ၸုမ်းၵေႃတႆး ဝဵင်းလႃႈသဵဝ်ႈ ႁၢင်ႈႁႅၼ်းတေပိုတ်ႇသွၼ်လိၵ်ႈဢိင်းၵလဵတ်ႈလႄႈ ပူၵ်းပွင်ၼမ်ႉၵတ်ႉၵူၼ်းၼုမ်ႇၽွင်း ၶၢဝ်းမႆႈ ႁွင်ႉမွၵ်ႇၽူႈသူၼ်ၸႂ်ၶိုၼ်ႈႁဵၼ်းဢဝ် ။
ၸုမ်းၵေႃတႆးလႃႈသဵဝ်ႈ တေပိုတ်ႇၵၢၼ်သွၼ်ႁဵၼ်းၶၢဝ်းမႆႈ 2 လိူၼ် တႄႇဝၼ်းတီႈ 15 မၢတ်ႉၶျ် တေႃႇထိုင် ဝၼ်းတီႈ 15 လိူၼ်မေႊ ပိုၼ်ၽၢဝ်ႇထိုင်ၽူႈသူၼ်ၸႂ်ၶႂ်ႈလဵပ်ႈႁဵၼ်း တီႈသုၼ်ၵၢၼ်ႁဵၼ်းႁူႉ တူင်ႇဝူင်းၵူၼ်း Community Learning Center (ၸုမ်းၵေႃတႆး) ဝၢၼ်ႈၵွင်း ဢိူင်ႇတႃႈပုင်ႇ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ။
ၼႂ်းပၢင်ၼႆႉတေပူင်သွၼ်ပၼ် လၢႆးလၢတ်ႈ၊ ဢၢၼ်ႇ၊ တႅမ်ႈ၊ ထွမ်ႇ လိၵ်ႈဢိင်းၵလဵတ်ႈ၊ ၵၢၼ်လပ်ႉၼမ်ႉၵတ်ႉတူဝ်ၵဝ်ႇ၊ လွင်ႈၵူၼ်းမီးၾိင်ႈယၢမ်ႈလီ၊ ပိုၼ်း၊ ၾိင်ႈႁိတ်ႈႁွႆးတႆးၸိူဝ်းၼႆႉလႄႈ တေမီးပႃးၵၢၼ်တူင်ႉၼိုင်တီႈၵေႃလႄႈ ၵၢၼ်လဵပ်ႈႁဵၼ်းတူင်ႇဝူင်းၵူၼ်းတၢင်းၼွၵ်ႈၸိူဝ်းၼႆႉ ။
ၼၢင်းဢၼ်း ၶူးသွၼ်ၵေႃတႆး လၢတ်ႈဝႃႈ – “ ႁဝ်းၶႃႈတေႁပ်ႉတႃႇ 30 ၵေႃႉ ပေႃးယူႇၵႆၼႆ ႁႂ်ႈဢဝ်ၽႃႈႁူမ်ႇၶူဝ်းၼွၼ်းသေ မႃးၼွၼ်းတီႈၼႆႈ တေသွၼ်ပၼ်ၶၢဝ်းယၢမ်းၵၢင်ၼႂ် 5 မူင်းတေႃႇထိုင်ဝၢႆးဝၼ်း 3 မူင်း ပေႃးၵၢင်ၶမ်ႈ ၵေႃႈ တေမီးပၢင်သွၼ်လွင်ႈထတ်းသၢင်ၶၢဝ်ႇငၢဝ်း၊ ၾိင်ႈႁိတ်ႈႁွႆးတႆးၸိူဝ်းၼႆႉ ” ဝႃႈၼႆ။
ၸၢႆးလႅင်းၶမ်း ၶူးသွၼ်ၵေႃတႆးလၢတ်ႈဝႃႈ – “ ယိူင်းဢၢၼ်းဢၼ်ၸတ်းႁဵတ်းၼႆႉ ပိူဝ်ႈတႃႇယုၵ်ႉမုၼ်း ၼမ်ႉၵတ်ႉ ၵူၼ်းၼုမ်ႇတႆးႁဝ်း ႁႂ်ႈမီးၼမ်ႉၵတ်ႉၶိုတ်းပဵင်းပိူၼ်ႈ ၵွပ်ႈၼၼ်လႄႈ ႁႂ်ႈဢွၼ်ၵၼ်မႃးၶိုၼ်ႈႁဵၼ်းၼမ်ၼမ်သေၵမ်း” ဝႃႈၼႆ။
မိူဝ်ႈဝၼ်းတီႈ 25/07/2017 တေႃႇထိုင် 25/08/2017 ၼၼ်ႉၵေႃႈ သုၼ်ၵၢၼ်ႁဵၼ်းႁူႉတူင်ႇဝူင်းၵူၼ်း Community Learning Center (ၸုမ်းၵေႃတႆး) ပိုၼ်ၽၢဝ်ႇႁပ်ႉလုၵ်ႈႁဵၼ်း ၽူႈသူၼ်ၸႂ် ၶိုၼ်ႈလဵပ်ႈႁဵၼ်းပၢင်ယုၵ်ႉမုၼ်း ၼမ်ႉၵတ်ႉၵူၼ်းၼုမ်ႇ တီႈလုမ်းမုၵ်ႉၸုမ်းၵေႃတႆး ဝၢၼ်ႈၵွင်း၊ ဢိူင်ႇတႃႈပုင်ႇ၊ ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ။
