ၵူၼ်းမႃးပဵၼ်ၶႅပ်းမႄး ၵေႃႉၼိုင်ႈ တိတ်းၸိူဝ်ႉမႅင်းၶူဝ်ႊဝိတ်ႉ-19 လႄႈ ၽူႈၵွၼ်းႁူင်းတွတ်ႈၶႅပ်းၵၢင်ၸႂ်တင်း ၸုမ်းၽူႈမီးပုၼ်ႈၽွၼ်း တီႈႁူင်းတွတ်ႈၶႅပ်းၵၢင်ၸႂ် ဢိူင်ႇၼွင်ပိင်လူင် တီႈၼိုင်ႈ ႁူဝ် ၵူၼ်း 40 ပၢႆ လႆႈဢွၼ်ၵၼ်ၶဝ်ႈ Q (ၵၵ်းတူဝ်)ဝႆႉ ။
ဝၼ်းတီႈ 8/11/2020 ယၢမ်းၵၢင်ဝၼ်း ၵူၼ်းမိူင်းၵျွၵ်ႉမႄး ၵေႃႉၼိုင်ႈ မႃးတွတ်ႈၶႅပ်းၵၢင်ၸႂ် တီႈႁူင်းတွတ်ႈၶႅပ်းမၢႆ 1 ဢိူင်ႇ ၼွင်ပိင်လူင် ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၵူတ်ႇထတ်းထူပ်းႁၼ် တိတ်းၸပ်းၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 တီႈ တီႈၵဵတ်ႉလၢၼ်ႇၵူတ်ႇထတ်းပၢႆးယူႇလီ ၼိူဝ်သဵၼ်ႈတၢင်းလူင် ၼွင်ၶဵဝ် – ၵျွၵ်ႉမႄးၼၼ်ႉ ယၢမ်းလဵဝ် လႆႈၵုမ်းတူဝ်မၼ်းၸၢႆးဝႆႉ။ လိူဝ်ၼၼ်ႉ ၽူႈ ၵွၼ်းႁူင်းတွတ်ႈၶႅပ်းတင်းၵူၼ်းႁဵတ်းၵၢၼ် တီႈႁူင်းတွတ်ႈၶႅပ်းၼၼ်ႉၵေႃႈ လႆႈထုၵ်ႇၵုမ်းတူဝ်ဝႆႉ တင်းမူတ်း ၼႆယဝ်ႉ။
ၸၢႆးဢွင်ႇမိၼ်ႉ ၼေႃႇၽူႈတႅၼ်းသၽႃး ၵူၼ်းမိူင်း ၵျွၵ်ႉမႄး ဢၼ်လႆႈၶႅပ်းၵၢင်ၸႂ်ၼမ် တီႈသုတ်းၼၼ်ႉ လၢတ်ႈဝႃႈ – “ၵူၼ်း မႃးတွတ်ႈၼၼ်ႉ ပဵၼ်ၸဝ်ႈၵႃး မႃးတွတ်ႈၶႅပ်းၵၢင်ၸႂ် ယၢမ်းၵၢင်ဝၼ်း။ မိူဝ်ႈၽွင်းၼၼ်ႉ ၵူၼ်းမႃးပၼ်ၶႅပ်းတႄႉ တေဢမ်ႇ ပေႃးၼမ် တေမီးမွၵ်ႈ 4-5 ၵေႃႉၵူၺ်း။ ဝၢႆးမၼ်းမႃးတွတ်ႈယဝ်ႉ မၼ်းႁေႃႈၵႃးမိူဝ်းၵႂႃႇၶိုၼ်းတၢင်းၼွင်ၶဵဝ်သေ ၺႃးတီႈလၢၼ်ႇ ၵူတ်ႇထတ်းထူပ်း ႁၼ်မႅင်းၶႃႈဢေႃႈ။ တူဝ်မၼ်းၸၢႆးတႄႉ ၵုမ်းဝႆႉ တီႈၼွင်ၶဵဝ်ၶႃႈ။ ငဝ်းလၢႆးမၼ်း တႄႉဢမ်ႇဢွၵ်ႇၾၢင်ႁၢင်ႈႁၢဝ်ႈႁႅင်း ၼင်ႇၵဝ်ႇ ယၢမ်းလဵဝ်တႄႉ လႆႈၶဝ်ႈ Q (ၵၵ်းတူဝ်) ဝႆႉယဝ်ႉ”- ဝႃႈၼႆ။
ၵူၼ်းမိူင်းဢၼ်ၵူတ်ႇထတ်းထူပ်းႁၼ်ၼၼ်ႉ ပဵၼ်ၽူႈၸၢႆး၊ ပဵၼ်ၵူၼ်းႁေႃႈၵႃး ၵျွၵ်ႉမႄး ။ လိူဝ်ၼၼ်ႉ ၽူႈ ၵွၼ်းႁူင်းတွတ်ႈၶႅပ်းလႄႈ ၽူႈမီးပုၼ်ႈၽွၼ်းတီႈႁူင်းတွတ်ႈၶႅပ်းၼၼ်ႉ လႆႈၶဝ်ႈၵုမ်းတူဝ် Q ဝႆႉ တီႈၵျွၵ်ႉမႄး တင်းမူတ်း။
ၸၢႆးဢွင်ႇမိၼ်ႉ သိုပ်ႇလၢတ်ႈဝႃႈ – “မိူဝ်ႈၼႆႉတႄႉ တေသူင်ႇၼမ်ႉမုၵ်ႈၼမ်ႉလၢႆးၶဝ်ၵူတ်ႇထတ်း ၶႃႈ ဢေႃႈ သင်ဝႃႈ ဢမ်ႇမီးၸိူဝ်ႉမႅင်းၼႆၸိုင် တေပၼ်ၶႂၢင်ႉမိူဝ်းၵုမ်းတူဝ်ယူႇဝႆႉတီႈႁိူၼ်းယေးၽႂ်မၼ်းၶႃႈဢေႃႈ” – ဝႃႈၼႆ။
ယၢမ်းလဵဝ် ၵူၼ်းမိူင်းတႆး တိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တင်းမူတ်း မီး 100 ပၢႆ လူႉတၢႆ 1 ၵေႃႉ ၼႆယဝ်ႉ။
လိူဝ်ၼၼ်ႉ ၼႂ်းမိူင်းႁူမ်ႈတုမ်သမ်ႉ 61,975 ၵေႃႉ၊ ယူတ်းယႃ 13,877 ၵေႃႉ၊ ယႃၶႅၼ်း 46,661 ၵေႃႉ၊ လူႉတၢႆ 1,437 ၵေႃႉ ႁွင်ႈ ၵၢၼ်ပၢႆးယူႇလီ မိူင်းႁူမ်ႈတုမ် ဢွၵ်ႇဝႆႉၼင်ႇၼႆ။
