ၵူၼ်းမိူင်းၽျၢၵ်ႈ ပွတ်းဢွၵ်ႇၶူင်း ၵူဝ်ၸိူဝ်ႉမႅင်းၶူဝ်ႊဝိတ်ႉ 19 လၢမ်းၽႄႈတိတ်းၸပ်းၵၼ်ၼႆသေ မၢင်မူႇဝၢၼ်ႈ ဢွၼ်ၵၼ်ဢိုတ်း ပိၵ်ႉပႅတ်ႈ ႁၢမ်ႈႁႄႉၵူၼ်းၼွၵ်ႈဝၢၼ်ႈၶဝ်ႈ ဝႃႈၼႆ။
မိူဝ်ႈၼႆႉ ဝၼ်းတီႈ 3/12/2020 တီႈဝၢၼ်ႈသႃ ၸႄႈဝဵင်းမိူင်းၽျၢၵ်ႈ ၸႄႈတွၼ်ႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ဢိုတ်း ပိၵ်ႉဝၢၼ်ႈ ႁၢမ်ႈၵူၼ်းတၢင်ႇတီႈသီႇလႅၼ် ၶဝ်ႈၼႂ်းမူႇဝၢၼ်ႈယဝ်ႉ ယွၼ်ႉၵူဝ်တိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ၵၼ် ၼႆယဝ်ႉ။
ၸၢႆးသုၵ်း ၵူၼ်းဝၢၼ်ႈသႃ ၸႄႈဝဵင်းမိူင်းၽျၢၵ်ႈ လၢတ်ႈဝႃႈ – “မိူဝ်ႈၼႆႉတႄႉ တီႈဝၢၼ်ႈၶႃႈၶဝ် လႆႈဢိုတ်းပိၵ်ႉယဝ်ႉၶႃႈ။ ၵွပ်ႈ ပိူဝ်ႈဝႃႈ တၢင်းတႃႈၶီႈလဵၵ်းၼၼ်ႉ မီးၵူၼ်းပဵၼ်ၼမ်လႄႈ ယွၼ်ႉၼၼ် ဢမ်ႇၶႂ်ႈပၼ်ၵူၼ်းၼွၵ်ႈဝၢၼ်ႈ တၢင်ႇတီႈတၢင်ႇ တၢင်းၶဝ်ႈမႃး ဢိုတ်းပိၵ်ႉသေ ရူတ်ႉၵႃးၵေႃႈ ဢမ်ႇပၼ်ၶဝ်ႈမႃးၶႃႈ” – ဝႃႈၼႆ။
မိူဝ်ႈပူၼ်ႉမႃး လၢႆဝၼ်းၼႆႉ တီႈဝၢၼ်ႈပႃႇသၢင်း တင်းဝၢၼ်ႈပႃႇၶၢမ်ၵေႃႈ လႆႈဢိုတ်းပိၵ်ႉဝႆႉ ၸူဝ်ႈၶၢဝ်းယဝ်ႉ တွၼ်ႈတႃႇၵႅတ်ႈ ၶႄႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ပေႃးတေဢမ်ႇမႃးၽႄႈလၢမ်းၼႂ်းမူႇဝၢၼ်ႈၼၼ်ႉ ဝႃႈၼႆ။
“လွင်ႈဢိုတ်းပိၵ်ႉမူႇဝၢၼ်ႈၽႂ်မၼ်းၼၼ်ႉ ဢမ်ႇၸႂ်ႈယူႇတီႈတၢင်းၼိူဝ်ၸီႉသင်ႇလူင်းမႃး မၼ်းယူႇတီႈၵူၼ်း ဝၢၼ်ႈၽႂ်မၼ်း သေ ပိၵ်ႉၵူၺ်း။ လွင်ႈပိၵ်ႉၼႆႉတႄႉ ပေႃးဝႃႈ ဝၢၼ်ႈလႂ်ၵူဝ်ၼႆၵေႃႈ ပိၵ်ႉႁဵတ်းၼႆၵူၺ်းၶႃႈ။ မိူဝ်ႈလဵဝ် တီႈမိူင်းၽျၢၵ်ႈၼႆႉ ဢွၼ် ၵၼ် ၵူဝ်ၶႃႈဢေႃႈ မိူဝ်ႈၼႆႉ ၼႂ်းၵၢတ်ႇဢမ်ႇမီးၵူၼ်းၶႃႈ”- ၵူၼ်းပိုၼ်ႉတီႈ မိူင်းၽျၢၵ်ႈၵေႃႉၼိုင်ႈလၢတ်ႈၼႄၼင်ႇၼႆ။
မိူဝ်ႈဝႃး ဝၼ်းတီႈ 2/12/2020 တီႈမိူင်းၽျၢၵ်ႈလႆႈၵူတ်ႇထတ်းထူပ်းႁၼ် ၵူၼ်းတိတ်း ၸပ်းၶူဝ်ႊဝိတ်ႉ 19 တင်းမူတ်း 2 ၵေႃႉ ပဵၼ်ၼၢင်းယိင်း တင်းသွင်ၵေႃႉ။ ယၢမ်းလဵဝ် တူဝ်ၵူၼ်းပဵၼ်သွင်ၵေႃႉၼၼ်ႉ လႆႈၵၵ်းတူဝ်ယူႇဝႆႉၼႂ်းႁူင်းယႃမိူင်းၽျၢၵ်ႈဝႆႉ ယဝ်ႉ ဝႃႈၼႆ။
သင်ဝႃႈ ၵူၼ်းမိူင်းၽျၢၵ်ႈ ဢမ်ႇၼၼ် ၵူၼ်းၼုမ်ႇ ၸိူဝ်းၵႂႃႇႁဵတ်းၵၢၼ် တီႈတႃႈၶီႈလဵၵ်းသေ ပွၵ်ႈမႃးၶိုၼ်းၸိုင် ယူႇတီႈဝၢၼ်ႈ လႂ် ဝၢၼ်ႈၼၼ်ႉ တေပႆႇပၼ် ၶဝ်ႈယူႇ ၼႂ်းဝၢၼ်ႈၵမ်းလဵဝ် ႁႂ်ႈယူႇဝႆႉၼွၵ်ႈဝၢၼ်ႈ 14-15 ဝၼ်း ဢမ်ႇၼၼ် 21 ဝၼ်းသေ သင်ဝႃႈ ဢမ်ႇမီးတၢင်းပဵၼ်ၶူဝ်ႊဝိတ်ႉ 19 ၸိုင် ၸင်ႇတေပၼ်ၶႂၢင်ႉၶဝ်ႈယူႇၼႂ်းမူႇဝၢၼ်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ