ၸွမ်းၼင်ႇႁွင်ႈၵၢၼ်ၾၢႆႇယူႇလီ ၸိုင်ႈမိူင်း ပရႃႊသီးလ် ပိုၼ်ၽၢဝ်ႇဢွၵ်ႇမႃးသေ သိုဝ်ႇၶၢဝ်ႇလၢႆလၢႆမိူင်း ႁၢႆးငၢၼ်းဝႆႉဝႃႈ ၸွမ်ၸိုင်ႈမိူင်း ပရႃႊသီးလ် ဢႃယု 65 ပီ တိတ်းၸပ်းတၢင်းပဵၼ် ၶူဝ်ႊဝိတ်ႉ 19 ဝႃႈၼႆ။
ၸွမ်ၸိုင်ႈမိူင်း ပရႃႊသီးလ် သႆး ပူဝ်ႊသူဝ်ႊၼႃႊရူဝ်ႊ ထွတ်ႇ ၼႃႈၵၢၵ်ႇ သေ လၢတ်ႈၼေသိုဝ်ႇၶၢဝ်ႇဝႃႈ မၼ်းၸၢႆးတိတ်းၸပ်းတၢင်းပဵၼ်ၶူဝ်ႊဝိတ်ႉ 19
ၶၢဝ်ႇၸွမ်ၸိုင်ႈမိူင်း ပရႃႊသီးလ် သႆး ပူဝ်ႊသူဝ်ႊၼႃႊရူဝ်ႊ တိတ်းၸပ်းၶူဝ်ႊဝိတ်ႉၼႆႉ ဢွၵ်ႇမႃးမိူဝ်ႈဝၼ်းတီႈ 7/7/2020 ။
သိုဝ်ႇၶၢဝ်ႇၵူၼ်းမိူင်း ပရႃႊသီးလ် ထတ်းသၢင်ဝႃႈ “ၸွမ်ၸိုင်ႈၼႆႉ တႄႇပဵၼ်ဢႆမႃးၸဵမ်မိူဝ်ႈ ဝၼ်းတီႈ 2 /7/2020 ယဝ်ႉ။ ၵူၺ်းၵႃႈ ဢမ်ႇဝႆႉၼၵ်းၼိူဝ်လွင်ႈၼႆႉသေ ယင်းတိုၵ်ႉၶဝ်ႈဢွၵ်ႇၵႄႈၵၢင်ၵူၼ်းတင်းၼမ်။ ယင်းတိုၵ်ႉႁဵတ်းပၢင်ၵုမ် ၼင်ႈၸမ်ၵၼ်တင်း ၽွင်းလူင် 5-6 ၵေႃႉယူႇ။ၼႂ်းၼၼ်ႉ ၽွင်းလူင်ၾၢႆႇၵၢၼ် ပူၵ်းပွင် လႄႈၸဝ်ႈၼႃႈတီႈၾၢႆႇၵၢၼ်ငိုၼ်းၸိူဝ်းၼႆႉ ၵေႃႈပႃး ” ဝႃႈၼႆ။
ၽူႈၼမ်းပရႃႊသီးလ်ၼႆႉ ဢမ်ႇတိုဝ်းၵမ်ႁဵတ်းၸွမ်း ဢမ်ႇပၼ်တၢင်းႁူမ်ႈမိုဝ်း ၾၢႆႇပၢႆးယူႇလီ တႃႇႁႄႉၵင်ႈတၢင်းပဵၼ် ၵူၺ်းဢမ်ႇၵႃး ယင်းပၢႆၵႂႃႇႁူမ်ႈတင်းၵူၼ်းမိူင်း ၼႄၵၢင်ၸႂ် လွင်ႈဢမ်ႇၶႂ်ႈသႂ်ႇ Mask လူးၵွၼ်ႇၼႆယဝ်ႉ ။
လိူဝ်ၼၼ်ႉ ၸွမ်ၸိုင်ႈ မိူင်းပရႃႊသီးလ်ၼႆႉ ယၢမ်ႈလၢတ်ႈဝႃႈ “တၢင်းပဵၼ် Covid-19 ၼႆႉမၼ်းဢမ်ႇႁၢႆႉႁႅင်း။ မၼ်းဢမ်ႇလီၵူဝ်၊ မိူၼ်ၶႆႈဝတ်းယူဝ်းယူဝ်းၵူၺ်း ” ဝႃႈၼႆ။
Brazil ၼႆႉပဵၼ်မိူင်းဢၼ်မီးၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 ၼမ်သုတ်းမၢႆ 2 ၼႂ်းလုမ်ႈၾႃႉ။ ဝၼ်းမိူဝ်ႈၼႆႉ တီႈမိူင်း ပရႃႊသီးလ် ၵူၼ်းတိတ်းၸပ်းတၢင်းပဵၼ်မီး 1,674,655 ယႃၶႅၼ်းမီး 1,072,229 ဢၼ်လူႉတၢႆမီး 66,868 ၵေႃႉ။
ဝၼ်းမိူဝ်ႈၼႆႉ တင်းလုမ်ႈၾႃႉ မီးၵူၼ်းတိတ်းၸပ်းတၢင်းပဵၼ် 11981301 ၵေႃႉ။ တၢႆ 547324 ၵေႃႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ