ၼႂ်းၼႃႈလိၼ် ဝႃႉ UWSA ၵုမ်းၵမ်တူင်ႉၼိုင် ပၢင်သၢင်း မိူင်းပွၵ်ႉ မိူင်းၽႅၼ် ၼၼ်ႉ ၵူၼ်းတိတ်းၸပ်းၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 တင်းမူတ်းမီး 304 ၵေႃႉယဝ်ႉ ဝႃႈၼႆ။
ဝၼ်းတီႈ 25/1/2021 ယၢမ်းၵၢင်ဝၼ်း 11 မူင်း ယူႇတီႈၸုမ်းၵႅတ်ႇၵင်ႈ တၢင်းပဵၼ်ၶူဝ်ႊဝိတ်ႉ 19 ၼႂ်းၼႃႈလိၼ် ၽွင်းငမ်းတူဝ်ၵဝ်ႇဝႃႉ UWSA (ၸွမ်းၼင်ႇပိူင်ငဝ်ႈပိုင်းမိူင်း 2008) ပိုၼ်ၽၢဝ်ႇဢွၵ်ႇမႃး ယၢမ်းလဵဝ် မီးၵူၼ်းတိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တင်းမူတ်းမီး 304 ၵေႃႉ ယႃၶႅၼ်း 174 ၵေႃႉ၊ လူႉတၢႆ တႄႉဢမ်ႇမီး ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ – “ ၵူၼ်းတိတ်းၸပ်းတၢင်းပဵၼ် ၼႂ်းဝဵင်းပၢင်သၢင်းမီး 36 ၵေႃႉ ယႃၶႅၼ်း 33 ၵေႃႉ၊ ၸႄႈတွၼ်ႈမိူင်းပွၵ်ႉသမ်ႉ ဝဵင်းမိူင်းပွၵ်ႉ 239 ၵေႃႉ၊ ယႃၶႅၼ်း 141 ၵေႃႉ၊ ႁူဝ်တဝ်း 8 ၵေႃႉ၊ မိူင်းၽႅၼ် 21 ၵေႃႉ၊ လူႉတၢႆ ဢမ်ႇမီး”- ၼႆယဝ်ႉ။
ဢိင်ၼိူဝ် လွင်ႈတၢင်းပဵၼ်ၶူဝ်ႊဝိတ်ႉ 19 ၼႆႉသေ တီႈငဝ်ႈငုၼ်းၼႃႈလိၼ်ၽွင်းငမ်းတူဝ်ၵဝ်ႇဝႃႉ UWSA ၸႄႈဝဵင်းပၢင်သၢင်း ၸိုင်ႈတႆးပွတ်းဢွၵ်ႇၼၼ်ႉ လႆႈသင်ႇပိၵ်ႉဢိုတ်း Lockdown ဝႆႉ တေႃႇထိုင် ဝၼ်းတီႈ 31/1/2021 ၼႆႉသဵင်ႈ ဝႃႈၼႆ။
ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း မိူင်းႁူမ်ႈတုမ် ပိုၼ်ၽၢဝ်ႇဢွၵ်ႇမႃး မိူဝ်ႈဝၼ်းတီႈ 25/1/2021 ယၢမ်းၵၢင်ၶမ်ႈ 8 မူင်း ၼႂ်းမိူင်းႁူမ်ႈတုမ်ပတ်းပိုၼ်ႉ ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တင်းမူတ်းမီး 137,957 ၵေႃႉ၊ ယႃၶႅၼ်း 122,116 ၵေႃႉလႄႈ လူႉတၢႆ 3,069 ၵေႃႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ