ၼႂ်းမိူင်းတႆး ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ – 19 ၵိုတ်းထႅင်ႈ သွင်ၵေႃႉ ပႆႇလႆႈၶႂၢင်ႉလူင်းႁူင်းယႃသေတႃႉ ငဝ်းလၢႆးလီမႃးယဝ်ႉ။
ၵူၼ်းပဵၼ်သွင်ၵေႃႉ ဢၼ်ပႆႇလႆႈၶႂၢင်ႉလူင်းႁူင်းယႃၼၼ်ႉ ၵေႃႉထူၼ်ႈ 245 လႄႈ ၵေႃႉထူၼ်ႈ 231 ။ ယၢမ်းလဵဝ် ၵူၼ်းပဵၼ် တၢင်းသွင်ၵေႃႉၼႆႉ လႆႈယူတ်းယႃတူဝ်ဝႆႉတီႈႁူင်းယႃလူင် ၸဝ်ႈၸၢမ်ႇထုၼ်း ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း ၵေႃႉၼိုင်ႈလႄႈ ႁူင်းယႃလူင် မူႇၸေႊ ၸိုင်ႈတႆးပွတ်းႁွင်ႇ ၵေႃႉၼိုင်ႈ။
ၻွၵ်ႊတိူဝ်ႊ ႁၢၼ်ႇၼၢႆႇၸူဝ်း မေႃယႃလူင် ႁူင်းယႃမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ၵူၼ်းပဵၼ်တီႈမူႇၸေႊ ၵေႃႉထူၼ်ႈ 231 ၼႆႉ ပၢႆးယူႇလီ ၶႅမ်ႉလႅပ်ႈဝႆႉယူႇ။ လႆႈသူင်ႇၵူတ်ႇထတ်းတင်းသွင်ပွၵ်ႈၵေႃႈ ဢွၵ်ႇမႃး ပဵၼ် Negative တင်းသွင်ပွၵ်ႈ၊ ယၢမ်းလဵဝ် လႆႈၵုမ်းတူဝ်ဝႆႉတီႈႁူင်းယႃ တႃႇၶၢဝ်းတၢင်း 14 ဝၼ်း” ဝႃႈၼႆ။
မိူဝ်ႈဝၼ်းတီႈ 18/6/2020 ၵူၼ်းပဵၼ်တီႈမူႇၸေႊၼၼ်ႉ လႆႈၶႂၢင်ႉလူင်းႁူင်းယႃယဝ်ႉ ၵူၺ်းၵႃႈ ပႆႇလႆႈၶႂၢင်ႉပွၵ်ႈမိူဝ်း ႁိူၼ်းယေး။ ယၢမ်းလဵဝ်လႆႈပႂ်ႉတူၺ်းငဝ်းလၢႆးတၢင်းပဵၼ်ဝႆႉတီႈ ႁူင်းယႃမူႇၸေႊ တႃႇၶၢဝ်းတၢင်း 14 ဝၼ်းၵွၼ်ႇ၊ သင်ဝႃႈ 14 ဝၼ်းတဵမ်ယဝ်ႉ ဢမ်ႇမီးလွင်ႈလၢၵ်ႇလၢႆးသင်ၸိုင် ၸင်ႇတေပၼ်ၶႂၢင်ႉပွၵ်ႈႁိူၼ်းယေး ၼႆယဝ်ႉ။
မိူၼ်ၼၼ်ၼင်ႇၵဝ်ႇ ၵူၼ်းပဵၼ်ၵေႃႉထူၼ်ႈ 245 တီႈႁူင်းယႃလူင် ၸဝ်ႈၸၢမ်ႇထုၼ်း ဝဵင်းတူၼ်ႈတီးၵေႃႈ လႆႈသူင်ႇၵူတ်ႇထတ်း တၢင်းပဵၼ် 2 ပွၵ်ႈ ဢွၵ်ႇမႃးပဵၼ် Negative တင်းသွင်ပွၵ်ႈ။ ၵူၺ်းၵႃႈ တေသူင်ႇၵူတ်ႇထတ်းထႅင်ႈ ပွၵ်ႈၵမ်းသၢမ် ၼႆယဝ်ႉ။
ၻွၵ်ႊတိူဝ်ႊၼိၼ်းဢိၽိဝ်ႇ ၵႅမ်ၽူႈၸီႉသင်ႇ ႁွင်ႈၵၢၼ်ၾၢႆႇၽဵဝ်ႈမူၺ်ႉတၢင်းပဵၼ်ၸပ်းငၢႆႈ ၸႄႈမိူင်းတႆး လၢတ်ႈတီႈ ၽူႈတွႆႇႁွၵ်ႈဝႃႈ “ၵူၼ်းပဵၼ်ၵေႃႉထူၼ်ႈ 245 ၼၼ်ႉ လႆႈသူင်ႇၵူတ်ႇထတ်းတၢင်းပဵၼ် 2 ပွၵ်ႈသေ ဢမ်ႇလႆႈထူပ်းႁၼ် ၸိူဝ်ႉမႅင်းယဝ်ႉ၊ တေသူင်ႇၵူတ်ႇထတ်းတၢင်းပဵၼ်ထႅင်ႈ ပွၵ်ႈၵမ်းသၢမ်” ဝႃႈၼႆ။
ၵူၼ်းပဵၼ်တီႈမူႇၸေႊ ၵေႃႉထူၼ်ႈ 231 ၼၼ်ႉ ပဵၼ်ၼၢင်းယိင်း ဢႃယု 30 ပီ ၊ မၼ်းၼၢင်းပဵၼ်ၽူႈႁၢပ်ႇၵၢၼ်ပၢႆးယူႇလီ တီႈႁူင်းယႃမူႇၸေႊ။ မၼ်းၼၢင်းလႆႈယူႇၸမ်ၵူၼ်းႁိမ်းႁွမ်း မွၵ်ႈ 150 ပၢႆ ဝႃႈၼႆ။
လိူဝ်ၼၼ်ႉ ၵူၼ်းပဵၼ်ၵေႃႉထူၼ်ႈ 245 ၼၼ်ႉ ပဵၼ်ၽူႈၸၢႆး၊ မၼ်းၸၢႆးၵႂႃႇႁဵတ်းၵၢၼ်သဵၼ်ႈတၢင်း တၢင်းပၶူၵ်ႉၵူႇသေ ပွၵ်ႈမႃး၊ ပဵၼ်ၵူၼ်းဝၢၼ်ႈသၢႆးၶၢဝ် ၸႄႈဝဵင်းသႅင်ႇသီႇ ၸိုင်ႈတႆးပွတ်းၸၢၼ်း။ မၼ်းၸၢႆးလႆႈယူႇႁိမ်းၸမ်ၵူၼ်းႁိမ်းႁွမ်း မွၵ်ႈ 8 ၵေႃႉ ဝႃႈၼႆ။
ၼႂ်းမိူင်းတႆးၼႆႉ ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ် တင်းမူတ်းမီး 10 ၵေႃႉ။ ၼႂ်း 10 ၼၼ်ႉ တႃႇ 8 ၵေႃႉတႄႉ လႆႈၶႂၢင်ႉလူင်းႁူင်းယႃယဝ်ႉ။ တႃႇ 2 ၵေႃႉတႄႉ ပႆႇလႆႈၶႂၢင်ႉလူင်းႁူင်းယႃ။
ယၢမ်းလဵဝ် ၼႂ်းမိူင်းႁူမ်ႈတုမ်ၼႆႉ ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ – 19 တင်းမူတ်း မီး 293 ၵေႃႉ၊ လူႉတၢႆ 6 ၵေႃႉ၊ ယူတ်းယႃဝႆႉ 76 ၵေႃႉလႄႈ ယႃၶႅၼ်း 211 ၵေႃႉ ယူႇတီႈႁွင်ႈၵၢၼ် ပၢႆးယူႇလီလႄႈ ၾၢႆႇလဵၼ်ႈႁႅင်း ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ