သင်ၶတႆး ဢၼ်ႁဵၼ်းယဝ်ႉ ၸၼ်ႉ B.A, M.A တေလႆႈႁပ်ႉၸုမ်ႈၶူးပီၼႆႉ မီး 60 ပၢႆ ၵူၺ်းဢၼ်တေမႃးႁပ်ႉၸုမ်ႈၶူးလႆႈမီး 26 တူၼ်/ ၵေႃႉၵူၺ်း ၊ ယွၼ်ႉတၢင်းပဵၼ်ၶူဝ်ႊ ဝိတ်ႉ 19 ၽႄႈလၢမ်းႁႅင်းသေ ၸိူဝ်းလႆႈၸိူင်ႉၵၢတ်ႈ ႁၢမ်းသုၼ်ႇ ႁပ်ႉပီၼႆႉ မီးၼမ်ဝႃႈၼႆ။

ပေႃးထိုင်မႃး ဝၼ်းတီႈ 12-13/12/2020 ၼႆႉ သင်ၶတႆး လုၵ်ႈႁဵၼ်းၸၼ်ႉၸွမ် မိူင်း ၵွၵ်ႇ ဢၼ်ႁဵၼ်းယဝ်ႉ ၸၼ်ႉ B.A, M.A  တေၶဝ်ႈႁပ်ႉၸုမ်ႈၶူး တီႈၸၼ်ႉၸွမ်မႁႃၸူႊလႃႊလူင်ႊၵွၼ်ႊ ဝင်ႊၼွႆႉ ဢယုတ်ႉထ ယႃး ၸိုင်ႈထႆး တင်းမူတ်း မီးသဵၼ်ႈမၢႆ 66 တူၼ်/ၵေႃႉ ။ ၵူၺ်းၵႃႈ ယွၼ်ႉတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်းလႄႈ သင်ၶတႆး/ ၵူၼ်းႁိူၼ်း ဢၼ်တေၶဝ်ႈ ႁပ်ႉၸုမ်ႈၶူးပီၼႆႉ မီး 26 တူၼ်/ ၵေႃႉ ၵူၺ်း ဝႃႈၼႆ။

ၸဝ်ႈၶူး ပိုၼ်းၼုမ်ႇ ပၼ်ႇတိတ ႁူဝ်ပဝ်ႈ သင်ၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ လၢတ်ႈဝႃႈ – “ယွၼ်ႉ ၶူဝ်ႊ ဝိတ်ႉ 19  သေ သင်ၶၸဝ်ႈႁဝ်းၶႃႈ မၢင်တူၼ်သမ်ႉ ပွၵ်ႈမိူဝ်းမီးဝႆႉၼႂ်းမိူင်းတႆး  ပႆႇၸၢင်ႈၶဝ်ႈမႃး၊ မၢင်တူၼ်သမ်ႉ ၵႂႃႇႁဵၼ်းလိၵ်ႈဝႆႉတီႈသီႇႁူဝ်ႇထႅင်ႈလႄႈ  ၶဝ်ၸဝ်ႈ ၸိူဝ်းပႆႇၸၢင်ႈမႃးႁပ်ႉၼႆႉ တေၶၢႆႉၵႂႃႇ ႁပ်ႉပီၼႃႈၼႆၶႃႈယဝ်ႉ”- ဝႃႈၼႆ။

သင်ၶႃႈၸဝ်ႈၸိူဝ်းပႆႇၸၢင်ႈမႃးႁပ်ႉၸုမ်ႈၶူးပီ 2020 ၼႆႉ တင်းမူတ်း  မီး 20 တူၼ်ပၢႆ။ ၼႂ်းၼၼ်ႉ ပႃးၸဝ်ႈၶူး ႁဵၼ်းယဝ်ႉ ၸၼ်ႉ Ph.D တူၼ်ၼိုင်ႈ ဝႃႈၼႆ။

“တီႈၼႆႈၵေႃႈ မီးသင်ၶၸဝ်ႈႁဝ်း ထႅင်ႈ 2-3 တူၼ်ယူႇ ပႆႇၶဝ်ႈႁပ်ႉၸွမ်း ယွၼ်ႉၶေႃႈမုလ်းၶဝ်ၸဝ်ႈပႆႇတဵမ်ထူၼ်ႈလႄႈ တေ သုတ်ႉၶၢႆ ၵႂႃႇႁပ်ႉၼႂ်းပီၼႃႈ ၸွမ်းၸိူဝ်းပႆႇၸၢင်ႈမႃးႁပ်ႉပီၼႆႉ   ။ ၼႂ်းပီၼႆႉ ပႃးၸဝ်ႈၶူးႁဝ်းၶႃႈ တူၼ်ၼိုင်ႈ ဢၼ်ႁဵၼ်းယဝ်ႉ ၸၼ်ႉ Ph.D ပႆႇၸၢင်ႈမႃးႁပ်ႉ မၼ်းၸဝ်ႈသမ်ႉ မီးဝႆႉၼႂ်းမိူင်းလႄႈ ပႆႇၸၢင်ႈမႃး ” – ၸဝ်ႈၶူး ပိုၼ်းၼုမ်ႇ သိုပ်ႇလၢတ်ႈၼႄၼင်ႇၼႆ။

သင်ၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ ဢၼ်တေႁပ်ႉ တႃႇ 26 တူၼ်/ ၵေႃႉၼႆႉသမ်ႉ ၸၼ်ႉ M.A 3 တူၼ်။ လိူဝ်ၼၼ်ႉ ၸၼ်ႉ B.A 23 တူၼ်/ ၵေႃႉ။ သင်ၶၸဝ်ႈတင်းမူတ်း 20 တူၼ်၊ ၵူၼ်းႁိူၼ်း 6 ၵေႃႉ ၼႆယဝ်ႉ။

ၼွၵ်ႈလိူဝ်ၼၼ်ႉ ပေႃးထိုင်မႃး ဝၼ်းတီႈ 13/12/2020 ယၢမ်းၵၢင်ၼႂ် 8 မူင်း ထိုင် 2 မူင်းဝၢႆး တေၸတ်းႁဵတ်းပႃးပၢင်ႁူမ် ၸူမ်းႁပ်ႉတွၼ်ႈပီမႂ်ႇတႆး 2115 ၼီႈ၊ ယၢမ်းဝၢႆးဝၼ်း 2 မူင်းၶိုင်ႈ ထိုင် 5 မူင်းႁူဝ်ၶမ်ႈသမ်ႉ တေႁပ်ႉႁူမ်ၸူမ်းၸွမ်း ၽူႈႁပ်ႉ လႆႈၸုမ်ႈၶူး ၸိူဝ်းၼႆႉ။ ဢွင်ႈတီႈတႄႉ တေၸတ်းႁဵတ်းတီႈႁွင်ႈပၢင်ၵုမ် Zone B ၸၼ်ႉ 1 ၼႂ်းၸၼ်ႉၸွမ်မႁႃၸူႊလႃႊ လူင်ႊ ၵွၼ်ႊ ဢယုတ်ႉထယႃး ၸိုင်ႈတႆး ၼႆယဝ်ႉ။

ပီ 2020 ၼႆႉ ၸွမ်းၼင်ႇ သဵၼ်ႈသၢႆမၢႆ ဢၼ်လႆႈႁူႉဝႆႉတႄႉ သင်ၶတႆး ဢၼ်ႁဵၼ်းလိၵ်ႈဝႆႉတီႈ မိူင်းၵွၵ်ႇ ၸိုင်ႈထႆး ၼႂ်းၸၼ်ႉ B.A, M.A လႄႈ Ph.D   တင်းမူတ်းမီး 186 တူၼ်/ ၵေႃႉ ၼႆယဝ်ႉ။