တေႃႇထိုင်ဝၼ်းတီႈ 15/8/2021 မိူဝ်ႈဝႃးၼႆႉ ၵူၼ်းမိူင်းတႃႈၶီႈလဵၵ်း တိတ်းၸပ်းတၢင်းပဵၼ်ၶူဝ်ႊဝိတ်ႉ 19 မီး 2000 ၵေႃႉ ၵူၼ်းလူႉတၢႆ မီး 30 ပၢႆ ၊ လုၵ်ႈဢွၼ်ႇလဵၵ်ႉ ဢၼ်ၸပ်းတၢင်းပဵၼ်ၶူဝ်ႊဝိတ်ႉ မီး 100 ပၢႆယဝ်ႉလႆႈႁူႉၼင်ႇၼႆ။

တီႈတႃႈၶီႈလဵၵ်းၼႆႉ လုၵ်ႈဢွၼ်ႇဢႃယုလဵၵ်ႉသုတ်းဢၼ်တိတ်းၸပ်းတၢင်းပဵၼ်ၶူဝ်ႊဝိတ်ႉ 19 ပဵၼ် လုၵ်ႈဢွၼ်ႇလႅင် ဢႃယု 8 ဝၼ်း။ ယူတ်းယႃတူဝ်တီႈႁူင်းယႃ တႃႈၶီႈလဵၵ်းတႄႇမိူဝ်ႈဝၼ်းတီႈ 2/8/2021 ။ ယၢမ်းလဵဝ်တႄႉၶႅၼ်းၸိုၼ်ႈယူႇလီယဝ်ႉလႄႈ လႆႈလူင်းႁူင်းယႃ ပွၵ်ႈၶိုၼ်းႁိူၼ်းယဝ်ႉ – မေႃယႃလုၵ်ႈဢွၼ်ႇ ၻွၵ်ႊတိူဝ်ႊၵျေႃႇၸႂႃႇမျိၼ်ႉ တႅမ်ႈတၢင်ႇဝႆႉတီႈ ၾဵတ်ႉသ်ပုၵ်ႉသုၼ်ႇတူဝ်မၼ်းၼင်ႇၼႆ။

“ၵူၼ်းပဵၼ်တၢင်းပဵၼ်ၼမ်ၼႃႇၶႃႈတီႈတႃႈၶီႈလဵၵ်းၼႆႉ။ ပေႃးဢမ်ႇပဵၼ်ၶူဝ်ႊဝိတ်ႉသမ်ႉ ပေႃးၶႂ်ႈဝႃႈဢမ်ႇၶိုတ်းၵၢပ်ႈၶိုၼ်းပၢၼ်ၼႆၼၼ်ႉၶႃႈၼေႈ။ လုၵ်ႈဢွၼ်ႇလဵၵ်ႉတေႃႇၵူၼ်းထဝ်ႈ ပဵၼ်ၵူႈသႅၼ်း။ ၵူၼ်းၵေႃႈ ၵႂႃႇမႃးႁႃၵိၼ်ၵၼ်ယူႇၸိူင်ႉၼၼ်။ ဢမ်ႇၸၢင်ႈႁဵတ်းႁိုဝ်ၶႃႈလူးၼေႃ ။  ၶူဝ်ႊဝိတ်ႉမႃးပွၵ်ႈၼႆႉ ဢမ်ႇမီးၽႂ်  ၵမ်ႉၸွႆႈၵၼ် ၼၼ်ႉယဝ်ႉၶႃႈ ။ ယွၼ်ႉပိူဝ်ႈငဝ်းလၢႆးၵၢၼ်မိူင်းၶႃႈၼႃႇၼေႃႈ လႆႈဢဝ်တူဝ်လွတ်ႈႁင်းၽႂ်မၼ်းၶႃႈဢေႃႈ။ ႁူင်းယႃၵေႃႈဢမ်ႇၶႂ်ႈၵႂႃႇၵၼ်။ ၵႂႃႇၵေႃႈ ယၢပ်ႇၽိုတ်ႇၶႃႈလူးၼေႃႈ ၵွပ်ႈၼႆ ၵမ်ႈၼမ်တႄႉယူႇႁိူၼ်းသေ ယူတ်းယႃယူႇႁင်းၽႂ်မၼ်းၵေႃႈမီးၼမ်ဢေႃႈ။  ” – ၼၢင်းယိင်း ၵူၼ်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈၼင်ႇၼႆ။

လိူဝ်ၼၼ်ႉၵူၼ်းဢၼ်ၵူတ်ႇထတ်းႁၼ်ၸိူဝ်ႉမႅင်းၶူဝ်ႊဝိတ်ႉသေလၵ်ႉပၢႆႈသေၵမ်းၵမ်းမီး၊ တေႃႇထိုင်ဝၼ်းမိူဝ်ႈၼႆႉ တီႈတႃႈၶီႈလဵၵ်း ၵူၼ်းပဵၼ်တၢင်းပဵၼ်ၶူဝ်ႊဝိတ်ႉ သေလၵ်ႉပၢႆႈ မီးၵႂႃႇ 10 ပၢႆယဝ်ႉလႆႈႁူႉၼင်ႇၼႆ။

ၾၢႆႇၼိုင်ႈ ၼႂ်းၶၢဝ်းတၢင်း ၼိုင်ႈဝူင်ႈ ပူၼ်ႉမႃးၼႆႉ တီႈတႃႈၶီႈလဵၵ်းမီး မႄႈမၢၼ်း ဢၼ်ပဵၼ်ၶူဝ်ႊဝိတ်ႉ မႃးၵိူတ်ႇလုၵ်ႈ တီႈႁူင်းယႃ တႃႇ 5 ၵေႃႉ။ ၵူၺ်းၵႃႈလုၵ်ႈဢွၼ်ႇၸိူဝ်းၶဝ်တႄႉ ဢမ်ႇမီးတၢင်းပဵၼ်ၶူဝ်ႊဝိတ်ႉၼင်ႇၵဝ်ႇ မေႃယႃၼၼ်ႉတႅမ်ႈတၢင်ႇဝႆႉပႃးၼင်ႇၼႆ။

 တေႃႇထိုင်ဝၼ်းမိူဝ်ႈၼႆႉ တီႈတႃႈၶီႈလဵၵ်း ဢၼ်လူႉတၢႆယွၼ်ႉတၢင်းပဵၼ်မီး 35 ၵေႃႉ၊ ဢၼ်လႆႈပၼ်ဢွၵ်ႊသီႊၵျိၼ်ႊဝႆႉ မီး 70 ၵေႃႉ၊ လႄႈ ဢၼ်ၶႅၼ်းၸိုၼ်ႈသေလူင်းႁူင်းယႃ ပွၵ်ႈၶိုၼ်းႁိူၼ်းမီး 1000 ပၢႆယဝ်ႉလႆႈႁူႉၼင်ႇၼႆ။