ၵူၼ်းမိူင်းတႆးပွတ်းၸၢၼ်း ဢၼ်ထုၵ်ႇပႂ်ႉတူၺ်းတၢင်းပဵၼ်ၶူဝ်ႊဝိတ်ႉ 19 ပၢၵ်ႇပၢႆၼၼ်ႉ ယၢမ်းလဵဝ် တိုၵ်ႉသူင်ႇၵူတ်ႇထတ်း ၼမ်ႉမုၵ်ႈၼမ်ႉလၢႆးဝႆႉ တီႈတႃႈၵုင်ႈ ။

မိူဝ်ႈဝၼ်းတီႈ 22/7/2020 ၼႆႉ ၵူၼ်းမိူင်းတႆးပွတ်းၸၢၼ်း ဢၼ်ထုၵ်ႇၵုမ်းတူဝ်ဝႆႉတီႈ Quarantine Center လၢႆလၢႆတီႈ တင်းမူတ်း 144 ၵေႃႉၼၼ်ႉ ယၢမ်းလဵဝ် တိုၵ်ႉသူင်ႇၵူတ်ႇထတ်းတၢင်းပဵၼ်ဝႆႉ တီႈတႃႈၵုင်ႈယူႇ ၼႆယဝ်ႉ။

ၻွၵ်ႊတိူဝ်ႊသဝၼၵူဝ်ႇ ၵႅမ်ၽူႈၸီႉသင်ႇ ၾၢႆႇမေႃယႃၶိုၵ်ႉတွၼ်း ၸႄႈမိူင်း (ပြည်နယ် အထူးရောဂါ နှိမ်နင်းရေး လက်ထောက်ညွှန်ကြားရေးမှူး ဒေါက်တာဇဝနကို) လၢတ်ႈတီႈၽူႈတွႆႇႁွၵ်ႈဝႃႈ “ၼႂ်းမိူင်းတႆးပွတ်းၸၢၼ်း 12 ၸႄႈဝဵင်းၼႆႉ ဢၼ်လႆႈသူင်ႇၵူတ်ႇထတ်းတၢင်းပဵၼ်ဝႆႉ မီး 144 ၵေႃႉ” ဝႃႈၼႆ။

ၼႂ်းၸိုင်ႈတႆးပွတ်းၸၢၼ်း 12 ၸႄႈဝဵင်း ၵူၼ်းမိူင်း ၸိူဝ်းလႆႈသူင်ႇၵူတ်ႇထတ်းတၢင်းပဵၼ်ဝႆႉၼၼ်ႉသမ်ႉ ၸႄႈဝဵင်းၵေးသီး 15 ၵေႃႉ၊ ယွင်ႁူၺ်ႈ 25 ၵေႃႉ၊ တူၼ်ႈတီး 2 ၵေႃႉ၊ ၵၢတ်ႇလေႃႉ 2 ၵေႃႉ၊ သီႇသႅင်ႇ 4 ၵေႃႉ၊ ပၢင်လွင်း 4 ၵေႃႉ၊ မိူင်းၵိုင် 1 ၵေႃႉ၊ မိူင်းပၼ်ႇ 5 ၵေႃႉ၊ မိူင်းသူႈ 2 ၵေႃႉ၊ လွၵ်ႉၸွၵ်ႇ 8 ၵေႃႉ၊ လၢင်းၶိူဝ်း 10 ၵေႃႉ၊ လွႆလႅမ် 64 ၵေႃႉ။ ၵၢၼ်သူင်ႇၵူတ်ႇထတ်းတၢင်းပဵၼ်ထႅင်ႈ ပွၵ်ႈၵမ်းသွင် ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ ထႅင်ႈ 2 ၵေႃႉ ၼႆယဝ်ႉ။

ၻွၵ်ႊတိူဝ်ႊသဝၼၵူဝ်ႇ သိုပ်ႇလၢတ်ႈဝႃႈ “တေႃႇထိုင်ဝၼ်းတီႈ 17 ၼႂ်းလိူၼ်ၵျူႊလၢႆႊၼႆႉ လႆႈသူင်ႇၵူတ်းထတ်း တၢင်းပဵၼ် မီးၵႂႃႇ 223 ၵေႃႉ၊ တႃႇ 220 ၵေႃႉတႄႉ ဢမ်ႇတိတ်းၸပ်းၸိူဝ်ႉမႅင်းၶူဝ်ႊဝိတ်ႉ။ ၵိုတ်းထႅင်ႈ 3 ၵေႃႉၼၼ်ႉတႄႉ တိုၵ်ႉပႂ်ႉၵႂၢမ်းတွပ်ႇဝႆႉယူႇ” ဝႃႈၼႆ။

ၼႂ်းၸႄႈမိူင်းတႆးၼႆႉ ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 တင်းမူတ်းမီး 10 ၵေႃႉ။ ၼႂ်း 10 ၵေႃႉၼၼ်ႉ လႆႈၶႂၢင်ႉလူင်းႁူင်းယႃမူတ်းယဝ်ႉ လႆႈႁပ်ႉႁူႉတီႈလူင်ပွင်ၸိုင်ႈၸႄႈမိူင်းတႆး ဢွၵ်ႇဝႆႉၼင်ႇၼႆ။

လိူဝ်ၼၼ်ႉ ၼႂ်းမိူင်းႁူမ်ႈတုမ် ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 တင်းမူတ်းမီးၵႂႃႇ 343 ၵေႃႉ၊ လူႉတၢႆ 6 ၵေႃႉ၊ ယူတ်းယႃ 57 ၵေႃႉ၊ ယႃၶႅၼ်း 280 ၵေႃႉ ယူႇတီႈႁွင်ႈၵၢၼ်ပၢႆးယူႇလီမိူင်ႁူမ်ႈတုမ် ပိုၼ်ၽၢဝ်ႇဢွၵ်ႇဝႆႉ။

ၼႂ်းလုမ်ႈၾႃႉ/ၵမ်ႇၽႃႇသမ်ႉ ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 တင်းမူတ်းမီး 15,655,557 ၵေႃႉ၊ လူႉတၢႆ 636,521 ၵေႃႉလႄႈ ယႃၶႅၼ်း 9,536,890 ၵေႃႉ ယူႇတီႈႁွင်ႈၵၢၼ်ပႂ်ႉတူၺ်းတၢင်းပဵၼ်ၶူဝ်ႊဝိတ်ႉ ဝႅပ်ႊသၢႆႊ Worldmeters.info ဢွၵ်ႇဝႆႉၼင်ႇၼႆ။