႁႂ်ႈလႆႈပဵၼ်ၶေႃႈသဵင်လဵဝ်ၵၼ်ၼၼ်ႉယဝ်ႉ။