ဢိင်ၼိူဝ် လွင်ႈၵူတ်ႇထတ်းထူပ်းႁၼ် ၽူႈၸၢႆးၵေႃႉၼိုင်ႈ ၵူၼ်းတႃႇၶီႈလဵၵ်း ဢၼ်ၵႂႃႇၶဝ်ႈႁူမ်ႈ ၼႂ်းဝၼ်းလိူၼ်သိပ်းသွင် မူၼ်း တီႈထမ်ႈမိူင်းၵႅတ်ႇၼၼ်ႉသေ ယူႇတီႈၸုမ်းပၢႆးယူႇလီ လႆႈလူင်းၵူတ်ႇထတ်း ပၢႆးယူႇလီပၼ် ၵူၼ်းမိူင်းၵႅတ်ႇ တႃႇ 30 ပၢႆ ဝႃႈၼႆ။

 ဝၼ်းတီႈ 4/12/2020 ယၢမ်းဝၢႆးဝၼ်း ယူႇတီႈၸုမ်းပၢႆးယူလီ မိူင်းသၢတ်ႇ ႁူမ်ႈၵၼ် လူင်းပိုၼ်ႉတီႈ ၵူတ်ႇထတ်းပၢႆး ယူႇလီပၼ် ၵူၼ်းဝၢၼ်ႈမိူင်းၵႅတ်ႇ တီႈၼႃႈထမ်ႈလူင်မႁႃမုၼိ ၸုမ်ႉမိူင်းၵႅတ်ႇ ၼႂ်းဢိူင်ႇမိူင်းၵႅတ်ႇ ၸႄႈဝဵင်းမိူင်းတူၼ် ၸႄႈ တွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း တႃႇႁူဝ်ၵူၼ်း 30 ပၢႆ ၼႆယဝ်ႉ။

တူႉဢိၼ်းၶမ်း ဝတ်ႉမိူင်းၵႅတ်ႇ လၢတ်ႈဝႃႈ – “မိူဝ်ႈၼႆႉ မေႃယႃၶဝ် မႃးၸီးၼမ်ႉမုၵ်ႈဢွၵ်ႇသေ ၵူတ်ႇထတ်း ၶဝ်ၸႂ်ႉၶိူင်ႈၵူတ်ႇ ထတ်းလၢႆးဝႆး လႆႈပႂ်ႉႁိုင် 15 မိၼိတ်ႉသေ ႁူႉၶေႃႈတွပ်ႇမၼ်းၵမ်းလဵဝ်ၶႃႈယဝ်ႉ ဝႃႈပဵၼ်ဢမ်ႇပဵၼ်ဢၼ်ဝႃႈၼၼ်ႉ။ ၵူၼ်းမႃး ၵူတ်ႇထတ်းတင်းမူတ်း မီး 30 ပၢႆ ၵမ်ႈၼမ် ပဵၼ်ထဝ်ႈ ၵူၼ်းၼုမ်ႇၵေႃႈပႃးယူႇ။ ၼႂ်းၵူၼ်းၵူတ်ႇထတ်းတၢင်းပဵၼ်ၼႆႉ ဢမ်ႇ ထူပ်းႁၼ် ၸိူဝ်ႉမႅင်းသေၵေႃႉ”- ဝႃႈၼႆ။

မိူဝ်ႈဝၼ်းတီႈ 26-28/11/2020 ၼၼ်ႉ မီးၵူၼ်းတႃႇၶီႈလဵၵ်းၵေႃႉၼိုင်ႈ ပဵၼ်ၽူႈၸၢႆး ၵႂႃႇၶဝ်ႈႁူမ်ႈလူႇတၢၼ်း ၼႂ်းဝၼ်းလိူၼ် သိပ်းသွင်မူၼ်း တီႈထမ်ႈမိူင်းၵႅတ်ႇၼၼ်ႉသေ မိူဝ်ႈမႃးဝၼ်းတီႈ 30/11/2020 လႆႈႁူႉဝႃႈ တိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 ယွၼ်ႉၼၼ်လႄႈ တီႈၼၼ်ႈသမ်ႉ မီးပီႈၼွင်ႉတီႈၸမ်ၵႆၵႂႃႇၶဝ်ႈႁူမ်ႈလူႇတၢၼ်းၼမ်လၢႆ ဝႃႈၼႆ။

ထႅင်ႈပိူင်ၼိုင်ႈၵေႃႈ ဢွင်ႈတီႈၼၼ်ႈသမ်ႉ ပဵၼ်ဢွင်ႈတီႈ ၸဝ်ႈသိလ်ထမ်းၶူးဝႃးဝုၼ်းၸုမ်ႉ ၶဝ်ႈထမ်ႈတိုဝ်းၵမ်သိလ် တႃႇ ၶၢဝ်းတၢင်း 3 ပီ 3 လိူၼ်ပၢႆ 3 ဝၼ်း  ။