ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19  တင်းမူတ်းမီးၵႂႃႇ 33 ၵေႃႉယဝ်ႉ ဝႃႈၼႆ။

ၼႂ်းၵူၼ်းမိူင်း 33 ၵေႃႉ ဢၼ်ၵူတ်ႇထတ်းထူပ်းႁၼ် ၸိူဝ်ႉမႅင်းၶူဝ်ႊဝိတ်ႉ 19 တီႈၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇၼႆႉ တႃႇ 32 ၵေႃႉတႄႉ ယႃၶႅၼ်းယဝ်ႉသေ လႆႈၶႂၢင်ႉလူင်းႁူင်းယႃယဝ်ႉ။ ၵိုတ်းထႅင်ႈၵေႃႉၼိုင်ႈ တိုၵ်ႉသိုပ်ႇယူတ်းယႃတူဝ် ဝႆႉတီႈ ႁူင်းယႃမူႇၸေႊယူႇ ၼႆယဝ်ႉ။

Dr. ႁၢၼ်ႇၼၢႆႇၸူဝ်း ၽူႈၵွၼ်းႁူင်းယႃ ဝဵင်းမူႇၸေႊ လၢတ်ႈဝႃႈ – “ၵူၼ်းၸပ်းတၢင်းပဵၼ် မီး 33 ၵေႃႉ။ ၼႂ်းၼၼ်ႉ တႃႇ 32 ၵေႃႉတႄႉ လူင်းႁူင်းယႃၵႂႃႇယဝ်ႉ။ ယၢမ်းလဵဝ် ဢၼ်ယူတ်းယႃတူဝ်ဝႆႉတီႈႁူင်းယႃၼႆႉ ၵိုတ်းထႅင်ႈၵေႃႉၼိုင်ႈၵူၺ်းယဝ်ႉၶႃႈ။ ဢၼ်ယူတ်းယႃတူဝ်ဝႆႉၼႆႉတႄႉ ငဝ်းလၢႆးၶႅမ်ႉမႃးယူႇ။ ဢမ်ႇပႆႇမီးလွင်ႈလၢၵ်ႇလၢႆးသင်ထႅင်ႈၶႃႈ”- ဝႃႈၼႆ။

ၵမ်ႈၼမ် ၵူၼ်းမူႇၸေႊ မႆႈၸႂ်ၵၼ်ဝႃႈ ယၢမ်းလဵဝ်ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 တီႈမူႇၸေႊၼႆႉ ယွမ်းမႃးယဝ်ႉ သေတႃႉ   ပေႃးသွင်ၸိုင်ႈမိူင်းတူၵ်းလူင်း ပိုတ်ႇၽၵ်းတူမိူင်းပၼ်ၵူၼ်းၶဝ်ႈဢွၵ်ႇၵႂႃႇမႃးၸွမ်းလႅၼ်လိၼ်ၶိုၼ်းၸိုင် ၵူဝ်တၢင်းပဵၼ်ၶိုၼ်းၽႄႈလၢမ်းၼမ်မႃးထႅင်ႈ ဝႃႈၼႆ။

“ဢၼ်လွင်ႈယႂ်ႇတႄႉ လူဝ်ႇၶတ်းၸႂ်ႁဵတ်းၸွမ်းၼင်ႇပၵ်းပိူင်ၶေႃႈပိုၼ်ၽၢဝ်ႇ ဢၼ်ႁွင်ႈၵၢၼ်ၾၢႆႇပၢႆးယူႇလီလႄႈ ၾၢႆႇလူင် ပွင်ၸိုင်ႈၶဝ် တမ်းဝၢင်းဝႆႉပၼ်ၼၼ်ႉ လီလီၵူၺ်းယဝ်ႉ။ ပေႃးဝႃႈ ၵူၼ်းမိူင်း  ဢမ်ႇၶတ်းၸႂ်ႁဵတ်းၸွမ်းတႄႉ ၾၢႆႇႁဝ်း ၶႃႈ မေႃယႃၵူၺ်း ႁႄႉၵင်ႈယူတ်းယႃယူႇတၢၼ်ႇႁိုဝ်ၵေႃႈ တၢင်းပဵၼ်ၼႆႉ တေဢမ်ႇမူတ်းႁၢႆၵႂႃႇလႆႈၶႃႈ”- Dr. ႁၢၼ်ႇၼၢႆႇၸူဝ်း သပ်း လႅင်းလၢတ်ႈၼႄၼင်ႇၼႆ။

ၵူၼ်းတိတ်းၸပ်းတၢင်းပဵၼ် ၶူဝ်ႊဝိတ်ႉ 19 ဢၼ်ၵူတ်ႇထတ်းႁၼ် တီႈမူႇၸေႊၼႆႉ ၵမ်ႈၼမ် ပဵၼ်ၵူၼ်းလုၵ်ႉတၢင်ႇတီႈ  မႃး၊ ၵူၼ်းၼႂ်းပိုၼ်ႉတီႈ ဢၼ်တိတ်းၸပ်းတၢင်းပဵၼ်ၵမ်းသိုဝ်ႈတႄႉ ဢမ်ႇမီးၼမ် ၵူၼ်းပိုၼ်ႉတီႈမူႇၸေႊ လၢတ်ႈၼႄၼင်ႇ ၼႆ။

ယၢမ်းလဵဝ် တီႈဝဵင်းမူႇၸေႊၼႆႉ ၵူၼ်းၶဝ်ႈၵၵ်းတူဝ် Quarantine မီးဝႆႉ 47 ၵေႃႉသေ ဢၼ်တိုၵ်ႉယူတ်းယႃတူဝ်ဝႆႉ မီး 1 ၵေႃႉ  ။

ၼႂ်းမိူင်းႁူမ်ႈတုမ် ပတ်းပိုၼ်ႉ ၵူၼ်းမိူင်း ဢၼ်တိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 တင်းမူတ်းမီး 93,600 ၵေႃႉ၊ ယူတ်းယႃ 19,001 ၵေႃႉ၊ ယႃၶႅၼ်း 72,601 ၵေႃႉလႄႈ လူႉတၢႆ 1,998 ၵေႃႉ ယူႇတီႈႁွင်ႈၵၢၼ်ပၢႆးယူႇလီ မိူင်းႁူမ်ႈတုမ် ပိုၼ်ၽၢဝ်ႇဢွၵ်ႇ ဝႆႉၼင်ႇၼႆ။