ယႃႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ဢၼ်တေလုၵ်ႉမိူင်းၵြႃးဢိၼ်ႊတီႊယႃႊ တေႃႉသူင်ႇၶဝ်ႈၼႂ်းမိူင်းႁူမ်ႈတုမ်ထႅင်ႈ ႁွပ်ႈ သွင်ၼႆႉ ယွၼ်ႉသၢႆၵၢၼ်မိၼ် ၼႂ်းမိူင်းႁူမ်ႈတုမ် ပိုၼ်ၽၢဝ်ႇ ပိၵ်ႉဢိုတ်းပႅတ်ႈတင်းမူတ်းလႄႈ ပႆႇၸၢင်ႈတေႃႉသူင်ႇၶဝ်ႈ ဝႃႈ ၼႆ။
မိူဝ်ႈဝႃး ဝၼ်းတီႈ 1/2/2021 ၾၢႆႇတေႃႉသူင်ႇတၢင်းသၢႆၵၢၼ်မိၼ် ပိုၼ်ၽၢဝ်ႇဝႃႈ တေၵိုတ်းလိုဝ်ႈ သၢႆ ၵၢၼ်မိၼ်ၵူႈသၢႆၼွၵ်ႈမိူင်း ၼႂ်းမိူင်းၵူႈတီႈ တေႃႇထိုင် လိူၼ်မေႊသဵင်ႈ ဝႃႈၼႆ လႄႈ ယႃႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ဢၼ်မိူင်းၵြႃးဢိၼ်ႊတီႊယႃႊ တေသူင်ႇမႃးပွၵ်ႈၵမ်း 2 ၼႂ်းဝၼ်းတီႈ 2 /2/2021 ၼႆႉၵေႃႈ ဢမ်ႇၸၢင်ႈၶဝ်ႈမိူင်း။
ၶၢဝ်ႇ ပီႊပီႊသီႊ ပိုၼ်ၽၢဝ်ႇဝႃႈ ၼႂ်းလိူၼ်ၾႅပ်ႊၿိဝ်ႊရီႊ 2021 ၼႆႉ လူင်ပွင်ၸိုင်ႈဝၢင်းၽႅၼ်ဝႆႉ တေဢၢၼ်းသမ်းပၼ်ၵူၼ်းမိူင်း 15 လၢၼ်ႉၵေႃႉ ၼႂ်းမိူင်းႁူမ်ႈတုမ် ။ ၼႂ်းပီ 2021 ၼႆႉ တေဢၢၼ်းသမ်းပၼ်ၵူၼ်းမိူင်း ႁႂ်ႈယဝ်ႉတႃႉ 40 % ၶွင်ႁူဝ်ၵူၼ်း 54 လၢၼ်ႉၵေႃႉ ဝႃႈၼႆဝႆႉ။
ၵူၺ်းၵႃႈ ယႃႈယႃ ယင်းတိုၵ်ႉၶဝ်ႈ ႁွပ်ႈလဵဝ် မိူဝ်ႈဝၼ်းတီႈ 22/1/2021 ပူၼ်ႉမႃး တႃႇ 1 လၢၼ်ႉ 5 သႅၼ်တူဝ်ႉသ်/ တဝ်ႈ။ လူင်ပွင်ၸိုင်ႈဢၢၼ်းသမ်းပၼ်တႃႇ ၾၢႆႇပၢႆးယူႇလီ လႄႈ ၾၢႆႇၵုမ်းၵၢၼ်မိူင်း 7 သႅၼ်ၵေႃႉ။ ၼိုင်ႈၵေႃႉတေလႆႈသမ်း 2 ၵမ်း။
ၼၢင်းသီႇတႃႇၸိုၼ်ႈသႂ် (ႁွင်ႉ) ၼၢင်းဢေးမျႃႉတီႇတႃႇ ၼၢင်းမေႃယႃ တီႈၶူဝ်လမ် လၢတ်ႈဝႃႈ – “ၶႃႈႁဝ်းတႄႉ လႆႈႁပ်ႉသမ်း ၵႂႃႇယဝ်ႉ ယႃႁႄႉၵင်ႈၶူဝ်ႊဝိတ်ႉ 19 ၵူၺ်းၵႃႈ တေလႆႈသမ်းထႅင်ႈၼႂ်းလိူၼ်ၼႆႉ ။ ထႅင်ႈပွၵ်ႈသွင်ၼႆႉတႄႉ တေမႃး ၸိူင်ႉႁိုဝ် ဢၼ်ဝႃႈၼၼ်ႉ ပႆႇႁူႉၶႃႈ ယွၼ်ႉငဝ်းလၢႆးဝၢၼ်ႈမိူင်းၵေႃႈ လႅၵ်ႈလၢႆႈဝႆႉၸိူင်ႉၼႆသေ ပႆႇၸၢင်ႈလၢတ်ႈၶႃႈ”- ဝႃႈၼႆ။
ယႃႈယႃဢၼ်လႆႈမႃးၼၼ်ႉ ဝၼ်းတီႈ 27/1/2021 လူင်ပွင်ၸိုင်ႈတႄႇသမ်းပၼ် ၶႃႈႁၢပ်ႇၵၢၼ်ၶုၼ်ၾၢႆႇပၢႆးယူႇလီ ပတ်းပိုၼ်ႉၸိုင်ႈမိူင်း ပွၵ်ႈၵမ်းႁႅၵ်ႈ။ ပေႃးၶႅၼ်ႈ 29 ဝၼ်းယဝ်ႉတေလႆႈသမ်းထႅင်ႈၵမ်း 2 ပၼ်ၼႂ်းဝၼ်းတီႈ 25/2/2021 ဝႃႈၼႆ။
ၽွင်းသိုၵ်းပႆႇယိုတ်းဢမ်းၼၢတ်ႈၼၼ်ႉ ၵဵဝ်ႇၵပ်းလွင်ႈႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၼႆႉသေ မိူင်းၶႄႇၵေႃႈလၢတ်ႈဝႃႈ တေၵမ်ႉၸွႆႈလူႇပၼ်ယႃႈယႃၶူဝ်ႊဝိတ်ႉ-19 ပၼ်မိူင်းႁူမ်ႈတုမ်မၢၼ်ႈ တႃႇ 3 သႅၼ်တူဝ်ႉသ် ဝႃႈၼႆဝႆႉ။
