ပၢင်တွတ်ႈၶႅပ်း ဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉၼၼ်ႉ ၵူၼ်းၵႂႃႇတွတ်ႈၶႅပ်း လႆႈယူႇဢိူမ်ႈၸမ် သိပ်ႉၵၼ်ႁႅင်း၊ ဢမ်ႇၸွမ်းပိူင် လၢႆး ၵႅတ်ႇၵင်ႈတၢင်းပဵၼ်ၶူဝ်ႊဝိတ်ႉ ၼႆယဝ်ႉ။
ဝၼ်းတွတ်ႈၶႅပ်းၵၢင်ၸႂ် မိူင်းႁူမ်ႈတုမ်ပတ်းပိုၼ်ႉ 08/11/2020 မိူဝ်ႈၼႆႉ တီႈပၢင်တွတ်ႈၶႅပ်းၵၢင်ၸႂ် ဝၢၼ်ႈၼႃးမၢၵ်ႇၶေႃ ဢိူင်ႇၼႃးမၢၵ်ႇၶေႃ ၼႂ်းၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇၼၼ်ႉ မီးၵူၼ်းဝၢၼ်ႈၼပ်ႉႁူဝ်ႁဵင် ၵႂႃႇတွတ်ႈၶႅပ်းၵၢင်ၸႂ်။ ၽွင်းၶဝ်ႈထႅဝ် ပႂ်ႉတွတ်ႈၶႅပ်းၵၢင်ၸႂ်ၼၼ်ႉ ၵူၼ်းၼမ်လိူဝ်ႁႅင်း၊ ႁဵတ်းႁႂ်ႈ ဢမ်ႇၸၢင်ႈႁဵတ်းၸွမ်း ပိူင်ၵႅတ်ႇၵင်ႈတၢင်းပဵၼ်ၶူဝ်ႊဝိတ်ႉ 19 ၊ ဢမ်ႇၸၢင်ႈ ယူႇႁၢင်ႇယၢၼ်ၵၼ်လႄႈ ၵူၼ်းဝၢၼ်ႈမႆႈၸႂ် ၵူဝ်တိတ်းၸပ်းၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 ၵၼ်၊ ၵူၺ်းၵႃႈ ၵွပ်ႈပိူဝ်ႈမီးပုၼ်ႈၽွၼ်းလႄႈ ၵႃႈလႆႈၵႂႃႇတွတ်ႈၶႅပ်းၵၢင်ၸႂ် ၼႆယဝ်ႉ။
ၵူၼ်းၼုမ်ႇ ၾၢႆႇၸွႆႈထႅမ်ၵၢၼ်တွတ်ႈၶႅပ်းၵၢင်ၸႂ် ၵေႃႉၼိုင်ႈလၢတ်ႈဝႃႈ- “ပီၼႆႉ ဢမ်ႇမီးပၢင်သွၼ် ပၼ်တၢင်းႁူႉၵၢၼ်တွတ်ႈၶႅပ်းၵၢင်ၸႂ် (Voter education) ၊ ၵွပ်ႈပိူဝ်ႈဢမ်ႇမီး ဢမ်ႇတူဝ်ႈတၼ်းလႄႈ ၵူၼ်းဝၢၼ်ႈဢမ်ႇႁူႉလွၵ်းလၢႆးတွတ်ႈၶႅပ်းၵၢင်ၸႂ်၊ ႁဵတ်းႁႂ်ႈၾုင်ၵူၼ်းၼမ်သေ ၵၢၼ်တွတ်ႈၶႅပ်းၼၢၼ်း ယဝ်ႉတူဝ်ႈ၊ တေႃႇထိုင်ၵၢင်ဝၼ်းပေႃးတဵင်ႈယဝ်ႉၵေႃႈ ဢမ်ႇပႆႇယဝ်ႉ၊ တိုၵ်ႉလႆႈယူႇၼႂ်းလႅတ်ႇမႆႈၵၼ်ယူႇ” ဝႃႈၼႆ။
ပၢင်တွတ်ႈၶႅပ်း တီႈၼႃးမၢၵ်ႇၶေႃၼႆႉ ၵူၼ်းဝၢၼ်ႈၵေႃႈၽႅဝ်မႃးၼမ်သေ လႆႈမႃးတၢၵ်ႇလႅတ်ႇဝႆႉ၊ ၵမ်းလိုၼ်းမႃး ဢမ်ႇၶၢမ်ႇလႆႈလႅတ်ႇမႆႈသေ ဢွၼ်ၵၼ်ၵႂႃႇယူႇတီႈႁူမ်ႈ၊ မိူဝ်ႈၵႂႃႇယူႇတီႈႁူမ်ႈယဝ်ႉၵေႃႈ ၵႂႃႇယူႇထီႇဢိပ်ႉၵၼ်ႁႅင်း၊ ယွၼ်ႉပိူဝ်ႈဢွင်ႈတီႈၵိတ်ႇၵႅပ်ႈသေ ဢမ်ႇၸၢင်ႈ ယူႇႁၢင်ႇယၢၼ်ၵၼ် ၸွမ်းပိူင်လၢႆးတၢင်းၵႅတ်ႇၵင်ႈၶူဝ်ႊဝိတ်ႉ ၼႆယဝ်ႉ။
လၢႆးၵႅတ်ႇၵင်ႈတၢင်းပဵၼ်ၶူဝ်ႊဝိတ်ႉ 19 ၼႆႉ တေလႆႈၵႆႉၵႆႉလၢင်ႉ/သုၵ်ႈမိုဝ်း၊ မိူဝ်ႈဢွၵ်ႇၼွၵ်ႈႁိူၼ်း ၵႂႃႇၵႄႈၵူၼ်းၼမ်ၸိူဝ်းၼႆႉ သႂ်ႇၽႃႈတူမ်းပၢၵ်ႇ/ၶူႈၼင်၊ ဢမ်ႇၸမ်ပဵၼ် ဢမ်ႇၵႂႃႇတီႈၵူၼ်းၶွၼ်ႈၼမ်၊ ငိူင်ႉဝႄႈပွႆးလၢမ်း ၸိူဝ်းၼႆႉ။ မိူဝ်ႈၵႂႃႇတၢင်းၼွၵ်ႈ ၶဝ်ႈၵႄႈၵူၼ်းၼမ်ၵေႃႈ ၵေႃႉၼိုင်ႈလႄႈၵေႃႉၼိုင်ႈ တေလႆႈယူႇႁၢင်ႇယၢၼ်ၵၼ်ဢမ်ႇယွမ်း 2 မဵတ်ႉ/ပေႇ ၸိူဝ်းၼႆႉ။
