ၵူၼ်းတိတ်းၸပ်းၸိူဝ်ႉမႅင်း ၶူဝ်ႊဝိတ်ႉ – 19 ဢၼ်ယူတ်းယႃတူဝ်ဝႆႉ တီႈႁူင်းယႃလူင် ဝဵင်းတူၼ်ႈတီးၼၼ်ႉ ၵူတ်ႇထတ်းလၢႆၵမ်းၵေႃႈ ဢမ်ႇႁၼ်ၸိူဝ်ႉမႅင်းယဝ်ႉလႄႈ လႆႈဝႃႈၶႅၼ်းသေ ပၼ်လူင်းႁူင်းယႃ ထႅင်ႈၵေႃႉ ႞ ယဝ်ႉ ဝႃႈၼႆ။

ဝၼ်းတီႈ 24/6/2020 ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ – 19 ၵေႃႉထူၼ်ႈ 230 ဢၼ်ယူတ်းယႃတူဝ်ဝႆႉတီႈ ႁူင်းယႃႈလူင် ၸဝ်ႈၸၢမ်ႇထုၼ်း ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ လႆႈၶႂၢင်ႉလူင်းႁူင်းယႃယဝ်ႉ။

ၻွၵ်ႊတိူဝ်ႊၼိၼ်းဢိၽိဝ်ႇ ၵႅမ်ၽူႈၸီႉသင်ႇ ႁွင်ႈၵၢၼ်ၾၢႆႇၽဵဝ်ႈမူၺ်ႉတၢင်းပဵၼ်ၸပ်းငၢႆႈ ၸႄႈမိူင်းတႆး လၢတ်ႈတီႈ ၽူႈတွႆႇႁွၵ်ႈဝႃႈ “ၵူၼ်းပဵၼ်ဢၼ်လႆႈၶႂၢင်ႉလူင်းႁူင်းယႃၵႂႃႇၼၼ်ႉ ပဵၼ်ၵူၼ်းယႂႃႇငၢၼ်ႇ၊ မၼ်းၸၢႆးတေလႆႈၶဝ်ႈၵုမ်းတူဝ်ဝႆႉ တီႈယႂႃႇငၢၼ်ႇ Facility Quarantine 7 ဝၼ်းသေ ယဝ်ႉၵေႃႈတေလႆႈၵုမ်းတူဝ်ယူႇႁိူၼ်း Home Quarantine ထႅင်ႈ 7 ဝၼ်း၊ ႁူမ်ႈၵၼ် တင်းမူတ်း 14 ဝၼ်း။ ပေႃးယဝ်ႉ ၸင်ႇတေလႆႈယူႇသဝ်းၵႂႃႇမႃး မိူၼ်ၵဝ်ႇ” ဝႃႈၼႆ။

ၵူၼ်းပဵၼ်ၵေႃႉထူၼ်ႈ 230 ၼႆႉ ပဵၼ်ၵူၼ်းယႂႃႇငၢၼ်ႇ ၸိုင်ႈတႆးပွတ်းၸၢၼ်း ပဵၼ်ၽူႈၸၢႆး ဢႃယု 30 ပီ။ ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇထူပ်းႁၼ် ၸိူဝ်ႉမႅင်းၶူဝ်ႊဝိတ်ႉ 19 ပူၼ်ႉမႃးမိူဝ်ႈဝၼ်းတီႈ 2 လိူၼ်ၵျုၼ်ႊၼႆႉ ၼႆယဝ်ႉ။

ၻွၵ်ႊတိူဝ်ႊၼိၼ်းဢိၽိဝ်ႇ သိုပ်ႇလၢတ်ႈဝႃႈ “ မၼ်းၸၢႆးၼၼ်ႉ လႆႈၵူတ်ႇထတ်းၸိူဝ်းမႅင်း 3 ပွၵ်ႈထပ်းၵၼ်သေ တႃႇ 2 ပွၵ်ႈ ဢမ်ႇထူပ်းႁၼ်ၸိူဝ်ႉမႅင်းလႄႈ လႆႈၶႂၢင်ႉလူင်းႁူင်းယႃ” ဝႃႈၼႆ။

ၼႂ်းမိူင်းတႆးၼႆႉ ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ -19 ၼႆႉ တင်းမူတ်းမီး 10 ၵေႃႉ။ တႃႇ 8 ၵေႃႉတႄႉ လႆႈၶႂၢင်ႉလူင်းႁူင်းယႃယဝ်ႉ။ ၵိုတ်းထႅင်ႈ 2 ၵေႃႉ ပႆႇလႆႈလူင်းႁူင်းယႃ။ ဢၼ်ၵိုတ်းထႅင်ႈ 2 ၵေႃႉၼၼ်ႉသမ်ႉ ပဵၼ်တီႈႁူင်းယႃလူင်ၸဝ်ႈၸၢမ်ႇထုၼ်း ဝဵင်းတူၼ်ႈတီး ၵေႃႉၼိုင်ႈလႄႈ ႁူင်းယႃလူင် မူႇၸေႊ ၸိုင်ႈတႆးပွတ်းႁွင်ႇ ၵေႃႉၼိုင်ႈ ဝႃႈၼႆ။

ယၢမ်းလဵဝ်ၼႆႉ ၼႂ်းမိူင်းႁူမ်ႈတုမ်ပတ်းပိုၼ်ႉ ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ – 19 တင်းမူတ်းမီး 293 ၵေႃႉ၊ လူႉတၢႆ 6 ၵေႃႉ၊ ယႃၶႅၼ်း 208 ၵေႃႉလႄႈ တိုၵ်ႉယူတ်းယႃဝႆႉ 79 ၵေႃႉ ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇဢွၵ်ႇဝႆႉၼင်ႇၼႆ။