မိူင်းတႆးပွတ်းႁွင်ႇ ၼႂ်းၸႄႈဝဵင်းသီႇပေႃႉ ပၢႆႉတၢင်းၶဝ်ႈဢွၵ်ႇဝဵင်းၼမ်ႉလၼ်ႈ ၵႂႃႇၸူး တၢင်းမိူင်းၵိုင် ၼၼ်ႉ ထုၵ်ႇၵူၼ်းယႃႉ တွႆႇတူဝ်လိၵ်ႈလူႉၵွႆၵႂႃႇၽွင်ႈ။

ဝၼ်းတီႈ 23/6/2020 ယၢမ်းႁူဝ်ၶမ်ႈ ပၢႆႉၶဝ်ႈဢွၵ်ႇဝဵင်းၼမ်ႉလၼ်ႈ ဢၼ်ပၵ်းဝႆႉတီႈတၢင်းၶဝ်ႈဢွၵ်ႇၵႂႃႇမႃး ဝဵင်းၼမ်ႉလၼ်ႈ – မိူင်းၵိုင်ၼၼ်ႉ ထုၵ်ႇၵူၼ်းယႃႉၶႅၵ်းတူဝ်လိၵ်ႈ ဢၼ်တႅမ်ႈသႂ်ႇဝႆႉတီႈပၢႆႉၼၼ်ႉဢွၵ်ႇပႅတ်ႈ။ ပဵၼ်ၼမ်ႉမိုဝ်းၽႂ် ၵေႃႉလႂ်ႁဵတ်း ဢၼ်ဝႃႈၼၼ်ႉ ဢမ်ႇလႆႈႁူႉ။

ၸၢႆးသၢမ်လႅင်း ၸုမ်းၶဝ်ႈပႃးၵၢၼ်ၵေႃႇသၢင်ႈပၢႆႉ ၼမ်ႉလၼ်ႈ လၢတ်ႈတီႈၽူႈတွႆႇႁွၵ်ႈဝႃႈ “ယူႇတီႈၶႃႈလၢမ်းၶၢတ်ႈတႄႉ တေပဵၼ်ၵူၼ်း ၸိူဝ်းဢမ်ႇၶႂ်ႈၼႃႈလူဝ်ႇ ၸိူဝ်းၼၼ်ႉ ၵူၺ်းၶႃႈ။ လိၵ်ႈတႆး တင်းလိၵ်ႈဢိင်းၵလဵတ်ႈတႄႉ ဢမ်ႇယႃႉၶႃႈ။ ယႃႉပႅတ်ႈတူဝ်လိၵ်ႈမၢၼ်ႈ ဢေႃႈ။ ပေႃးဢမ်ႇတင်ႈၸႂ်ယႃႉ မၼ်းဢမ်ႇၵွႆ ငၢႆႈၶႃႈ ” ဝႃႈၼႆ။

ပၢႆႉတူဝ်လိၵ်ႈ တၢင်းၶဝ်ႈဢွၵ်ႇဝဵင်းၼမ်ႉလၼ်ႈၼႆႉ တႅမ်ႈသႂ်ႇဝႆႉ 3 ၽႃႇသႃႇ လိၵ်ႈတႆး၊ လိၵ်ႈမၢၼ်ႈလႄႈ လိၵ်ႈဢိင်းၵလဵတ်ႈ။ တူဝ်လိၵ်ႈဢၼ်ထုၵ်ႇယႃႉၵွၵ်းဢွၵ်ႇၼၼ်ႉ ပဵၼ်တူဝ်လိၵ်ႈမၢၼ်ႈ ပဵၼ်တူဝ်ဢၼ်ဝႃႈ “ယယိၼ်ႉလႄႈ ဢဝ်ႉၵမိၼ်ႉ” ဝႃႈၼႆ။

ယၢမ်းလဵဝ်ၼႆႉ ယူႇတီႈၵူၼ်းၼမ်ႉလၼ်ႈ ႁူမ်ႈၵၼ်ယိုၼ်ႈယွၼ်း ၾၢႆႇၽွင်းငမ်း ၸၼ်ႉပႃႈၼိူဝ် ႁႂ်ႈယုၵ်ႉၼမ်ႉလၼ်ႈ ၶိုၼ်ႈပဵၼ်ၸၼ်ႉဝဵင်းၵႂႃႇ ပဵၼ်တၢင်းၵၢၼ် ဝႃႈၼႆ။

“လွင်ႈၼႆႉ ႁဝ်းၶႃႈလႆႈတၢင်ႇလၢတ်ႈတီႈၾၢႆႇလိူမ်ႈလၢႆႇၶဝ်ဝႆႉယဝ်ႉ။ ယဝ်ႉၵေႃႈ တေပွင်ႇၶၢဝ်ႇၸူးတီႈ ၽူႈဢုပ်ႉပိူင်ႇၽွင်း ငမ်းၼမ်ႉလၼ်ႈ ဝႃႈတေႁဵတ်းႁိုဝ်မႄးၶိုၼ်း၊ တေဢဝ်ၿတ်ႉၵျႅတ်ႉဢၼ်လႂ်သေမႄးၶိုၼ်းၸိူဝ်းၼႆႉ တေပႂ်ႉတူၺ်းတီႈၽူႈ မီးပုၼ်ႈၽွၼ်းၶဝ်ၵွၼ်ႇ” ၸၢႆးသၢမ်လႅင်း သပ်းလႅင်းလၢတ်ႈၼႄၼင်ႇၼႆ။

ပၢႆႉဝဵင်းၼမ်ႉလၼ်ႈၼႆႉ ၵေႃႇသၢင်ႈမႃးမီးမွၵ်ႈ 2 ပီ ပၢႆ။ တႅမ်ႈသႂ်ႇတူဝ်လိၵ်ႈ 3 ၽႃႇသႃႇဝႆႉတင်း 2 ၾၢႆႇ။ တူဝ်လိၵ်ႈဢၼ်ထုၵ်ႇယႃႉလႅဝ်ၼၼ်ႉ ပဵၼ်ပၢႆႉ ႁူဝ်ဝဵင်းတၢင်းၸၢၼ်း ၊ ၾၢႆႇ ဢၼ် မုင်ႈၼႃႈၸူး တူင်ႇလၢဝ်း မိူင်းၵိုင် ၵၢႆႇၸူး မိူင်းတႆးပွတ်းၸၢၼ်း ။