ဝဵင်းၼမ်ႉၶမ်း ၵူတ်ႇထတ်း ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 တင်းမူတ်း 200 ပၢႆ လူႉတၢႆ 10 ပၢႆ။
မိူဝ်ႈဝႃး ဝၼ်းတီႈ 9/7/2021 ၼႂ်းၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆး ပွတ်းႁွင်ႇ မီးၵူၼ်းလူႉတၢႆ ယွၼ်ႉတၢင်း ပဵၼ်ၶူဝ်ႊဝိတ်ႉ 19 ထႅင်ႈ 2 ၵေႃႉ ႁူမ်ႈၵၼ်တင်းမူတ်း ၵူၼ်းလူႉတၢႆၵႂႃႇယဝ်ႉ 10 ပၢႆ လိူဝ်ၼၼ်ႉ တိတ်းၸပ်းၸိူဝ်ႉမႅင်းၶူဝ်ႊ ဝိတ်ႉ 19 သမ်ႉ မီးၵႂႃႇ 204 ၵေႃႉယဝ်ႉ။
ၵူၼ်းၼုမ်ႇ ၼမ်ႉၶမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃးၼႆႉ တီႈၼမ်ႉၶမ်း မီးၵူၼ်းလူႉတၢႆထႅင်ႈ 2 ၵေႃႉ။ ၵၢင် ၼႂ် ၵေႃႉၼိုင်ႈလႄႈ ၵၢင်ၶိုၼ်း မွၵ်ႈ 11 မူင်းပၢႆ လူႉတၢႆထႅင်ႈၵေႃႉၼိုင်ႈ။ လႆႈပူၼ်ႉၶၢပ်ႈတူဝ်တၢႆ မိူဝ်ႈဝႃး ၵမ်းလဵဝ်ၶႃႈ။ ၼႂ်း ၸႄႈဝဵင်းၼမ်ႉၶမ်းၼႆႉ မီး 10 ပၢႆယဝ်ႉ ဢၼ်ၵူၼ်းတၢႆယွၼ်ႉတၢင်းပဵၼ်ၶူဝ်ႊဝိတ်ႉ 19 ၼႆႉ။ တေႃႇထိုင် မိူဝ်ႈဝႃး သမ်ႉ ၵူၼ်းတိတ်းၸပ်း မီးၵႂႃႇ 204 ၵေႃႉ”- ဝႃႈၼႆ။
ယၢမ်းလဵဝ် ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ၸိူဝ်းၼႆႉ လႆႈသူင်ႇယူတ်းယႃတူဝ်ဝႆႉတီႈ ႁူင်းယႃလူင် ၸႄႈ ဝဵင်းၼမ်ႉၶမ်း။ ၸိူဝ်းၶႅၼ်းႁၢႆသေ လူင်းႁူင်းယႃယဝ်ႉၵေႃႈ မီးၵမ်ႈၽွင်ႈ ဝႃႈၼႆ။
“ၼႂ်းၵူၼ်းပဵၼ်ၸိူဝ်းၼၼ်ႉ သမ်ႉပႃးဢူၺ်းၵေႃႉၶႃႈဝႆႉၽွင်ႈ ၶဝ်လၢတ်ႈၼႄမႃးတႄႉ ၵမ်ႈၼမ် တေပဵၼ်တွင်ႉၸဵပ်း ႁူဝ်ၶႆႈ ႁူဝ်မဝ်း ႁိူဝ်ႉမွႆႈ ထူၺ်ႈၸႂ်ၵပ်ႉ ၸိူဝ်းၼႆႉၶႃႈ”- ၵူၼ်းၼုမ်ႇ ၼမ်ႉၶမ်း သိုပ်ႇလၢတ်ႈၼႄထႅင်ႈၼင်ႇ ၼႆ။
ၼႂ်းၸႄႈဝဵင်းၼမ်ႉၶမ်း ယၢမ်းလဵဝ် ၸွမ်းၵၢတ်ႇလူင် ၼႂ်းၵၢင်ဝဵင်း ၸွမ်းႁၢၼ်ႉၶၢႆၶူဝ်းၵုၼ်ႇ/ ၶွင်ၵိၼ်ယႅမ်ႉ ၸိူဝ်းၼႆႉ ပိၵ်ႉ ဢိုတ်းၵၼ်ဝႆႉ ၵမ်ႈၼမ်။ ၾၢႆႇၽွင်းငမ်းဢမ်ႇပိုၼ်ၽၢဝ်ႇႁႂ်ႈပိၵ်ႉဢိုတ်းလွၵ်ႉတၢဝ်းဝဵင်းသေတႃႉ ၵူၼ်းမိူင်းပိုၼ်ႉတီႈ ၵမ်ႈၼမ် ဢဝ်ၸႂ်ႁူႉသေ ဢွၼ်ၵၼ်ယူႇၼႂ်းႁိူၼ်းယေးၽႂ်မၼ်း ဢမ်ႇဢွၵ်ႇၼွၵ်ႈႁိူၼ်းယေး ၼႆယဝ်ႉ။
ၽူႈတူင့်ၼိုင်တူင်ႇဝူင်းၵူၼ်း ၼႂ်းဝဵင်းၼမ့်ၶမ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “Lockdown ဝၢၼ်ႈၸိူဝ်းၼႆ့ၼမ်ဢိူဝ်ႈ ၼႂ်းဝဵင်းၼႆ့ ၸင်ႇႁႃမီးပွၵ့်ၼိုင်ႈသွင်ပွၵ့် ၵူၺ်း။ ၵူၺ်းၵႃႈ ၵူၼ်းသမ့်ပေႃးဢမ်ႇၵႂႃႇမႃး ၵေႃႈမိူၼ် Lockdown ဝႆ့ယဝ့်ၼင်ႇၵဝ်ႇ။ ၵူၺ်းၵႃႈမၢင်ၵေႃ့သမ့်တိုဝ်ဝႆ့ဢိတ်းဢိတ်း ၵႂႃႇၵႂႃႇမႃးမႃးၵေႃႈမီးယူႇ ပဵၼ်ဝႆ့ၸိူင့်ၼႆၶႃႈၼေႈ။ ပေႃးၶႂ်ႈႁႂ်ႈၶူဝ်ႊဝိတ်ႉ ႁၢႆတႄႉတႄႉ လူဝ်ႇဢွၼ်ၵၼ်ယူႇႁိူၼ်းလွၵ်ႉတၢဝ်ႊဝဵင်းၶႃႈဢေႃႈ ” ဝႃႈၼႆ။
ဝၢႆးသေ ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ယိုတ်းဢႃႇၼႃႇ ၸိုင်ႈမိူင်းမႃး မိူဝ်ႈဝၼ်းတီႈ 1/2/2021 ၼၼ်ႉသေ တေႃႇထိုင်မႃး ၼႂ်း လိူၼ်ၵျုၼ်ႊမႃးၼႆႉ တၢင်းပဵၼ်ၶူဝ်ႊဝိတ်ႉ 19 ၼႂ်းမိူင်းတႆး ၽႄႈလၢမ်ႈၶိုၼ်ႈမႃးႁၢဝ်ႈႁႅင်း ၵူၼ်းမိူင်းတိတ်းၸပ်း ၸိူဝ်ႉမႅင်း ၶူဝ်ႊဝိတ်ႉ 19 ၼႆႉ ဢမ်ႇယွမ်းႁဵင်ယဝ်ႉ လူႉတၢႆၼပ်ႉႁူဝ်ပၢၵ်ႇ။ ယွၼ်ႉဢမ်ႇၵုမ်းၵမ် ၵႅတ်ႇၵင်ႈႁႄႉၵင်ႈပၼ်ၵူၼ်းမိူင်းလႆႈ ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၸႄႈဝဵင်းမူႇၸေႊ ၵေႃႉ ၼိုင်ႈလၢတ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ