ၾၢႆႇပၢႆးယူႇလီ ဝဵင်းလၢင်းၶိူဝ်း သမ်းယႃႁႄႉၵင်ႈတၢင်းပဵၼ်ပၼ် ၵူၼ်းမိူင်း ၸိူဝ်းဢႃယု 65 ၶိုၼ်ႈၼိူဝ် တႄႇ ဢဝ်လိူၼ်ဢေႃႊၵတ်ႊသ်ၼႆႉမႃး ဝႃႈၼႆ။
မိူဝ်ႈဝၼ်းတီႈ 1/8/2021 ၼႆႉ ယူႇတီႈၾၢႆႇပၢႆးယူႇလီ ၸႄႈဝဵင်းလၢင်းၶိူဝ်း ၸိုင်ႈတႆး ပွတ်းၸၢၼ်း တႄႇသမ်းယႃႁႄႉၵင်ႈ တၢင်းပဵၼ်ၶူဝ်ႊဝိတ်ႉ 19 ပၼ်ၵူၼ်းမိူင်း ၸိူဝ်းဢႃယုလႆႈ 65 ပီ ၶိုၼ်ႈၼိူဝ် တီႈႁူင်းယႃလူင် ၵူၼ်းမိူင်းလၢင်းၶိူဝ်း ၼႂ်းဝၼ်း ၼၼ်ႉ ၵူၼ်းၸိူဝ်းဢႃယု ဢမ်ႇတဵမ် 65 ပီ ၵေႃႈ ဢွၼ်ၵႂႃႇသမ်းလႄႈ ႁဵတ်းႁႂ်ႈၵူၼ်း ၶွၼ်ႈတုမ်ၵၼ်ၼမ် ၼႆယဝ်ႉ။
ၸၢႆးသိူဝ်ႁၢၼ် ၽူႈတူင်ႉၼိုင် ၼႂ်းတူင်ႇဝူင်းတႆး ၸႄႈဝဵင်းလၢင်းၶိူဝ်း လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်ပိုၼ်ၽၢဝ်ႇဝႆႉတႄႉ တေ သမ်းပၼ်သွင်ဝၼ်း ဝၼ်းတီႈ 1 တင်း 2 ၵူၺ်းၵႃႈ ၶဝ်သမ်းဝၼ်းလဵဝ်သေ ၵိုတ်းလိုဝ်းပႅတ်ႈ တီႈႁူင်းယႃလၢင်းၶိူဝ်း။ ထိုင်မႃး ဝၼ်းတီႈ 2 သမ်ႉ ၶဝ်ၵႂႃႇသမ်းပၼ် တၢင်းထုင်ႉဝၢၼ်ႈႁၢတ်ႇ ၼႃးၵူင်းၼၼ်ႉၶႃႈဢေႃႈ။ ပွင်ႇဝႃႈတႄႉ ၶဝ်တေဢိုတ်းတီႈႁူင်း ယႃၼႆသေ ၵႂႃႇသမ်းတီႈၼၼ်ႈႁိုဝ် ဢမ်ႇၼၼ် ယွၼ်ႉၵူၼ်းၼမ်လႄႈ ၵိုတ်းဝႆႉႁိုဝ် ဢမ်ႇႁူႉ တီႈႁူင်းယႃၼႆတႄႉ”- ဝႃႈၼႆ။
မိူဝ်ႈဝၼ်းတီႈ 1/8/2021 ၼၼ်ႉ ယိူင်းဢၢၼ်းဝႆႉ တႃႇသမ်းယႃပၼ် ၵူၼ်းထဝ်ႈ ဢႃယု 65 ၶိုၼ်ႈၼိူဝ်၊ ၵူၺ်းၵႃႈ ၼႂ်းဝၼ်း ၼၼ်ႉသမ်ႉ ၵူၼ်းၸိူဝ်းဢႃယု ပႆႇတဵမ် 65 ပီၵေႃႈ ဢွၼ်ၵၼ်ၵႂႃႇပႂ်ႉသမ်း ႁဵတ်းႁႂ်ႈၵူၼ်းၶွၼ်ႈၵၼ်ၼမ်။ ယွၼ်ႉၼၼ် လွင်ႈသမ်းယႃႁႄႉ ၵင်ႈၼႆႉ တၼ်းလႆႈသမ်း ၼႂ်းဝၼ်းတီႈ 1 ဝၼ်းလဵဝ်ၵူၺ်း လႆႈၵိုတ်းယင်ႉဝႆႉ ယဝ်ႉ ၵူၼ်းလၢင်းၶိူဝ်းၵေႃႉၼိုင်ႈလၢတ်ႈၼင်ႇၼႆ။
“တီႈလၢင်းၶိူဝ်းႁဝ်းၶႃႈၼႆႉ မိူင်းလဵၵ်ႉလဵၵ်ႉဢွၼ်ႇၵူၺ်း မီးၵူၼ်းတိတ်းၸပ်းတၢင်း ပဵၼ်ၵႂႃႇ 136 ၵေႃႉ ယဝ်ႉၼႆ လႆႈဝႃႈ ၼမ် တႄႉၶႃႈဢေႃႈ။ ဢၼ်ၼႆႉၵေႃႈလီၵူဝ်ၶႃႈ ၵူၺ်းၵႃႈ ပႆႇမီးၵူၼ်းတၢႆလႄႈ ၵူၼ်းမိူင်းႁဝ်းၼႆႉ ပႆႇၵူဝ်ႁိုဝ်ၵေႃႈ ဢမ်ႇႁူႉ။ ပေႃးဝႃႈ ပဵၼ်လႆႈ ႁဝ်းၶႃႈ ဢွၼ်ၵၼ်ယူႇတီႈႁိူၼ်းယေးၽႂ်မၼ်းသေ ၸူဝ်ႈတၢင်းပဵၼ်ၼႆႉ ပႆႇၶႅၼ်း ႁဝ်းၶႃႈ ယႃႇပေၵႂႃႇဢွၵ်ႇတၢင်းလႂ် ၶႆႈတိုၵ်းသူၼ်းၼင်ႇၼႆၶႃႈ”- ၸၢႆးသိူဝ်ႁၢၼ် သိုပ်ႇလၢတ်ႈၼႄၼင်ႇၼႆ။
တေႃႇထိုင် ဝၼ်းတီႈ 2/8/2021 ၼႆႉ ၵူၼ်းၸပ်းတၢင်းပဵၼ်တီႈဝဵင်းလၢင်းၶိူဝ်း မီး 136 ၵေႃႉ ။ သၢႆမၢႆၵူၼ်းတိတ်းၸပ်းတၢင်း ပဵၼ် ၼႂ်းၸႄႈတွၼ်ႈလၢင်းၶိူဝ်း မိူၼ်ၼင်ႇ ၵဵင်းတွင်း၊ မွၵ်ႇမႆႇ၊ မိူင်းၼၢႆး လႄႈ မိူင်းပၼ်ႇ ၸိူဝ်းၼႆႉတႄႉ တင်းမူတ်းမီးၵႂႃႇ 287 ၵေႃႉယဝ်ႉ ဝႃႈၼႆ။
ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တိူဝ်းၼမ်ၶိုၼ်ႈမႃး ၵူႈဝၼ်း လႄႈ ယၢမ်းလဵဝ် ၶွင်ႇသီႇသိုၵ်းမၢၼ်ႈ ႁၢင်ႈ ႁႅၼ်းတႃႇသမ်းပၼ်ၶဵမ် ယႃႈယႃႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ။ တင်ႈဢဝ်ဝၼ်းတီႈ 30/7/2021 တႄႇသမ်းပၼ်တီႈဝဵင်းယႂ်ႇဝဵင်းလူင် ၶႂ်ႈဝႃႈၵူႈဝဵင်း။ လႆႈႁူႉဝႃႈပဵၼ်ယႃႈယႃ Sinopharm ဢၼ်မိူင်းၶႄႇႁဵတ်းဢွၵ်ႇ။ သိုၵ်းမၢၼ်ႈသမ်း ယႃႈယႃႁႄႉၵင်ႈတၢင်းပဵၼ်ပၼ်ၵူၼ်းမိူင်းၼႆႉ ၵမ်းၼႆႉပဵၼ်ၵမ်းထူၼ်ႈ 2။ မိူဝ်ႈၵမ်းထူၼ်ႈၼိုင်ႈၼၼ်ႉ ၵူၼ်းမိူင်း တိုၵ်ႉသုၵ်ႉယုင်ႈၸွမ်းလွင်ႈ ၼႄၵၢင်ၸႂ်သၢၼ်ၶတ်းသိုၵ်းမၢၼ်ႈ၊ ၾၢႆႇၼိုင်ႈၵေႃႈ ဢမ်ႇယွမ်းႁပ်ႉ ဢမ်ႇယုမ်ႇယမ်ၼိူဝ် သိုၵ်းမၢၼ်ႈ ဢမ်ႇႁဵတ်းၸွမ်းၶေႃႈသင်ႇသိုၵ်းမၢၼ်ႈလႄႈ ၼွၵ်ႈလိူဝ်ၶႃႈႁၢပ်ႇၵၢၼ်ၶုၼ် ဢမ်ႇမီးၽႂ်ၵႂႃႇသမ်း ၊ ၾၢႆႇၼိုင်ႈၽွင်းၼၼ်ႉ တၢင်းပဵၼ်ၶူဝ်ႊဝိတ်ႉၵေႃႈ ပႆႇၶိုၼ်းၽႄႈ လၢမ်း မိူၼ်ယၢမ်းလဵဝ်။
