မိူဝ်ႈၼႆႉ ဝၼ်းတီႈ 23/3/2021 ယၢမ်းၵၢင်ၼႂ် 9:30 မူင်း ထိုင် 12:30 မူင်း ယေးငိုၼ်း ၵမ်ႇပေႃးၸ တီႈပွၵ်ႉၼိူဝ် ၼႂ်းဝဵင်းမူႇၸေႊ ၸိုင်ႈတႆး ပွတ်းႁွင်ႇ ၶိုၼ်းပိုတ်ႇပၼ် ၵူၼ်းမိူင်း ထွၼ်ငိုၼ်း ၵူၺ်းၵႃႈၼိုင်ႈၵေႃႉ တေဢမ်ႇလႆႈထွၼ်လိူဝ် 5 သႅၼ် ပျႃး ဝႃႈၼႆ။
ၵူၼ်းပိုၼ်ႉတီႈ မူႇၸေႊ ဢၼ်ၵႂႃႇထွၼ်ငိုၼ်း ၵေႃႉၼိုင်ႈလၢတ်ႈဝႃႈ – “မိူဝ်ႈၼႆႉ ႁဝ်းၶႃႈ ဢွၼ်ၵၼ်မႃးပႂ်ႉတီႈၼႃႈၽၵ်းတူ ပၢၼ်ႇ ၸဵမ်မိူဝ်ႈ 8 မူင်းၵၢင်ၼႂ်ၶႃႈဢေႃႈ။ ၶဝ်ပၼ်ထုၵ်ႈ ၼိုင်ႈၵေႃႉ 5 သႅၼ်ပျႃး။ တႃႇႁူဝ်ၵူၼ်း 100 ၵေႃႉ ၵူၺ်းၶႃႈ၊ မိူဝ်ႈၽုၵ်ႈ တေပိုတ်ႇ ဢမ်ႇပိုတ်ႇပၼ်ထႅင်ႈတႄႉ ပႆႇႁူႉၶႃႈ”- ဝႃႈၼႆ။
သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းယဝ်ႉ 4-5 ဝၼ်း တင်ႈဢဝ်ဝၼ်းတီႈ 5/2/2021 ၸိူဝ်းၼႆႉမႃး ယေးငိုၼ်း ၼႂ်းမိူင်းႁူမ်ႈတုမ် လႆႈပိၵ်ႉဢိုတ်းဝႆႉ ၵူႈဢၼ်။ ၵူၺ်းၵႃႈ ATM, KBZ Pay ၸိူဝ်းၼႆႉတႄႉၸႂ်ႉလႆႈယူႇ၊ ၼိုင်ႈၵမ်းဢမ်ႇလႆႈလိူဝ် 5 သႅၼ်ပျႃး။
“တီႈမူႇၸေႊႁဝ်းၶႃႈၼႆႉ တင်ႇတႄႇ သိုၵ်းမၢၼ်ႈယိုတ်းဢႃႇၼႃႇမႃး ပၢၼ်ႇ ပိၵ်ႉဢိုတ်းမူတ်းၶႃႈ။ တေႃႇ ထိုင် ယၢမ်းလဵဝ် ပႆႇပိုတ်ႇပၼ်ၶိုၼ်းမူတ်း။ မိူဝ်ႈဝၼ်းတီႈ 19 တင်း မိူဝ်ႈဝႃး ဝၼ်းတီႈ 22 ၼႆႉ ပၢၼ်ႇ KBZ ပိုတ်ႇပၼ်ၵမ်းၼိုင်ႈယူႇ။ ၵူၺ်းၵႃႈ ဢမ်ႇပၼ်ထုၵ်ႈငိုၼ်း။ မီးမိူဝ်ႈၼႆႉၵူၺ်း ၸင်ႇၸၢင်ႈထုၵ်ႈငိုၼ်းလႆႈ ”- ၵူၼ်းမူႇၸေႊ သိုပ်ႇလၢတ်ႈၼႄ ၼင်ႇၼႆ။
ယေးငိုၼ်း ၵမ်ႇပေႃးၸ တီႈၸႄႈဝဵင်းမူႇၸေႊၼႆႉ တင်းမူတ်း မီး 3 တီႈ။ တီႈပွၵ်ႉၼိူဝ် တီႈၼိုင်ႈ၊ ၼႃႈၽၵ်းတူလူင် တီႈၼိုင်ႈ လႄႈ တီႈပၢင်ႇႁိူဝ်းမိၼ် တီႈၼိုင်ႈ။ ဢၼ်ပိုတ်ႇပၼ်မိူဝ်ႈၼႆႉသမ်ႉ ပဵၼ်တီႈပွၵ်ႉၼိူဝ်။ ထႅင်ႈ 2 တီႈၼၼ်ႉတႄႉ ပႆႇပိုတ်ႇ ပၼ်ၵူၼ်းမိူင်းၸႂ်ႉၶိုၼ်း။
ဝၼ်းတီႈ 5/3/2021 ငဝ်ႈငုၼ်းယေးငိုၼ်းၸိုင်ႈမိူင်း မိူင်းမၢၼ်ႈ ဢွၵ်ႇလိၵ်ႈပိုၼ်ၽၢဝ်ႇၽိုၼ်ၼိုင်ႈဝႃႈ ၼင်ႇႁိုဝ် ၵၢၼ် ပၢႆးမၢၵ်ႈ မီး ၵၢၼ်တေႃႉသူင်ႇၶူဝ်းၵုၼ်ႇ တေမိူၼ်ၵဝ်ႇၶိုၼ်းၼၼ်ႉ ႁႂ်ႈဢွၼ်ၵၼ်ပိုတ်ႇယေးငိုၼ်းၶိုၼ်း ၼႂ်းဝၼ်းတီႈ 8/3/2021 ။ သင်ဝႃႈ ဢမ်ႇပိုတ်ႇယေးငိုၼ်းၸွမ်းၼင်ႇၶေႃႈပူင်ၸိုင် တေဢဝ်လိူင်ႈႁႂ်ႈထိုင်တီႈ ဝႃႈၼႆ။
ဢၼ်ၵူၼ်းမိူင်းတႆး ၸႂ်ႉၼမ်တႄႉပဵၼ်ယေးငိုၼ်း(ပၢၼ်ႇ) ၵမ်ႇပေႃးၸ (KBZ)၊ ဢေႊယႃႊပၢၼ်ႇ (AYA Bank)၊ CB Bank ၊ ယူဝ်းမႃႉပၢၼ်ႇ (Yoma Bank) လႄႈ MAB Bank ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ