ပၢင်တွတ်ႈၶႅပ်းၵၢင်ၸႂ် 08/11/2020 မိူဝ်ႈၼႆႉ တီႈဝဵင်းပၢင်လူင် ၸႄႈဝဵင်းလွႆလႅမ် ၸိုင်ႈတႆးပွတ်းၸၢၼ်း ၼၼ်ႉ ၵူၼ်းဝၢၼ်ႈၵူၼ်းမိူင်း လႆႈတွတ်ႈၸွမ်းၼင်ႇၵၢင်ၸႂ် ထၢင်ႇႁၢင်ႈလွတ်ႈလႅဝ်း ၼႆယဝ်ႉ။

ၵၢင်ၸႂ်ၵူၼ်းမိူင်း ၽူႈၵႂႃႇတွတ်ႈၶႅပ်းၵၢင်ၸႂ်မိူဝ်ႈၼႆႉ ၼၢင်းမူဝ် ပွၵ်ႉ 4  တုမ်ႇမူဝ် ဝဵင်းပၢင်လူင် လၢတ်ႈတီႈၽူႈတွႆႇႁွၵ်ႈဝႃႈ- “ၼႂ်ၼႆႉႁဝ်းၶႃႈမႃးၸဵမ်မိူဝ်ႈ 5 မူင်းၶိုင်ႈ၊ ဢမ်ႇမီးတၢင်းယၢပ်ႇၽိုတ်ႇသင် ၶႅမ်ႉလႅပ်ႈၵူႈပိူင်၊ ပွၵ်ႈၼႆႉ သႂ်ႇပၼ်ႁူဝ်သိူဝ်တင်း 3 ဢၼ် မိူၼ်မိူဝ်ႈယၢမ်ႈသႂ်ႇပူၼ်ႉမႃး။ ၵႃႈပူၼ်ႉမႃး ၵူၼ်းၼႂ်းပွၵ်ႉႁဝ်းၼႆႉ ၼမ်ႉလႄႈၾႆးၼႆႉ ႁဝ်းၶႃႈၵိၼ်းဢိတ်းၼိုင်ႈ၊ ၶႂ်ႈႁႂ်ႈလူင်ပွင်ၸိုင်ႈမႂ်ႇ ဢၼ်တေၶိုၼ်ႈမႃးၼႆႉ ၶႂ်ႈႁႂ်ႈမႃးၸွႆႈပၼ်လွင်ႈၼမ်ႉလွင်ႈၾႆး” ဝႃႈၼႆ။

တၢင်းၼႂ်းႁူင်းတွတ်ႈၶႅပ်း မီးၸဝ်ႈၼႃႈတီႈၽူႈမီးပုၼ်ႈၽွၼ်းလႄႈ ၵူၼ်းၼႂ်းပွၵ်ႉယွမ်ႇ ၽူႈမီးပုၼ်ႈၽွၼ်း ပႂ်ႉႁူင်းတွတ်ႈၶႅပ်းဝႆႉ။ ပိူဝ်ႈတႃႇၵႅတ်ႇၵင်ႈတၢင်းပဵၼ်ၶူဝ်ႊဝိတ်ႊ 19 ၼၼ်ႉ တၢင်းၼႂ်းႁူင်းတွတ်ႈၶႅပ်း မီးၵၢၼ်တႅၵ်ႈပၼ်လူမ်းမႆႈ၊ ၸႅၵ်ႇမႅင်ႇၽႃႈတူမ်းပၢၵ်ႇ/ၶူႈၼင် ဢိၵ်ႇ သိတ်းမႅင်ႇယႃႈလၢင်ႉမိုဝ်းၸိူဝ်းၼႆႉ။

ပႃႈၺုၼ်ႉ ပွၵ်ႉတုမ်ႇမူဝ် လၢတ်ႈဝႃႈ-“ၼႂ်ၼႆႉလုၵ်ႉမႃး 5 မူင်းၶႃႈဢေႃႈ၊ ဢမ်ႇမီးပၼ်ႁႃသင်ၶႃႈ လႆႈတွတ်ႈလွတ်ႈလွတ်ႈလႅဝ်းလႅဝ်းၵူၺ်းၶႃႈ၊ တွတ်ႈႁူဝ်သိူဝ်ၵူႈဢၼ်ၶႃႈ၊ ႁဝ်းၶႃႈႁၼ်ထိုင်ႁူဝ်သိူဝ်ၼႆႉ မၼ်းၸွႆႈထႅမ်ၵူၼ်းမိူင်းႁဝ်းၶႃႈဢေႃႈ၊ လူင်ပွင်ၸိုင်ႈဢၼ်တေၶိုၼ်ႈမႃးၼႆႉ မုင်ႈမွင်းႁႂ်ႈၵူၼ်းမိူင်းႁဝ်းၶႃႈ မီးသုၼ်ႇၽဵင်ႇပဵင်း၊ လႆႈထၢင်ႇႁၢင်ႈႁႃၵိၼ်လဵင်ႉတွင်ႉ” ဝႃႈၼႆ။

ႁူင်းတွတ်ႈၶႅပ်းၵၢင်ၸႂ်မၢႆ 1 မၢႆ 2 တီႈဝဵင်းပၢင်လူင်ၼႆႉ ၸတ်းႁဵတ်းတီႈႁူင်းႁဵၼ်းၸၼ်ႉၵၢင် မၢႆ 3 ပွၵ်ႉ 4 ဝဵင်းပၢင်လူင်။ ထႅင်ႈတီႈၼိုင်ႈပဵၼ်ႁူင်းႁဵၼ်းၵိဝ်ႇယူမ်း၊ မီးၵူၼ်းမႃးတွတ်ႈၶႅပ်းၵၢင်ၸႂ်ၼမ်တင်းၼမ် တင်းလၢႆ ၼႆယဝ်ႉ။ 

ႁူင်းတွတ်ႈၶႅပ်း ၸႄႈဝဵင်းလွႆလႅမ် ၵိင်ႇၸႄႈဝဵင်းပၢင်လူင်ၼႆႉ တင်းမူတ်းမီး 81 ႁူင်း- ၼႆယဝ်ႉ။