ဢွၼ်ႇၸၢႆးတႆး ဢႃႇယုသိပ်းၶူပ်ႇ ၵတ်ႉၶႅၼ်ႇၾၢႆႇပိတ်ႉမၢၵ်ႇၼင်၊ တၢင်တူဝ်ႁူင်းႁဵၼ်း မိူင်လိုၵ်ႉ ဝဵင်းလမ်းပုၼ်း၊ ၶဝ်ႈၶႅင်ႇသႅၼ်းၵူၼ်းၼုမ်ႇ ဢႃႇယုသိပ်းသွင်ပီ တီႈဝဵင်းသၼ်ၵမ်းပႅင်း ယိုဝ်းၶဝ်ႈၽၵ်းတူ သၢမ်လုၵ်ႈ။

မိူဝ်ႈဝၼ်းတီႈ 13/12/2020 မီးပၢင်ပွႆးၶႅင်ႇပိတ်ႉမၢၵ်ႇၼင်မူၼ်း (Football) ဢွၼ်ႇၸၢႆးၼုမ်ႇ သႅၼ်းဢႃႇယု 12 ပီ တီႈဝၢင်း/သၼၢမ် SK ၸႄႈဝဵင်းသၼ်ၵမ်းပႅင်း ၸႄႈတွၼ်ႈၵဵင်းမႆႇ ၸိုင်ႈထႆး။ ပၢင်ပိတ်ႉမၢၵ်ႇၼင်ၼႆႉ ပဵၼ်ႁူင်းႁဵၼ်းၸိုဝ်ႈသဵင်ယႂ်ႇလွၼ်ႉလွၼ်ႉ မွၵ်ႈ 10 ႁူင်းႁဵၼ်း ၶႅင်ႇၵၼ်။ ဢွၼ်ႇၸၢႆးတႆး လုၵ်ႈလၢင်း ႁႅင်းၵၢၼ်ယၢၼ်မိူင်း ၸိုဝ်ႈၸၢႆးသႅၼ်ႁွမ် (ဝူင်းတႆး) ၵေႃႉပဵၼ်တူဝ်တႅၼ်း ႁူင်းႁဵၼ်းမိူင်လိုၵ်ႉ ၸႄႈဝဵင်း လမ်းပုၼ်း၊ ၶဝ်ႈလဵၼ်ႈပဵၼ်ၵွင်ၵၢင်ၼၼ်ႉ ယိုဝ်းလႆႈ 3 ၽၵ်းတူ ၼႆယဝ်ႉ။

ၸၢႆးသႅင်ဝၼ်း ၽူႈၼႄႉၼမ်းလၢႆးပိတ်ႉမၢၵ်ႇၼင်ၵေႃႈၸႂ်ႈ၊ ၽူႈၸွႆႈသွၼ်ပၼ်ၵေႃႈၸႂ်ႈ လၢတ်ႈတီႈ ၽူႈတွႆႇႁွၵ်ႈဝႃႈ- “ဢွၼ်ႇၸၢႆးသႅၼ်ႁွမ်ၼႆႉ ပဵၼ်လုၵ်ႈႁႅင်းၵၢၼ်ယၢၼ်မိူင်း ၸၢဝ်းတႆး။ ၶၢဝ်းယၢမ်းၵႂႃႇၶႅင်ႇ ၼႂ်းထႆးၵေႃႈ ယွမ်းႁပ်ႉဝႃႈပဵၼ်တႆး၊ ၵူၺ်းၵႃႈ ၼမ်ႉၵတ်ႉတၢင်းၶႅၼ်ႇမၼ်းၸၢႆးၼႆႉ ပိူၼ်ႈသမ်ႉယွမ်းႁပ်ႉ။ မၼ်းၸၢႆးၼႆႉ တူဝ်ၶိင်းၶႅင်ႁႅင်းလီ၊ မင်ႈသင်ႈလီ၊ လႅတ်းသႅဝ်း၊ ၶႃႈႁဝ်းႁွင်ႉမႃးလဵၼ်ႈ ၼႂ်းၸုမ်းလုၵ်ႈဢွၼ်ႇ သႅၼ်း ဢႃႇယု 12 ပီတႃႇသေႇ။ ၸုမ်းလုၵ်ႈဢွၼ်ႇ သႅၼ်း 12 ပီ ႁူင်းႁဵၼ်းၸိုဝ်ႈသဵင်ယႂ်ႇ ဢၼ်ပိူၼ်ႈ ၶတ်းလိူၵ်ႈ ၸုမ်းလုၵ်ႈဢွၼ်ႇ သႅၼ်း 12 ပီ ၸိူဝ်းလဵၼ်ႈမၢၵ်ႇၼင်ၶႅၼ်ႇၶႅၼ်ႇ မႃးလဵၼ်ႈမိူဝ်ႈသိုၼ်း (13/12/2020)ၼၼ်ႉ မၼ်းၸၢႆးယိုဝ်းလႆႈ 3 ၽၵ်းတူ၊ မၼ်းၸၢႆးပဵၼ်ၵူၼ်းဢႃႇယုလဵၵ်ႉလိူဝ်ပိူၼ်ႈ” ဝႃႈၼႆ။

ၽွၼ်းၵၢၼ် ပိတ်ႉမၢၵ်ႇၼင်ပွၵ်ႈၼႆႉ ႁဵတ်းႁႂ်ႈဢွၼ်ႇၸၢႆးသႅၼ်ႁွမ် ၸိုဝ်ႈလိုဝ်းလင်ၵႂႃႇ ၼႂ်းတူင်ႇဝူင်း ပိတ်ႉမၢၵ်ႇၼင် မိူင်းထႆး၊ ၸုမ်းလႂ် ႁူင်းႁဵၼ်းလႂ်ၵေႃႈ ၶႂ်ႈလႆႈတူဝ်မၼ်းၸၢႆး ၶဝ်ႈႁူမ်ႈမူႇၸုမ်း ပိတ်ႉမၢၵ်ႇၼင်ၵႂႃႇမိူဝ်းၼႃႈ ၼႆယဝ်ႉ။

“ၸၢႆးသႅၼ်ႁွမ်ၼႆႉ ဢႃႇယုတိုၵ်ႉလႆႈ 10 ပီၵူၺ်း။ ၵူၺ်းၵႃႈ ပိူၼ်ႈဢဝ်မၼ်းလဵၼ်ႈၼႂ်းၸုမ်းလုၵ်ႈဢွၼ်ႇ ၼုမ်ႇ သႅၼ်းဢႃႇယု 12 ပီတႃႇသေႇ။ ပေႃးဢမ်ႇၶႅၼ်ႇပိူၼ်ႈဢမ်ႇဢဝ်လဵၼ်ႈ၊ လုၵ်ႈဢွၼ်ႇဢႃႇယု 10 ၶူပ်ႇ တင်း 12 ၶူပ်ႇၼႆႉ ႁႅင်းၶဝ်ဢမ်ႇငၢမ်ႇၵၼ်။ ၵူၺ်းၵႃႈမၼ်းၸၢႆးၼႆႉ လဵၼ်ႈႁႅင်းယူႇတႃႇသေႇ၊ ႁႅင်းမၼ်း တဵမ်ထူၼ်ႈသေ ၶဝ်ႈၶႅင်ႇၵေႃႈ ဢမ်ႇမီးလွင်ႈတုမ်ႉတိူဝ်ႉသင်၊ ပဵၼ်လုၵ်ႈဢွၼ်ႇတႆး ဢၼ်မီးၼမ်ႉၵတ်ႉ တႄႉတႄႉဝႃႈဝႃႈ” ၸၢႆးသႅင်ဝၼ်း သိုပ်ႇလၢတ်ႈထႅင်ႈၼင်ႇၼႆ။

ၸၢႆးသႅၼ်ႁွမ် ဝူင်းတႆးၼႆႉ ပေႃႈပဵၼ်ၵူၼ်းမိူင်းပၼ်ႇ၊ မႄႈပဵၼ်ၵူၼ်းလၢင်းၶိူဝ်း၊ ၵိူတ်ႇပီ 2010 ၊ ယၢမ်းလဵဝ် ဢႃႇယု 10 ၶူပ်ႇ၊ ၵိူတ်ႇၼႂ်းမိူင်းထႆး၊ ၵူၺ်းၵႃႈ ဢိင်ၼိူဝ်ပေႃႈမႄႈပဵၼ်ၵူၼ်းမိူင်းတႆးသေ မၼ်းၸၢႆးလႆႈဝႆႉ ဝႂ်သီၶွင်ႇ မိူင်းထႆး။ မိူဝ်ႈလဵဝ် ယူႇသဝ်းဝႆႉတီႈမူႇဝၢၼ်ႈမႄႈၶႃး ၸႄႈဝဵင်းလမ်းပုၼ်း ၸိုင်ႈထႆးတွၼ်ႈၼိူဝ်။ ၶိုၼ်ႈႁဵၼ်းလိၵ်ႈလၢႆးဝႆႉတီႈ ႁူင်းႁဵၼ်းမိူင်လိုၵ်ႉ ဝဵင်းလမ်းပုၼ်း၊ ၸၼ်ႉ 4 (ပေႃး 4)။

မၼ်းၸၢႆးၼႆႉ မိူဝ်ႈၼႂ်းလိူၼ်ၼူဝ်ႊဝႅမ်ႊပိူဝ်ႊ (2020) ပူၼ်ႉမႃးၼၼ်ႉၵေႃႈ လႆႈႁပ်ႉသူး/ရၢင်းဝလ်း ၽူႈပိတ်ႉမၢၵ်ႇၼင်ၵတ်ႉၶႅၼ်ႇ ဢွၼ်ႇၸၢႆးသႅၼ်းဢႃႇယု 10 ပီ ၼႂ်းလမ်းပုၼ်း။ ဢၼ်လႆႈႁပ်ႉသူးဢၼ်ၼႆႉ ၼႂ်းတႆး မၼ်းၸၢႆးပဵၼ်ၵေႃႉလဵဝ်/ၵေႃႉႁႅၵ်ႈ။ မၼ်းၸၢႆးဢွၼ်ဢဝ်ၸုမ်း လႆႈမႃးထီႉ 1 သေလႆႈႁပ်ႉသူးၼႆႉ ၼႆယဝ်ႉ။

ၵၢၼ်လဵၼ်ႈမၢၵ်ႇၼမ်ၼႆႉ ဢွၼ်ႇၸၢႆးသႅၼ်ႁွမ် မီးတူဝ်ထူပ်းမႃးၼမ်၊ လဵၼ်ႈမႃးယဝ်ႉလၢႆလၢႆပၢင်၊ မၢင်ပွၵ်ႈ ဢႃႇယု 10 ၶူပ်ႇ လႆႈလဵၼ်ႈၸွမ်း 13 ၶူပ်ႇၵေႃႈမီးမႃး။ မိူဝ်ႈလဵဝ် ၸုမ်းပိတ်ႉမၢၵ်ႇၼင် မိူၼ်ၼင်ႇ ၵဵင်းႁၢႆး၊ ၵဵင်းမႆႇ၊ လမ်းပုၼ်း ဢိၵ်ႇ ႁူင်းႁဵၼ်းယႂ်ႇယႂ်ႇၸိူဝ်းၼႆႉ ၶႂ်ႈလႆႈတူဝ်မၼ်းၸၢႆးဝႆႉ။

ၸိူင်ႉႁိုဝ်ၵေႃႈယဝ်ႉ ၵၢၼ်လဵၼ်ႈမၢၵ်ႇၼင်ၼႆႉ မၼ်းၸၢႆးပဵၼ်တူဝ်တႅၼ်း ၶွင်ၼႂ်းႁူင်းႁဵၼ်း မိူင်လိုၵ်ႉ လမ်းပုၼ်းဝႆႉ၊ ၼႂ်းႁူင်းႁဵၼ်းၵေႃႈယွမ်းႁပ်ႉမၼ်းၸၢႆး။ ဢိင်ၼိူဝ်မၼ်းၸၢႆး ၵတ်ႉၶႅၼ်ႇၾၢႆႇပိတ်ႉမၢၵ်ႇၼင် သေ တွၼ်ႈၵၢၼ်ႁဵၼ်းၼၼ်ႉ တၢင်းႁူင်းႁဵၼ်းလူတ်းယွမ်းပၼ်ၵႃႈႁဵၼ်းၽွင်ႈ ၼႆယဝ်ႉ။