ၸဝ်ႈပၢႆးမွၼ်းတႆး ၽူႈၸတ်းၸိူင်း/ ၵုမ်းၸိူင်း ၸဝ်ႈပေႉ လႆႈလူႉသဵင်ႈၵႂႃႇ ယွၼ်ႉတၢင်းပဵၼ်ၵူၼ်းထဝ်ႈ ၽွင်းဢႃယု မွၵ်ႈ 67 ပီ  ။

မိူဝ်ႈၼႆႉ ဝၼ်းတီႈ 7/7/2021 ယၢမ်းၵၢင်ၼႂ်ၸဝ်ႉ  ဢၼ်ၵူၼ်းၵမ်ႈၼမ် တေႁူႉၸၵ်းၵၼ်ဝႃႈ ၸဝ်ႈပေႉ ၽူႈ ၸတ်းၸိူင်း/ ၵုမ်းၸိူင်း ၸဝ်ႈပၢႆးမွၼ်းတႆး ၸိုဝ်ႈသဵင်ယႂ်ႇ ၵေႃႉၼိုင်ႈ လႆႈလူႉသဵင်ႈၵႂႃႇ ယွၼ်ႉတၢင်းပဵၼ်ၵူၼ်းထဝ်ႈ တီႈႁိူၼ်း ယေး မၼ်းၸၢႆး ပွၵ်ႉ 5 ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၼႆယဝ်ႉ။

လုၵ်ႈၼွင်ႉတပေး  ၸဝ်ႈပေႉ ၵေႃႉၼိုင်ႈ တီႈလႃႈသဵဝ်ႈ လၢတ်ႈတီႈၽူႈတွႆႇ ႁွၵ်ႈဝႃႈ – “ၸႂ်ႈၶႃႈဢေႃႈ ၸဝ်ႈပေႉ လႆႈလူႉ သဵင်ႈၵႂႃႇယဝ်ႉၶႃႈ။ မိူဝ်ႈဢွၼ်တၢင်း လၢႆဝၼ်းၼၼ်ႉ မၼ်းၸဝ်ႈၼၢဝ်သေ ႁၢႆၶႅၼ်းၸိူင်ႉၼႆ ယဝ်ႉၵေႃႈ မၼ်းၸဝ်ႈၵႂႃႇၸွႆႈပွႆး ပၢင်ၶႅၵ်ႇ ၼႂ်းပွၵ်ႉၶဝ်ၼၼ်ႉသေ ပွၵ်ႈမႃးမႆႈၼႆသေ မႃးဢၢပ်ႇၼမ်ႉ။ ဢၢပ်ႇၼမ်ႉယဝ်ႉၵေႃႈ သမ်ႉၶူပ်းၶူပ်းၶိုၼ်ႈၶိုၼ်ႈ။ မႄႈပႃႈသမ်ႉ ၶုတ်ႇသႃႈပၼ် ။ ၵမ်းၼႆႉ ဢဝ်ပဵၼ်ၸႂ်ၵပ်ႉမႃးသေလႄႈ လုၵ်ႈလၢင်းဢဝ်ၵႂႃႇႁူင်းယႃ။  ႁူင်းယႃသမ်ႉ ဢမ်ႇႁပ်ႉ ၵူဝ်တိတ်းၸပ်း တၢင်း ပဵၼ်တီႈႁူင်းယႃၼႆသေ ပၼ်ယႃမႃးၵိၼ်တီႈႁိူၼ်းၶိုၼ်း။ ဢဝ်ဢွၵ်ႊသီႊၵျိၼ်ႊမႃးသႂ်ႇတီႈႁိူၼ်း။ ႁဵတ်းၼၼ်သေ မွၵ်ႈဝၼ်း သွင်ဝၼ်းၼႆႉ ႁၢႆယဝ်ႉ ဢမ်ႇသႂ်ႇၵေႃႈလႆႈယဝ်ႉၼႆသေ ဢဝ်ဢွၵ်ႊသီႊၵျိၼ်ႊဢွၵ်ႇပႅတ်ႈ ။   ႁိူဝ်ႇမိူဝ်ႈၼႆႉ ၵၢင်ၼႂ် မွၵ်ႈ 1 မူင်း ဢဝ်ၸႂ်ၵပ်ႉ ထူၺ်ႈၸႂ်ဢမ်ႇလႆႈသေ လႆႈလူႉသဵင်ႈၵႂႃႇ ဢေႃႈ”- ဝႃႈၼႆ။

ယၢမ်းလဵဝ်တီႈဝဵင်းလႃႈသဵဝ်ႈ သမ်ႉပဵၼ်ၢၶၢဝ်းၶူဝ်ႊဝိတ်ႉ ၽႄႈလၢမ်းႁၢႆႉၸႃႉလႄႈ တႃႇႁႄႉၵင်ႈတၢင်းပဵၼ်ၶူဝ်ႊဝိတ်ႉၼၼ်ႉ ၶၢပ်ႈတူဝ်ၸဝ်ႈပေႉၵေႃႈ  ၸုမ်းၸွႆႈထႅမ်တူင်ႇဝူင်းၵူၼ်း လႄႈလုၵ်ႈၼွင်ႉပွင်ႈပၢႆ ဢဝ်ၵႂႃႇၽဝ်ပၼ်ၼႂ်ၼႆႉၵမ်းလဵဝ် ၊ တီႈႁိူၼ်းမၼ်းၸဝ်ႈၵေႃႈ ၸုမ်းၸွႆႈထႅမ်မႃးသိတ်းဝႆႉယႃႈယႃၶႃႈၸိူဝ်ႉမႅင်းသေ ႁၢမ်ႈၵူၼ်းၶဝ်ႈဢွၵ်ႇဝႆႉၸူဝ်ႈၶၢဝ်း – လုၵ်ႈၼွင်ႉၸမ်ၸႂ်ၸဝ်ႈပေႉၵေႃႈၼိုင်ႈလၢတ်ႈၽူႈတွႆႇႁွၵ်ႈၼင်ႇၼႆ။

ၼၢင်းမွၵ်ႇၵွၼ် ၽူႈႁွင်ႉၽဵင်းၵႂၢမ်းတႆး ၸိုဝ်ႈသဵင်ယႂ်ႇ  ဢၼ်ပဵၼ်လုၵ်ႈၼွင်ႉပွင်ႈပၢႆ ၸဝ်ႈပေႉၵေႃႈ လၢတ်ႈ တီႈၽူႈတွႆႇႁွၵ်ႈဝႃႈ – “သြႃႇႁဝ်းၶႃႈ ဢမ်ႇယူႇလီ ၼၢဝ်မႃးၼႆႉတေမီးမွၵ်ႈ ၶၢဝ်းတၢင်း 10 ဝၼ်းပၢႆယဝ်ႉ ႁၢႆသေ ၶႅၼ်း ၸိူင်ႉၼႆ။ တၢင်းပဵၼ်ၶူဝ်ႊဝိတ်ႉ 19 တႄႉ ဢမ်ႇၸႂ်ႈၶႃႈ။ တေလႆႈဝႃႈ ပဵၼ်တၢင်းပဵၼ်ၵူၼ်းထဝ်ႈၵူၺ်းၶႃႈ။ ၶႃႈတင်း ၸဝ်ႈပေႉႁဝ်း လႆႈ ဢုပ်ႇၵၼ်ဝႆႉ လွင်ႈတေပေႃႉၸိူင်းၼၢင်းယီႈသႅင်ၵေႃႇ မၼ်းၸဝ်ႈပေႃးႁၢင်ႈႁႅၼ်းဝႆႉမူတ်းယဝ်ႉ။ ယွၼ်ႉငဝ်းလၢႆးတၢင်းပဵၼ် ၶူဝ်ႊဝိတ်ႉ 19 ၼႆႉသေ ဢဝ်ပႆႇထႆႇပေႃႉၶႃႈဢေႃႈ။ မၼ်းၸဝ်ႈလူႉသဵင်ႈၵႂႃႇၸိူင်ႉၼႆ ႁဝ်းၶႃႈၸႂ်ဢမ်ႇလီၸွမ်းတႄႉၶႃႈ”- ဝႃႈ ၼႆ။

ၸဝ်ႈပေႉၼႆႉ ပဵၼ်ၽူႈၸတ်းၸိူင်း/ ၵုမ်းၸိူင်း ၾၢႆႇပၢႆးမွၼ်းတႆး ၸိုဝ်ႈသဵင်ယႂ်ႇ ၵတ်ႉၶႅၼ်ႇ ၵေႃႉၼိုင်ႈသေ ဢမ်ႇၵႃး    မၼ်းၸဝ်ႈၼႆႉ ပဵၼ်ၵူၼ်းတူင်ႉၼိုင် ၼႂ်းၵၢၼ်လိၵ်ႈလၢႆးၾိင်ႈငႄႈမႃးၵေႃႉၼိုင်ႈ။ ပဵၼ်ၵူၼ်းထႆႇ VDO ၶႃႊလႃႊဢူဝ်ႊၶေႊ  ၽဵင်းၵႂၢမ်းတႆး ၸိူဝ်းၼႆႉၵေႃႈ တေလႆႈဝႃႈ ပဵၼ်ၵေႃႉဢွၼ်တၢင်းသုတ်းၼႂ်းတႆး။  ဢၼ်ႁဵတ်းပၼ် ဢတ်းပၼ်  ၶႅပ်း VCD DVD  ၽူႈႁွင်ႉၽဵင်းၵႂၢမ်းတႆး ၸိူဝ်းၼႆႉ ၵေႃႈလူင်ႉလႅၼ်ႇ။  ၸိူင်းတႆး ၸိူင်းမၢၼ်ႈမၢၼ်ႈလၢႆလၢႆဢၼ်ၵေႃႈမၼ်းၸဝ်ႈႁဵတ်းဢွၵ်ႇ။ ၸိူင်းငဝ်းတူင်ႉၸိုဝ်ႈယႂ်ႇဢၼ်တႆးႁူႉၸၵ်းၼမ် ဢၼ်မၼ်းၸဝ်ႈႁဵတ်းဢွၵ်ႇတႄႉပဵၼ် ဢလွင်းလဵင့်ပႄ့၊ သၢႆငိုၼ်းသၢႆၶမ်း၊လၢၵ်ႈၽွႆးသႅင်လီ ၊ ဢၢႆႈထိုင့် – ၸဵမ်ၸိူဝ်းၼႆႉ။

ယၢမ်းလဵဝ်ၵိုတ်းဝႆႉမေးၼၢင်းမၼ်း ပႃႈႁၢၼ်ႇလႄႈ လုၵ်ႈယိင်း 3 ၵေႃႉ တီႈပွၵ်ႉ 5 ဝဵင်းလႃႈသဵဝ်ႈ။