ၽူႈၸၢႆးဢႃယု 19 ပီ ၵေႃႉၼိုင်ႈ ထုၵ်ႇသိုၵ်းလူင်ပွင်ၸိုင်ႈမၢၼ်ႈၼႄးဝႃႈ ပဵၼ်သိုၵ်းတႆးၼႆသေ ၸႅတ်ႈထၢမ် ပေႃႉထုပ်ႉ တီႉ ၺွပ်း ဢဝ်ၵႂႃႇ ၸွမ်းသၢႆသိုၵ်း ထိုင်ယၢမ်းလဵဝ် ပႆႇႁၼ်တူဝ် ပႆႇပွၵ်ႈၶိုၼ်ႈ တၢႆႁိုဝ်လိပ်း ဢမ်ႇႁူႉ ပေႃႈမႄႈပီႈၼွင်ႉၸိူဝ်းၵိုတ်းတၢင်းလင်  မႆႈၸႂ်။

ၸၢႆးမွင်ႇဢူး ဢႃယု 19 ပီ  ၵူၼ်းဝၢၼ်ႈၼႃး ၽိုင်ႈ ဢိူင်ႇၼွင်သိမ်ႇ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ထုၵ်ႇသိုၵ်းလူင်ပွင်ၸိုင်ႈမၢၼ်ႈ မၢပ်ႇၼႄးဝႃႈ ပဵၼ်ၵူၼ်းသိုၵ်း တႆးၼႆသေ ၸႅတ်ႈထၢမ်ပေႃႉထုပ်ႉ တီႉၺွပ်း ဢဝ်တူဝ်ၵႂႃႇ ၸဵမ်မိူဝ်ႈ ဝၼ်းတီႈ 9 ထိုင် 20/10/2020  ၶၢဝ်းတၢင်း 10 ဝၼ်းပၢႆ  ယင်းပႆႇပွႆႇပွၵ်ႈႁိူၼ်းၶိုၼ်း။

ပီႈၼွင်ႉ ၸၢႆးမွင်ႇဢူး ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈဝၼ်းတီႈ 14 ပူၼ်ႉမႃးၼႆႉ သိုၵ်းမၢၼ်ႈၶဝ်ပွင်ႇၶၢဝ်ႇမႃးတီႈၵူၼ်းလူင် ၼႂ်းဝၢၼ်ႈဝႃႈ မၼ်းပၢႆႈလွတ်ႈၵႂႃႇယဝ်ႉၼႆဝႃႇ ၵူၺ်းၵႃႈ ထိုင်ယၢမ်းလဵဝ် ပႆႇႁၼ်မၼ်းပွၵ်ႈမႃးထိုင်ႁိူၼ်းၶိုၼ်း၊ ပႆႇမီးၽႂ်လႆႈၶၢဝ်ႇငၢဝ်းမၼ်း ဝႃႈ တၢႆႁိုဝ်လိပ်း ။ ၵွပ်ႈၼႆလႄႈ ၸိူဝ်းပဵၼ်ပီႈၼွင်ႉ ပေႃႈမႄႈတႄႉ မႆႈၸႂ်တႄႉတႄႉၶႃႈဢေႃႈ” – ဝႃႈၼႆ။

ပိူင်ပဵၼ်မၼ်း မိူဝ်ႈဝၼ်းတီႈ 9/10/2020 ယၢမ်းဝၢႆးဝၼ်း 4 မွင်းၶိုင်ႈၼၼ်ႉ မၼ်းၸၢႆးလုၵ်ႉတီႈႁိူၼ်းဝၢၼ်ႈၼွင်သိမ်ႇသေ တေၵႂႃႇပႂ်ႉ သူၼ်ႁႆႈ ၵႂႃႇထူပ်းၺႃးသၢႆသိုၵ်းမၢၼ်ႈ ၾၢႆႇႁွင်ႇဝၢၼ်ႈၼႃးၽိုင်ႈ။ သိုၵ်းမၢၼ်ႈ ၸႅတ်ႈထၢမ်မၼ်းၸၢႆး၊ သွၵ်ႈတူၺ်းၸွမ်းထူင်ၸွမ်းထွင်းမၼ်း ႁၼ်ၾူၼ်း (မိုဝ်းထိုဝ်) မၼ်းၸၢႆးသေ  ပိုတ်ႇတူၺ်း။ ၼႂ်းၾူၼ်း(မိုဝ်းထိုဝ်)ၼၼ်ႉသမ်ႉႁၼ်ၶႅပ်းႁၢင်ႈမၼ်းၸၢႆးသႂ်ႇၶူဝ်းသိုၵ်းတႆး ဝႆႉလႄႈ သိုၵ်းမၢၼ်ႈၼႄးဝႃႈ ပဵၼ်သိုၵ်းတႆးၼႆသေတီႉၺွပ်းၵႂႃႇၸွမ်းသၢႆသိုၵ်း ဝႃႈၼႆ။

ၸၢႆးႁေႃသႅင် ၽူႈၶၢၼ်ပၢၵ်ႇ ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး SHRF လၢတ်ႈဝႃႈ – “ မၼ်းၸၢႆးႁၢႆၵႂႃႇၼႆႉ ထိုင်ယၢမ်းလဵဝ် ပႆႇငိၼ်းၶၢဝ်ႇသင်။ ထႅင်ႈတၢင်းၼိုင်ႈၵေႃႈ သိုၵ်းမၢၼ်ႈၼႆႉ တိုၵ်ႉႁွၼ်ႈထဝ်ႇယူႇၸွမ်းတူင်ႇတၢင်ႇၸိူဝ်းၼၼ်ႉလႄႈ ၵူၼ်း ဝၢၼ်ႈ တေဢွၼ်ၵၼ်ၵႂႃႇႁႃၼႆၵေႃႈ တိုၵ်ႉလႆႈၵူဝ်ဝႆႉယူႇ။ လွင်ႈၼႆႉ တေလႆႈဝႃႈ သိုၵ်းမၢၼ်ႈၶဝ် ပူၼ်ႉပႅၼ် သုၼ်ႇလႆႈၵူၼ်း ၶႃႈဢေႃႈ လႃႈလီႈ တီႉၵႂႃႇၸိူင်ႉၼႆ မၼ်းၸႂ်ႈသိုၵ်းတႄႉႁႃႉ ဢမ်ႇၸႂ်ႈတႄႉၼႆၼၼ်ႉ ၶဝ်လူဝ်ႇလႆႈၸွပ်ႇႁႂ်ႈႁူႉလီလီ။ ယၢမ်းလဵဝ် မၼ်းၸၢႆးတၢႆႁိုဝ်လိပ်းဢၼ်ဝႃႈၼၼ်ႉ ၽႂ်ၵေႃႈ ဢမ်ႇႁူႉ ။ ႁူႉဝႃႈ ၵႂႃႇၸွမ်းသၢႆသိုၵ်းမၢၼ်ႈ တီႉၵႂႃႇၼၼ်ႉၵူၺ်း” – ဝႃႈၼႆ။

ဢိင်ၼိူဝ်လွင်ႈၼႆႉ ယူႇတီႈၵူၼ်းဝၢၼ်ႈလႄႈသင်ၶၸဝ်ႈ ၵႂႃႇထူပ်းတပ်ႉသိုၵ်းမၢၼ်ႈသေ လၢတ်ႈဝႃႈ မၼ်းၸၢႆးၼႆႉ ပဵၼ်ၵူၼ်းမိူင်း ၵူၺ်း ဢမ်ႇၸႂ်ႈၵူၼ်းသိုၵ်း။ သိုၵ်းမၢၼ်ႈၶိုၼ်းတွပ်ႇဝႃႈ တေဢမ်ႇႁဵတ်းသင်တီႈမၼ်း တေဢဝ်မၼ်းႁဵတ်းၵူၼ်းသူင်ႇတၢင်း ပၼ်ၵူၺ်းၼႆသေ ႁွင်ႉၵႂႃႇ – ပီႈၼွင်ႉၸၢႆးမွင်ႇဢူး လၢတ်ႈၼႄၼင်ႇၼႆ။  

မိူဝ်ႈဝၼ်းတီႈ 10/10/2020 ယၢမ်းၵၢင်ၼႂ် 7 မူင်းၼၼ်ႉ တပ်ႉၸုမ်းၼႆႉ ၶိုၼ်းဢဝ်တူဝ်မၼ်းၸၢႆးမႃးၶိုၼ်း တီႈဝၢၼ်ႈၼႃး ၽိုင်ႈသေ မႃးသွၵ်ႈတဝ်တီႈ ႁိူၼ်းမၼ်းထႅင်ႈၵမ်းၼိုင်ႈ။ ၶိုၼ်းပွၵ်ႈမိူဝ်းၼွၼ်းတီႈဝၢၼ်ႈသၢမ်ပူးထႅင်ႈၶိုၼ်းၼိုင်ႈ။ ဝၢႆးၼၼ်ႉ ၵူၼ်းဝၢၼ်ႈၵေႃႈ ဢမ်ႇလႆႈၶၢဝ်ႇမၼ်းၸၢႆး ထိုင်မႃးဝၼ်းတီႈ 14 လႆႈငိၼ်းဝႃႈမၼ်းၸၢႆးပၢႆႈလွတ်ႈယဝ်ႉ ၼႆၼၼ်ႉၵူၺ်း ဝႃႈ ၼႆ။

ၸၢႆးမွင်ႇဢူးၼႆႉ ပဵၼ်လုၵ်ႈၸၢႆးလုင်း ပၼ်ႇၸိၵ်ႉတ လႄႈပႃႈလႃႉသေး ဝၢၼ်ႈၼႃးၽိုင်ႈ ဢိူင်ႇၼွင်သိမ်ႇ ၸႄႈဝဵင်းၵျွၵ်ႉမႄး။

ဝၢၼ်ႈၼွင်သိမ်ႇၼႆႉပဵၼ်ဝၢၼ်ႈဢၼ်ၺႃးတၢမ်ႇပၢင်တိုၵ်းသိုၵ်းသိူဝ် ဝၢၼ်ႈၼိုင်ႈၼင်ႇၵဝ်ႇ။ သိုၵ်းလူင်ပွင်ၸိုင်ႈမၢၼ်ႈဢၼ်မႃးတူင်ႉၼိုင်ထုင်ႉၼၼ်ႉ မီးပဵၼ် 10 တပ်ႉၵွင်။