တပ်ႉသိုၵ်းလူင်ပွင်ၸိုင်ႈမၢၼ်ႈလႄႈ တပ်ႉသိုၵ်းတဢၢင်း ပိုတ်းယိုဝ်းၵၼ်ၼႂ်းၸေႈဝဵင်းလႃႈသဵဝ်ႈလႄႈ တုမ်ႉယွၼ်ႈၵူၼ်းဝၢၼ်ႈၼႂ်းဢိူင်ႇၼမ်ႉပွင်ႈ တႃႇသၢမ်ဝၢၼ်ႈ ႁူဝ်ၵူၼ်း 100 ပၢႆလႆႈပၢႆႈၽေးသိုၵ်း။

ပၢင်တိုၵ်းပဵၼ်ၼႂ်းဝၼ်းတီႈ 16/10/2020 ၵူၼ်းဝၢၼ်ႈၼႃးယႃႉ၊ ဝၢၼ်ႈၼႃးၸွၵ်ႇလႄႈ ၼႃးသၢင်းၶျႅင်း ၼႂ်းဢိူင်ႇၼမ်ႉပွင်ႈလႆႈပၢႆႈယၢၼ်ဝၢၼ်ႈ ၵႂႃႇသွၼ်ႈယူႇတီႈဝတ်ႉၵျွင်းမုၼ်ၸဝ်ႈ ဝတ်ႉၵၢင်ဝဵင်း (ပွၵ်ႉ 4) တီႈၼမ်ႉပွင်ႈ။

ၸၢႆးလႃႉထူၺ်း ၼေႃႇၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 1 ၸႄႈဝဵင်းလႃႈသဵဝ်ႈ လၢတ်ႈတီႈ ၽူႈတွႆႇႁွၵ်ႈဝႃႈ- “  ပၢင်တိုၵ်းၼႆႉ ဢမ်ႇပဵၼ်ၸမ်တၢင်း၊ သွင်ၾၢႆႇၽႃႇၺႃးၵၼ်ၼႂ်းထိူၼ်ႇသေ  တိုၵ်း  မွၵ်ႈၶိုင်ႈၸူဝ်ႈမူင်းပၢႆ။ ၵူၺ်းၵႃႈ မၼ်းၸမ်ဝၢၼ်ႈလႄႈ ၵူၼ်းမိူင်း ဢွၼ်ၵၼ်ၵူဝ်ႁႄသေ  ငိူင်ႉဝႄႈ ပၢႆႈၵႂႃႇသွၼ်ႈဝႆႉတီႈၵျွင်းမုၼ်ၸဝ်ႈ ” ဝႃႈၼႆ။

ဝၼ်းတီႈ 19/10/2020 မိူဝ်ႈဝႃးၼႆႉ ပၢင်တိုၵ်း ယဵၼ်ၵႂႃႇယဝ်ႉလႄႈ ဢွၼ်ၵၼ်ပွၵ်ႈမိူဝ်းႁိူၼ်းၶိုၼ်း ယဝ်ႉဝႃႈၼႆ။

ယၢမ်းလဵဝ် ၵူၼ်းပၢႆႈၽေးသိုၵ်းပွၵ်ႈၶိုၼ်းဝၢၼ်ႈၽႂ်မၼ်းယဝ်ႉသေတႃႉ   သိုၵ်းလူင်ပွင်ၸိုင်ႈမၢၼ်ႈ တင်းသိုၵ်းတဢၢင်း TNLA  တိုၵ်ႉတူင်ႉၼိုင်ၵႂႃႇမႃးႁိမ်းႁွမ်းဝၢၼ်ႈၼႃးယႃႉၸိူဝ်းၼၼ်ႉယူႇလႄႈ ၵူၼ်းမိူင်း မီးလွင်ႈမႆႈၸႂ် ၵူဝ် ပၢင်တိုၵ်းၶိုၼ်းပဵၼ်မႃးထႅင်ႈယူႇ ၼႆယဝ်ႉ။