ယၢမ်းလဵဝ် ၼႂ်းၸႄႈတွၼ်ႈလၢင်းၶိူဝ်း မီးၵူၼ်းတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 ပုင်ႈၶိုၼ်ႈထိုင် 90 ပၢႆယဝ်ႉလႄႈ ၵူၼ်း မိူင်းၵူၼ်းၼုမ်ႇ လၢင်းၶိူဝ်း ႁူမ်ႈၵၼ် ႁႃငိုၼ်းၵွင်ၵၢင် ႁၢင်ႈႁႅၼ်း တႃႇ တင်ႈႁူင်းၸၢၵ်ႈဢွၵ်ႊ သီႊၵျိၼ်ႊ ၸွႆႈၵူၼ်းတိတ်းၸပ်းၶူဝ်ႊဝိတ်ႉ ။

ၼႂ်းၶၢဝ်းတၢင်း 4 – 5 ဝၼ်းမႃးၼႆႉ ၵူၼ်းတိတ်းၸပ်း ၸိူဝ်ႉမႅင်း ၶူဝ်ႊဝိတ်ႉ 19 ၼႂ်း ၸႄႈတွၼ်ႈလၢင်းၶိူဝ်း ပုင်ႈၶိုၼ်ႈဝႆးထိုင် 90 ပၢႆ ႁဵတ်းႁႂ်ႈၵူၼ်းမိူင်း တူၵ်းၸႂ်လိူဝ်ႁႅင်း၊ ၵူၼ်းၼုမ်ႇဢိၵ်ႇၸုမ်းတူင်ႉၼိုင်တူင်ႇဝူင်းၵူၼ်း ၼႂ်းတူင်ႇဝဵင်း လႆႈၽွတ်ႇႁဵတ်းၸုမ်း သေ ႁႃငိုၼ်းၵွင်ၵၢင်တႃႇပဵၼ်တင်ႈၸၢင်ႈဢွၵ်ႊသီႊၵျိၼ်ႊ ဢၼ်ဢမ်ႇမီးဢမ်ႇပဵၼ် တႃႇ ၵူၼ်းတိတ်းၸပ်းတၢင်းပဵၼ်ၶူဝ်ႊ ဝိတ်ႉ 19 ၼႂ်းၸႄႈတွၼ်ႈလၢင်းၶိူဝ်း ၼႆယဝ်ႉ။

ၼၢင်းသီၼူၼ်း မေႃယႃလုမ်းလႃး ၵူၼ်းပဵၼ် တီႈႁူင်းယႃ မိူင်းပၼ်ႇ လၢတ်ႈတီႈၽူႈတွႆႇ ႁွၵ်ႈဝႃႈ – “ႁဝ်းၶႃႈတိုၵ်ႉၶတ်းၸႂ်တႃႇ တေတင်ႈ ႁူင်း ၸၢၵ်ႈ ဢွၵ်ႊသီႊၵျိၼ်ႊ တီႈလၢင်းၶိူဝ်း ယွၼ်ႉဝႃႈလၢင်းၶိူဝ်းၼႆႉပဵၼ်ဝဵင်းၸႄႈတွၼ်ႈ ။ ယဝ်ႉၵေႃႈ မၼ်းတေၸမ် မွၵ်ႇမႆႇ မိူင်းပၼ်ႇလႄႈ မိူင်းၼၢႆးၸိူဝ်း ၼႆႉ။ ၶိူင်ႈၸၢၵ်ႈၼၼ်ႉ မၼ်းယူႇတီႈႁႅင်းငိုၼ်းႁဝ်းၶႃႈသေ ႁဝ်းၶႃႈတေသိုဝ်ႉၶိူင်ႈမဵဝ်းႁိုဝ် တေသိုဝ်ႉၶိူင်ႈဢမ်ႇလူဝ်ႇတင်ႈတီႈ လဵဝ်ႁႃႉ ဢမ်ႇၼၼ် ၶိူင်ႈၸၢၵ်ႈဢၼ်ၶၢႆႉတီႈလႆႈႁႃႉၼႆ ပႂ်ႉတူၺ်းႁႅင်းငိုၼ်းႁဝ်းဝႆႉယူႇဢေႃႈ။   ”- ဝႃႈၼႆ။

ယၢမ်းလဵဝ် ယူႇတီႈၾၢႆႇပၢႆးယူႇလီလႄႈ ၵူၼ်းၼုမ်ႇၵူၼ်းမိူင်းလၢင်းၶိူဝ်း ဢွၼ်ၵၼ်ၸွႆႈၵၼ်ႁႃငိုၼ်းၵွင်ၵၢင် ယူႇလူၺ်ႈလၢႆးၽႂ်မၼ်း။ ၵမ်ႈၽွင်ႈၵေႃႈ သိုပ်ႇၾူၼ်းႁႃၵၼ်သေ ႁႃငိုၼ်း၊ ၵမ်ႈၽွင်ႈၵေႃႈ ပိုၼ်ၽၢဝ်ႇၼႂ်းသူဝ်ႊသျႄလ်မီႊတီႊယႃႊ ၊ ၼႃႈၾဵတ်ႉသ်ပုၵ်ႉၽႂ်မၼ်းသေႁႃၵေႃႈမီး။

သြႃႇမ ၼၢင်းသီၼူၼ်း သိုပ်ႇလၢတ်ႈဝႃႈ – “  မွၵ်ႇမႆႇၵေႃႈ ႁဝ်းၶႃႈၵဵပ်းငိုၼ်းတၢင်းလူႇ လၢင်းၶိူဝ်းၵေႃႈ ႁဝ်းၶႃႈၵဵပ်း   မိူင်းပၼ်ႇၵေႃႈ ႁဝ်းၶႃႈ ၵဵပ်းငိုၼ်းဢေႃႈ။  ယၢမ်းလဵဝ် မီးဝႆႉ 200 သႅၼ်ပၢႆယဝ်ႉ ႁဝ်းၶႃႈ ဢၢၼ်းဝႆႉ မွၵ်ႈ 1000 သႅၼ်ပျႃးပၢႆဢေႃႈ။ ၸၢၵ်ႈ ၼၼ်ႉ ၵေႃႈ ၵႃႈၶၼ်မၼ်း တေမီးမွၵ်ႈၵႃႈၼၼ်ႉၶႃႈ။  ၸဝ်ႈၶူးလူင်ၶဝ်ၸဝ်ႈၵေႃႈ ပၼ်ဢေႃးဝႃႇတ ႁဝ်းဝႆႉႁႄ ႁဝ်း ၶႃႈၵေႃႈ ၽွတ်ႈဝႆႉ ၵေႃႇမတီႇ မၼ်းဝႆႉယဝ်ႉၶႃႈ။  တေႃႇထိုင်မိူဝ်ႈဝႃး ႁဝ်းၶႃ လႆႈငိုၼ်းဝႆႉ 200 ပၢႆ ၵူၼ်းမႃးလူႇ မီး 226 ၵေႃႉယဝ်ႉ။  ႁဝ်းၶႃႈသိုပ်ႇႁပ်ႉငိုၼ်းတၢင်းလူႇထႅင်ႈယူႇၶႃႈဢေႃႈ။ ”- ဝႃႈၼႆ။

သြႃႇမ ၼၢင်းသီၼူၼ်း  ပဵၼ်မေႃယႃ လုမ်းလႃး ၵူၼ်းပဵၼ် တီႈႁူင်းယႃ မိူင်းပၼ်ႇၵူၺ်းဢမ်ႇၵႃး ပဵၼ်မေႃယႃလုမ်းလႃးတူၺ်းလူပၢႆယူႇလီၵူၼ်းဝၢၼ်ႈၵူၼ်းသူၼ် တီႈၸုမ်း ၵေႃၽႄၼမ်ႉၶူင်း ပရႁိတ ဝဵင်းမိူင်းပၼ်ႇ   ပဵၼ်ပႃးၽူႈၶဝ်ႈၸုမ်းၾၢႆႇ တူင်ႉၼိုင်ႁႃငိုၼ်းၵွင်ၵၢင်ၵေႃႇသၢင်ႈႁူင်းႁဵတ်းဢွၵ်ႊသီႊၵျိၼ်ႊ၊   ပိုၼ်ၽၢဝ်ႇႁႂ်ႈၸဝ်ႈ ၽူႈမီးၼမ်ႉၸႂ် ၸိူဝ်းယူႇၼွၵ်ႈမိူင်းၼႂ်းမိူင်း လႆႈၶဝ်ႈပႃးၸွႆႈထႅမ်ၼႂ်းၵၢၼ်ၵေႃႇသၢင်ႈ။  မၼ်းၼၢင်းလၢတ်ႈဝႃႈ ဢၼ်တူင်ႉၼိုင်ႁဵတ်းသၢင်ႈတႃႇ ၵေႃႇသၢင်ႈႁူင်းဢွၵ်ႊသီႊၵျိၼ်ႊယူႇယၢမ်းလဵဝ်ၼႆႉ ပဵၼ်ႁႅင်းၵူၼ်းမိူင်းၽၵ်းၵႃႇ ၼႂ်းပိုၼ်ႉတီႈလႄႈတင်း သင်ၶၸဝ်ႈၵူၺ်း။ ၾၢႆႇတၢင်းၸုမ်းၽွင်းငမ်းမိူင်းတႄႉ ဢမ်ႇပႃး ဝႃႈၼႆ။

“သင်ဝႃႈ ဢမ်ႇမီးဢွၵ်ႊသီႊၵျိၼ်ႊၸိုင် ပေႃးမီးဝႆႉယေႃးၵႃႇတၢင်ႇဢၼ်သေ သမ်ႉမႃးၸပ်းတၢင်းပဵၼ်ၶူဝ်ႊဝိတ်ႉ ၸိုင်    မၼ်းၸၢင်ႈလူႉႁၢႆတၢႆဢေႃႈ။ ယွၼ့်ၼႆ ၶႃႈႁဝ်းၶႂ်ႈလၢတ်ႈၼႆတႄႉ ယႃႇႁႂ်ႈလႆႈၸပ်းတၢင်းပဵၼ် ၼႆႉတႄႉ လီသေပိူၼ်ႈ ယဝ်ႉၶႃႈ။ ပိူၼ်ႈဝႃႈ မၼ်းၽႄႈႁႅင်းၼႃႇယဝ့် ၸပ်းႁႅင်းၼႃႇယဝ့်ၼႆသေၵေႃႈယဝ့် ႁဝ်းၶႃႈ လူဝ်ႇၾၢင်ႉတူဝ်၊ ၾၢင်ႉၵႂႃႇပႆ၊ ၾၢင်ႉတူၺ်းပၢႆးယူႇလီႁဝ်း၊ ႁဝ်းၶႃႈ လူဝ်ႇလႆႈႁၢင်ႈႁႅၼ်းဝႆ့ၸိူင့်ႁိုဝ် ၵႅတ်ႇၶႄဝႆ့ၸိူင့်ႁိုဝ်ၼႆၵေႃႈ ၸွမ်းၼင်ႇဢၼ်ၾၢႆႇ ပၢႆးယူႇလီလၢတ်ႈဝႆႉ ၼၼ့် လူဝ်ႇလဵပ်ႈႁဵၼ်းသေၵႅတ်ႇၶႄႁႄႉၵင်ႈဝႆႉၶႃႈဢေႃႈ။ သင်ဝႃႈပဵၼ်မႃးၼႆၵေႃႈ ယႃႇပေႁႂ်ႈၸႂ်လူႉ (ၸႂ်တူၵ်း) ။ ၵူၼ်းၸိူဝ်းၸပ်းတၢင်းပဵၼ်သေ ယူတ်းယႃၶႅၼ်းၸိုၼ်ႈမႃးၶိုၼ်းၼၼ်ႉၵေႃႈ ၶႅၼ်းတေႃႈ ႁႂ်ႈမေႃၶိုၼ်းၶူၼ်ႉၶႆႈ သပ်းလႅင်းၼေပၼ်ၵူၼ်းၼႂ်းတူင်ႇဝူင်းၸဝ်ႈၵဝ်ႇသေ ထုၵ်ႇလီပၼ်ၾၢင်ႉၵၼ် ယူႇသဝ်းၵိၼ်သၢင်ႈၵႂႃႇယူႇၶႃႈဢေႃႈ။  ”-  ၼၢင်းသီၼူၼ်း မေႃလုမ်းလႃး သိုပ်ႇလၢတ်ႈၼႄၼင်ႇၼႆ။

သင်ဝႃႈ တီႈလၢင်းၶိူဝ်း မီးႁူင်းၸၢၵ်ႈ ဢွၵ်ႊသီႊၵျိၼ်ႊၸိုင် တေၵႄႈလိတ်ႈလႆႈပၼ်ႁႃ  လွင်ႈႁႃဢွၵ်ႊသီႊၵျိၼ်ႊယၢပ်ႇ တွၼ်ႈတႃႇၾၢႆႇပၢႆးယူႇလီလၢႆလၢႆၸႄႈဝဵင်း ဢၼ်မီးၼႂ်း ၸႄႈတွၼ်ႈလၢင်းၶိူဝ်း လႆႈႁူႉ ၼင်ႇၼႆ။  

ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 ၊ ဢမ်ႇဝႃႈလဵၵ်ႉယႂ်ႇၼုမ်ႇထဝ်ႈ၊ သင်ဝႃႈၸိူဝ်ႉမႅင်းလူင်း ထိုင်ပွတ်ႇၸိုင် တေ ထူၺ်ႈၸႂ်ယၢပ်ႇ၊ ပေႃးဢွၵ်ႊသီႊၵျိၼ်ႊၼႂ်းတူဝ်လူတ်းယွမ်းလူင်းသေ ဢမ်ႇလႆႈသႂ်ႇ ဢွၵ်ႊသီႊၵျိၼ်ႊၸွႆႈလူမ်းထူၺ်ႈၸႂ် ၸိုင်ႈ ထိုင်ၶၵ်ႉတွၼ်ႈလူႉတၢႆ။

ၵွပ်ႈၼၼ်လႄႈ ၵူၼ်းတိတ်းၸပ်း တၢင်းပဵၼ်ၶူဝ်ႊဝိတ်ႉ 19 လူႉတၢႆၼမ်မႃးၵူႈမိုဝ်ႉၵူႈဝၼ်း။ မိူဝ်ႈၼႆႉၼႂ်းမိူင်းတႆးၵူၼ်း တိတ်းၸပ်း မီးထိုင် 8,000 ပၢႆ၊ လူႉတၢႆတင်းမူတ်းဢမ်ႇယွမ်း 200 ၊ ဝဵင်းလႃႈသဵဝ်ႈဝဵင်းလဵဝ်၊ ပႃႇႁဵဝ်ႈၵျႃႇ ၵၢၼ်ႇတီႈလဵဝ်ၵူၺ်း ၼႂ်းၶၢဝ်း တၢင်း ၼိုင်ႈလိူၼ်ၼႆႉ လႆႈၽဝ်ၶၢပ်ႈတူဝ်ၵူၼ်းတၢႆယွၼ်ႉၶူဝ်ႊဝိတ်ႉ 100 ပၢႆယဝ်ႉ Covid Operation Team Lashio ပိုၼ်ၽၢဝ်ႇဝႆႉၼင်ႇၼႆ။

တီႈဢၼ်ႁူဝ်ၵူၼ်းၼမ်မိူၼ်ၼင်ႇ ဝဵင်းလူင်တႃႈၵုင်ႈ  ၼႂ်း 2-3 ဝၼ်းမႃးၼႆႉၵူၼ်းတၢႆယွၼ်ႉၶူဝ်ႊဝိတ်ႉမီး 1,500 ထိုင် 2,000  ၵူႈဝၼ်း ၼႆယဝ်ႉ။

မိူၼ်ၼင်ႇ ၵူၼ်းၼုမ်ႇလၢင်းၶိူဝ်းတူင်ႉၼိုင်တႃႇမီးႁူင်းၸၢၵ်ႈဢွၵ်ႊသီႊၵျိၼ်ႊယူႇယၢမ်းလဵဝ်ၼႆႉၼၼ်ႉ လၢႆလၢႆဝဵင်းၼႂ်းၸိုင်ႈတႆး ၵေႃႈ မီးၵူၼ်းၸပ်းတၢင်းပဵၼ်ၶူဝ်ႊဝိတ်ႉ ၼမ်ၶိုၼ်ႈမႃးၵူႈဝၼ်းလႄႈ  ဢွၼ်ၵၼ်ၶတ်းၸႂ်တႃႇမီးႁူင်းၸၢၵ်ႈဢွၵ်ႊသီႊၵျိၼ်ႊ ယူႇႁင်းၽႂ်မၼ်း။