သိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်း 3 လိူၼ်ပၢႆၼႆႉ ၶၼ်ၵုၼ်ႇ ၽၵ်းမီႇ ၶဝ်ႈသၢၼ် ၼမ်ႉမၼ်း ၵိူဝ် ၽွင်ဝၢၼ် ၵျွၵ်းၶိုၼ်ႈလႄႈ ၵူၼ်းမိူင်း ႁႃၵိၼ်လဵင်ႉတွင်ႉယၢပ်ႇ။
ဝၼ်းတီႈ 7 လိူၼ်မေႊ ၼႆႉ ၸွမ်သိုၵ်းလူင် မိၼ်းဢွင်ႇလၢႆႇ ၼမ်းၾုင်သိုၵ်းမၢၼ်ႈ ႁိမ်ၸိင်းယိုတ်းဢဝ်ဢႃႇၼႃႇဝၢၼ်ႈမိူင်း မီးမႃး 98 ဝၼ်း။ ၶၢဝ်းတၢင်း 3 လိူၼ် ပၢႆ ၼႆႉ ႁဵတ်းႁႂ်ႈ ၶၼ်ၵုၼ်ႇၶိုၼ်ႈၵူႈလွင်ႈလွင်ႈ။ ၶၼ်ၼမ်ႉမၼ်းၵိၼ် ၵူႈပွၵ်ႈ ၼိုင်ႈၸွႆႉ 38000 တေႃႈလဵဝ် ပဵၼ် 4 မိုၼ်ႇပၢႆ၊ ၽွင်ဝၢၼ် ၼိုင်ႈထူင် 1000 တေႃႈ လဵဝ် 1200 ပၢႆ။
ၵဵဝ်ႇၵပ်းလွင်ႈၼႆႉသေ ပႃႈၸိင်ႇ ၸဝ်ႈၶဝ်ႈသွႆး လၢတ်ႈၼႄ ၼင်ႇၼႆ။
“ၵိူဝ်ၼိုင်ႈထူင်ၼိုင်ႈၵူမ်းၼႆ့ တေႃႈလဵဝ်ပဵၼ် 250 ၶိုၼ်ႈၵူႈမဵဝ်း။ ဢၼ်ႁဝ်းၶၢႆသမ့်ဢမ်ႇၶိုၼ်ႈ ၼမ့်မၼ်းၼိုင်ႈပုင်း 19000 ၵေႃႈ ၶဝ်ႈသွႆးၼိုင်ႈဝၢၼ်ႈ 1000 – 1500 ၵူၺ်းလႆႈယွမ်းယွမ်းသႂ်ႇ ယၢပ်ႇၽိုတ်ႇတႄ့တႄ့ဝႃႈဝႃႈယဝ့်ဝႃႈ။”
ငိုၼ်းၸဝ်ႈၵဝ်ႇ ဢၼ်ၵႂႃႇ ၾၢၵ်ႇဝႆႉ ၼႂ်းယေးငိုၼ်း ၼၼ်ႉ ယွၼ်ႉၶွင်ႇသီႇသိုၵ်းမၢၼ်ႈ ယိုတ်းဢႃႇၼႃႇသေ ၵူၼ်းမိူင်း ဢမ်ႇမၼ်ႈၸႂ် ၵူဝ်ယေးငိုၼ်း ၵူၼ်ႇပင်းလႄႈ ဢွၼ် ၵၼ်ၵႂႃႇထုၵ်ႈ/ထွၼ် ဢဝ်ငိုၼ်းၸဝ်ႈၵဝ်ႇၶိုၼ်းၵူႈဝၼ်း။
လွင်ႈယေးငိုၼ်းၼႆႉၵေႃႈ ပဵၼ်လွင်ႈမႆႈဢူၵ်းမႆႈၸႂ်တႄႉၼႆ ၼၢင်းၶမ်း ၵူၼ်းယူႇ ၼႂ်းၸႄႈတွၼ်ႈလွႆလႅမ် ၵေႃႉၼိုင်ႈလၢတ်ႈၼႄ ၼင်ႇၼႆ။
“မႆႈၸႂ်ၼႃႇၶႃႈ ငိုၼ်းႁဝ်းပႆႇထုၵ်ႈယဝ့် ၵူဝ်သုၵ့်သၢၵ့်ပႅတ်ႈ ၽိူဝ်လိူဝ်ႁဝ်း ႁိူဝ်ႇလၢႆၶၢႆးယွႆ့သေႁွမ်ၵူၺ်းၼႃႇ ႁဝ်းႁႃၵိၼ်တႃႇမႃႇဢႃႇသီႇဝၵူၺ်းၼႃႇၼေႃ။ ၽႂ်ၵေႃႈၵူဝ်ယူႇၵူၺ်းဢမ်ႇၸၢင်ႈႁဵတ်းႁိုဝ်ၼေႃႈ။”
ၶၼ်ၵုၼ်ႇၵေႃႈ ၶိုၼ်ႈယူႇၵူႈဝၼ်း တီႈပၢၼ်ႇ/ယေးငိုၼ်း သမ်ႉ ၵႂႃႇထုၵ်ႈ/ထွၼ်ငိုၼ်းယၢပ်ႇလႄႈ ၶႂ်ႈသိုဝ်ႉၶူဝ်းတႃႇၵိၼ် တႃႇၶၢႆဝႆႉၵေႃႈ ၵိၼ်းၸႂ်ဝႆႉယူႇ ၼႆ ပႃႈၸိင်ႇ ၸဝ်ႈၶဝ်ႈသွႆးၼၼ်ႉလၢတ်ႈထႅင်ႈၼင်ႇၼႆ။
“ႁဝ်းဝႃႈၶၢၼ်ၵုၼ်ႇၵေႃႈၶိုၼ်ႈၼႃႇ ၶႂ်ႈထုၵ်ႇသေသိုဝ့်ဝႆ့ၼမ့်မီႇၼမ့်မၼ်းၵူၺ်းယဝ့်ၼႆ ၶဝ်ဝႃႈတေထုၵ်ႈၵႃႈႁိုဝ် ႁႂ်ႈသိုဝ့်လႆႈၼမ့်မၼ်းသေ သိပ်းပုင်း ၶဝ်ႈသၢၼ်သွင် သၢမ် ၸေႃးၼၼ့်ၼႃႇ ၶဝ်ဝႃႈတေလွႆးၵႂႃႇတီႈလႂ် ႁဝ်းတေသၢင်ႇၼမ့်မၼ်းတူၼ်ႈတီးၼႆ ၶဝ်ဝႃႈတႅမ်ႈပၼ်တႄ့လႆႈယူႇ တီႈၼၼ်ႈၵေႃႈတေထုၵ်ႈလႆႈ 3 သႅၼ် 5 သႅၼ်ၵူၺ်း ၼႆဝႃႈ ႁဝ်းၵေႃႈဢမ်ႇလွႆးယဝ့် ၼမ့်မၼ်းၵေႃႈၶိုၼ်ႈယူႇတိၵ်းတိၵ်း ပေႃးသဵင်ႈပုင်း ၼိုင်ႈၵေႃႈၶိုၼ်ႈထႅင်ႈယဝ့်”
ၼႂ်းထုင်ႉ လွႆလႅမ် ပၢင်လူင် ၼႆႉ မိူဝ်ႈသိုၵ်းမၢၼ်ႈ ပႆႇယိုတ်းဢႃႇၼႃႇ ၵိူဝ် ၼိုင်ႈၸွႆႉ – 1000 – ဝၢႆးယိုတ်းဢႃႇၼႃႇ ယဝ်ႉ ယၢမ်းလဵဝ် ၵိူဝ် ၼိုင်ႈၸွႆႉ 1200 ပျႃး ။ ၶဝ်ႈၼိုင်ႈ ထူင် 40000 ပျႃး ယၢမ်းလဵဝ် ၶၼ်ၶဝ်ႈသၢၼ် ၼိုင်ႈထူင် မီး 45000 ပျႃး ။ မိူဝ်ႈပႆႇ ယိုတ်း ဢႃႇၼႃႇ ၼမ်ႉမၼ်းၵႃး ထၢတ်ႈသီႇ ၼိုင်ႈလိတ်ႉ800 ပၢႆ တေႃႈလဵဝ် 1050 ။ယိင်ႈၶႅၼ်းႁဵတ်းႁႂ်ႈၵူၼ်းမိူင်းယၢပ်ႇၸႂ်မႃးလိူဝ်ၵဝ်ႇသေ ႁဵတ်းႁႂ်ႈဢွၼ်ၵၼ် ၸၢၼ်ႈ ၸင်းဢိမ်ႇ ၸဝ်ႈဢႃႇၼႃႇသိုၵ်းမႃးၵူႈမိုဝ်ႉၵူႈဝၼ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ