ၵူၼ်းတၢႆယွၼ်ႉတၢင်းပဵၼ်ၶူဝ်ႊဝိတ်ႉ 19 တီႈဝဵင်းမူႇၸေႊ ပုင်ႈၶိုၼ်ႈသုင် ဝၼ်းလဵဝ်တၢႆထိုင် 7 ၵေႃႉ ၵူၼ်းထဝ်ႈ၊ ၵူၼ်းမီးတၢင်းပဵၼ် ပႃးၸဵမ်ၵူၼ်းၼုမ်ႇ။
ၸုမ်း ၵရုၼႃႇ ၸွႆႈထႅမ်လွင်ႈၸဵပ်းမႆႈလူႉတၢႆ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ -“ ၵူၼ်းမီးတၢင်းပဵၼ်ဝႆႉၵေႃႈပႃး ၊ ၵူၼ်းဢႃယုတိုၵ်ႉလဵၵ်ႉၵေႃႈပႃး။ ၵူၼ်းပီးၵေႃႈပႃးဢေႃႈ။ ယၢမ်းလဵဝ်တၢင်းပဵၼ်လၢမ်းၽႄႈဝႆး၊ ၵွပ်ႈၼႆ ထုၵ်ႇလႆႈၾၢင်ႉလွင်ႈၵႂႃႇမႃး ၵၼ်ဢေႃႈ”- ဝႃႈၼႆ။
တီႈဝဵင်းမူႇၸေႊၼႆႉ ယၢမ်းလဵဝ် ၸႂ်ႉပိူင်ယူႇႁိူၼ်းၽႂ်မၼ်း Lockdown ပွၵ်ႉဝၢၼ်ႈ၊ ပၼ်ဢွၵ်ႇၼွၵ်ႈႁိူၼ်း သိုဝ်ႉၸၢႆႇၵၢတ်ႇ ၼိုင်ႈႁိူၼ်း ႞ ၵေႃႉၵူၺ်း ၼႆသေတႃႉ မၢင်ပွၵ်ႉယွမ်ႇယင်းတိုၵ်ႉမီးၵူၼ်းၵိုၼ်းၶွၼ်ႈယူႇ ။
ၵွပ်ႈၼႆ ၼင်ႇႁိုဝ်တေႁႄႉၵင်ႈတၢင်းပဵၼ်ၶူဝ်ႊဝိတ်ႉလႆႈသုတ်းၼၼ်ႉ ပေႃးဢမ်ႇမီးလွင်ႈယႂ်ႇႁႅင်းဢႃးလႃး ဢမ်ႇထုၵ်ႇဢွၵ်ႇႁိူၼ်းသေဢိတ်းယဝ်ႉ ဝႃႈၼႆ။
“ ယၢမ်းလဵဝ် ပၼ်ဝႂ်ဢွၵ်ႇႁိူၼ်း ၼိုင်ႈႁိူၼ်း ႞ ဝႂ်ၵူၺ်းယဝ်ႉၵေႃႈ ယင်းတိုၵ်ႉမီးၵူၼ်းၸပ်းလႄႈလူႉတၢႆၼမ်ယူႇ။ တၢင်းပဵၼ်ၼႆႉၸပ်းၵၼ်ဝႆးၼႃႇၶႃႈ ။ ၾၢင်ႉယူႇ ၾၢင်ႉၵိၼ်ၵၼ်ၽွင်ႈၶႃႈ။ ” ၸုမ်း ၵရုၼႃႇ ၸွႆႈထႅမ်လွင်ႈၸဵပ်းမႆႈလူႉတၢႆ မူႇၸေႊလၢတ်ႈ။
ၼွၵ်ႈလိူဝ်သေသုၵ်ႈလၢင်ႉမိုဝ်းၸွမ်းၵူႈၵမ်းယဝ်ႉ ပေႃးၵႂႃႇတၢင်းၼွၵ်ႈသေပွၵ်ႈမႃးႁိူၼ်းၶိုၼ်းၼၼ်ႉထုၵ်ႇလီ ပုတ်ႈလၢႆႈသၵ်ႉၶူဝ်းၸဝ်ႈၵဝ်ႇၵမ်းလဵဝ်။ ၶူဝ်းၶွင် ၶိူင်ႈၸႂ်ႉတိုဝ်း မိူၼ်ၼင်ႇ ၾူၼ်း(မိုဝ်းထိုဝ်) ၊ ဢႅပ်ႇငိုၼ်း၊ ဝႂ်ငိုၼ်း၊ ထူင်ပႃးၸိူဝ်းၼႆႉၵေႃႈပဵၼ်ဢၼ်တေႃႉၸိူဝ်ႉမႅင်းၶူဝ်ႊဝိတ်ႉ လႄႈ ပေႃးလုၵ်ႉတၢင်းၼွၵ်ႈမႃး ထုၵ်ႇလီဢဝ်ၼမ်ႉယႃၶႃႈၸိူဝ်ႉမႅင်း ၊ ဢႄလ်ႊၵူဝ်ႊႁေႃႊလ် ၸဵတ်ႉထူလၢင်ႉပၼ်လီလီ ၾၢႆႇပၢႆးယူႇလီ ပိုၼ်ၽၢဝ်ႇလၢတ်ႈၼေဝႆႉၼင်ႇၼႆ။
တီႈဝဵင်းမူႇၸေႊၼႆႉၵူၼ်းတိတ်းၸပ်းတၢင်းပဵၼ် မီးၸမ်ႁဵင်ယဝ်ႉသေ ၵူၼ်းတၢႆယွၼ်ႉတၢင်းပဵၼ်ၶူဝ်ႊဝိတ်ႉၵေႃႈ မီးထိုင် 30 ၵေႃႉယဝ်ႉ ။
