တပ်ႉသိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇၼႂ်းငဝ်းႁၢင်ႈသဵင် MRTV လႄႈ MWDမိူဝ်ႈၼႆႉ 20/4/2021 ယၢမ်းၵၢင်ၶမ်ႈ ဝႃႈ လူင်ပွင်ၸိုင်ႈၶွတ်ႇလိူတ်ႈ NUG လႄႈ ၵူၼ်းဢၼ်ၶဝ်ႈပႃးႁၢပ်ႇၼႃႈတီႈပုၼ်ႈၽွၼ်း ၽွင်းလူင်ဝႆႉၸိူဝ်းၼႆႉ ပဵၼ်ၸုမ်းဢမ်ႇပဵၼ်တၢင်းၵၢၼ်ဝႃႈၼႆ။
ၼႂ်းလၢႆးၵၢၼ်ၶၢဝ်ႇထီႊဝီႊမၢၼ်ႈၼၼ်ႉပႃးဝႆႉဝႃႈ – CRPH ၶွမ်ႊမတီႊ တၢင်တူဝ်သၽႃးႁူမ်ႈတုမ်ၼၼ်ႉ ယူႇတီႈၶွင်ႇသီႇသိုၵ်းမၢၼ်ႈ ပိုၼ်ၽၢဝ်ႇ ပဵၼ်ၸုမ်းဢမ်ႇၸႂ်ႈတၢင်းၵၢၼ် ၸဵမ်မိူဝ်ႈလိူၼ်မၢတ်ႉၶျ်ပူၼ်ႉမႃး ယဝ်ႉလႄႈ လူင်ပွင်ၸိုင်ႈၶွတ်ႇလိူတ်ႈ NUG ဢၼ် CRPH ၶွတ်ႇၽွတ်ႈဝႆႉ ၼၼ်ႉၵေႃႈ မၵ်းမၼ်ႈပိုၼ်ၽၢဝ်ႇပဵၼ်ၸုမ်း ဢမ်ႇၸႂ်ႈတၢင်းၵၢၼ် – ဝႃႈၼႆ။
ၵူၼ်းမိူင်းတူၼ်ႈတီးၵေႃႉၼိုင်ႈၵေႃႈလၢတ်ႈဝႃႈ – ၸွမ်းၵၢင်ဝဵင်း၊ ၸွမ်းသဝ် လၵ်းၾႆး ၸိူဝ်းၼႆႉသိုၵ်းမၢၼ်ႈဢဝ်ႁၢင်ႈၸုမ်းလူင်ပွင် ၸိုင်ႈ NUG မႃးတိတ်းပႃႉဝႆႉသေ ပိုၼ်ၽၢဝ်ႇႁႃတီႉၺွပ်းဝႆႉလႆႈႁၼ်ပေႃး တဵမ်ဝၢၼ်ႈ တဵမ်မိူင်း- ဝႃႈၼႆ။
ၾၢႆႇၼိုင်ႈ ၵူၼ်းၼုမ်ႇတူၼ်ႈတီးၵေႃႈ ဢဝ်ႁၢင်ႈၸွမ်ၸိၵ်းသိုၵ်းမၢၼ်ႈ ၸိူဝ်းၼႆႉ တိတ်းပႃႉၸွမ်းၵၢင်တၢင်းသေၼႄၵၢင်ၸႂ်သၢၼ်ၶတ်း သိုၵ်းမၢၼ်ႈ ယူႇၵူႈဝၼ်း။
ၾၢႆႇတၢင်း CRPH ၵေႃႈတေႃႈၼင်ႇၼၼ်၊ ပိုၼ်ၽၢဝ်ႇၸုမ်းသိုၵ်းယိုတ်းမိူင်း ပဵၼ်ၸုမ်းၵေႃႇၵၢၼ်ႁၢႆႉသေ ပိုၼ်ၽၢဝ်ႇပႃးဝႃႈ ဢမ်ႇမီး မိူင်းလႂ်ၼႂ်းလုမ်ႈၾႃႉ ဢၼ်မၵ်းမၼ်ႈၶွင်ႇသီႇသိုၵ်း ဝႃႈၼႆ။
