ၵူၼ်းၸိူဝ်းတိတ်းၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ဢမ်ႇၶႂ်ႈၵႂႃႇယူတ်းယႃတူဝ်တီႈႁူင်းယႃ၊ ဢမ်ႇၶႂ်ႈၵႂႃႇၶဝ်ႈသုၼ်ၵၵ်း တူဝ် Quarantine  Center ။

ၽွင်းတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းပွၵ်ႈၵမ်း 3 ၼႆႉ ၵူၼ်းပဵၼ်ၸိူဝ်းတိတ်းၸပ်း ၸိူဝ်ႉမႅင်း ၶူဝ်ႊဝိတ်ႉ 19 လၢႆၸႄႈဝဵင်း ဢမ်ႇၶႂ်ႈၵႂႃႇယူတ်းယႃတူဝ် တီႈႁူင်းယႃ၊ ဢမ်ႇၶႂ်ႈၵႂႃႇၶဝ်ႈႁူင်းသုၼ် ၵၵ်းတူဝ်၊ ၵူဝ်လႆႈယူႇ 14 ဝၼ်း၊ ၵူဝ်ယၢပ်ႇၽိုတ်ႇတႃႇ ယူႇတႃႇၵိၼ်၊ ၵူဝ်ဢမ်ႇတူၺ်းလူၵၼ်လႆႈ ၸိူဝ်းၼႆႉလႄႈ ဢမ်ႇယွမ်းပွႆႇ ပေႃႈမႄႈၵူၼ်းထဝ်ႈၵႂႃႇ ႁူင်းယႃသေ လွမ်လွမ် ယူႇႁိူၼ်း ယူတ်းယႃ ၵေႃႈမီးၼမ်။

ယိင်းလၢဝ် ၵူၼ်း မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ယူႇတီႈႁဝ်းႁၼ်ထိုင်တႄႉ တီႈႁူင်းယႃၵေႃႈ ၵူၼ်းၼမ် ပေႃးဢမ်ႇပဵၼ်ႁႅင်း ၵႂႃႇလႆႈမႃးလႆႈယူႇၼႆ ၶႂ်ႈယူႇတီႈႁိူၼ်းသေ ယူတ်းယႃႁင်းၵွႆးၵူၺ်းၶႃႈယဝ်ႉ”- ဝႃႈ ၼႆ။

မၢင်ဝဵင်းသမ်ႉ ၶူးမေႃယႃ ၸိူဝ်းၵတ်ႉၶႅၼ်ႇ ဢမ်ႇႁဵတ်းၸွမ်းၵႂၢမ်းသင်ႇ ၶွင်ႇသီႇသိုၵ်းမၢၼ်ႈ ယိုတ်းမိူင်း ႁဵတ်း CDM ၶဝ်ႈပႃးၼႂ်းၵၢၼ်တေႃႇသူႈလုၵ်ႉၽိုၼ်ႉဝႆႉလႄႈ ပေႃးၵႂႃႇ ႁူင်းယႃ ၵေႃႈ ၵူဝ်မူတ်းၶၢဝ်းယၢမ်းလၢႆလၢႆ လႄႈဢမ်ႇၵႂႃႇ ႁူင်းယႃ ၼႆ ၼၢင်းသႅင်လူႇ သီႇပေႃႉလၢတ်ႈၼင်ႇၼႆ။

ၾၢႆႇပၢႆးယူႇလီတႄႉ ႁၼ်ထိုင်ဝႃႈ ၵၢၼ်ယူတ်းယႃတူဝ်ႁင်းၵူၺ်းတီႈႁိူၼ်းၼႆႉ သင်ဢမ်ႇမီးပၼ်ႁႃ ဢမ်ႇပဵၼ်ႁႅင်းတႄႉ တေငၢႆႈ၊ တေၶႅၼ်းၶိုၼ်းယူႇ ပေႃးပဵၼ်ႁႅင်းတႄႉလီမႆႈၸႂ် ၸၢင်ႈယႃဢမ်ႇၶိုတ်းလႆႈ ဝႃႈၼႆ။

ၼၢင်းသီၼူၼ်း မေႃလုမ်းလႃး ၵူၼ်းပဵၼ် တီႈႁူင်းယႃ ၸႄႈဝဵင်းမိူင်းပၼ်ႇ လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈၼႆႉ ႁဝ်းၶႃႈ ၵေႃႈ ဢမ်ႇႁၼ်တၢင်းၽိတ်းၵူၼ်းမိူင်းၼင်ႇၵဝ်ႇ။ ၵူၼ်း ဢႃယု 65 ၶိုၼ်ႈၼိူဝ်၊ ၵူၼ်းဢၼ်မီးတၢင်းပဵၼ် တၢင်ႇဢၼ်တၢင်ႇၸိူဝ်းဝႆႉၼႂ်းတူဝ်၊ ၵူၼ်းၸိူဝ်း ႁႅင်းၵမ်ႉတူဝ်ဢေႇ ၸိူဝ်းၼႆႉ ဢမ်ႇထုၵ်ႇလီယူတ်းယႃႁင်းၵူၺ်းတီႈႁိူၼ်းၶႃႈ”-  ဝႃႈ ၼႆ။

ၸွမ်းၼင်ႇ ပိူင်ပၢႆးယူႇလီ ပိုၼ်ၽၢဝ်ႇ ပၼ်ၾၢင်ႉဝႆႉတႄႉ သင်ၸဝ်ႈၵဝ်ႇႁူႉဝႃႈ ၸပ်းၶူဝ်ႊဝိတ်ႉ 19 ၼႆ တေလႆႈၵၵ်းတူဝ်တႃႇ 14 ဝၼ်း။ တေလႆႈယူႇႁင်းၵူၺ်းၶေႃၶေႃ တီႈမီးလူမ်းၶဝ်ႈ လူမ်းဢွၵ်ႇလီ၊ တေဢမ်ႇလႆႈၸႂ်ႉၶူဝ်းၶွင်ႁူမ်ႈပိူၼ်ႈ၊ ၵႆႉလၢင်ႉမိုဝ်းပၼ်၊ သႂ်ႇပၼ်ၽႃႈတူမ်းသူပ်းၵူႈဝၼ်း၊ ၵိၼ်ပၼ်တၢင်းၵိၼ်ႁႂ်ႈတဵမ်ထူၼ်ႈ၊ လိုဝ်ႈႁိူဝ်ႉပၼ် ႁႂ်ႈပဵင်းပေႃးၵေႃႈၸၢင်ႈႁၢႆ။ ၵူၺ်းၵႃႈ ပေႃး ၸိူဝ်ႉမႅင်း တၢင်းပဵၼ်ၶဝ်ႈထိုင်ပွတ်ႇတႄႉ ၵႆႉယႃဢမ်ႇလႆႈ – ၵွပ်ႈၼၼ် ပေႃးၸပ်းတၢင်းပဵၼ် တၵ်းလႆႈ ဢုပ်ႇ ဢူဝ်းၵိူဝ်းၵုမ် တင်းၽူႈမီးတၢင်းႁူႉၾၢႆႇယူႇလီ။