ၸဝ်ႈၼႃႈတီႈ ထႆး-မၢၼ်ႈ သွင်ၾင်ႇၸိုင်ႈမိူင်းတေဢုပ်ႇၵၼ်တႃႇၸၢင်ႈပိုတ်ႇ ၶူဝ်လႅၼ်လိၼ်တႆး – ထႆး (တႃႈၶီႈလဵၵ်း-မႄႈသၢႆ) ဢၼ် ပိၵ်ႉဢိုတ်းမႃး တဵမ် 3 လိူၼ် ။

ဝၼ်းတီႈ 23/6/2020 ၶွပ်ႈတဵမ် 3 လိူၼ် ၶူဝ်လႅၼ်လိၼ်တႆး – ထႆး (တႃႈၶီႈလဵၵ်း-မႄႈသၢႆ) ပိၵ်ႉဢိုတ်းမႃး။ ယူႇတီႈလူင်ပွင်ၸိုင်ႈမိူင်းထႆး ၸီႉသင်ႇပိၵ်ႉဢိုတ်ႇမႃး တင်ႈတႄႇ မိူဝ်ႈဝၼ်းတီႈ 23/3/2020 ၼၼ်ႉမႃးထိုင် ယၢမ်းလဵဝ် ၼင်ႇႁိုဝ် တေၵုမ်းၵမ်ၵႅတ်ႇၵင်ႈလႆႈ တၢင်းပဵၼ်ၶူဝ်ႊဝိတ်ႉ – 19 ပေႃးတေဢမ်ႇလၢမ်းၽႄႈႁၢဝ်ႈႁႅင်းၼၼ်ႉ-ၼႆယဝ်ႉ။

ၶၢဝ်ႇတၢင်းမႄႈသၢႆဢွၵ်ႇဝႆႉဝႃႈ ၸဝ်ႈၼႃႈတီႈပႂ်ႉလၢၼ်ႇ ၼႂ်းၸေႈတွၼ်ႈၵဵင်းႁႆး ႁူပ်ႉဢုပ်ႇၵၼ်မိူဝ်ႈဝၼ်းတီႈ 19 ယဝ်ႉသေ တႅပ်းတတ်းဝႃႈ တႃႇတေႁႃတိုဝ်ႉတၢင်း တႃႇပိုတ်ႇၶူဝ်လႅၼ်လိၼ်လႆႈလႄႈ သင်ဝႃႈပိုတ်ႇၶူဝ်လႅၼ်လိၼ်ယဝ်ႉ တႃႇတေႁႃလွၵ်းလၢႆးႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၼင်ႇႁိုဝ်ပေႃးတေဢမ်ႇတိတ်းၸပ်းလၢမ်းၽႄႈၵၼ်ၼၼ်ႉ တေဢုပ်ႇၵၼ်တင်း ၸဝ်ႈၼႃႈတီႈၾင်ႇမိူင်းတႃႈၶီႈလဵၵ်း ၼႂ်းဝၼ်းတီႈ 23/6/2020 ဝႃႈၼႆ။

ၵဵဝ်ႇၵပ်းလွင်ႈၼႆႉ ၼၢင်းႁွမ် ၵူၼ်းၵႃႉ ဢၼ်ယူႇ တႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “လွင်ႈပိုတ်ႇၶူဝ်ၼႆႉ လႆႈငိၼ်းဝႃႈ ဢမ်ႇႁိုင်ဢမ်ႇၼၢၼ်း ၼႆႉၼႆ။ မိူဝ်ႈၽုၵ်ႈ ဝၼ်းတီႈ 23 ၼႆႉ ယူႇတီႈၽူႈမီးပုၼ်ႈၽွၼ်းတင်းသွင်ၾၢႆႇ တေႁူပ်ႉဢုပ်ႇၵၼ်ထႅင်ႈၼႆဝႃႇ။ ႁဵတ်းသင်လႄႈၼႆ ပေႃးလိူၼ်ထူၼ်ႈ 7 (လိူၼ်ၵျူႊလၢႆႊ) လုၵ်ႈဢွၼ်ႇၵေႃႈ လူဝ်ႇၶိုၼ်ႈႁူင်းႁဵၼ်းယဝ်ႉလႄႈ လုၵ်ႈဢွၼ်ႇဢၼ်ယူႇတၢင်းၾၢႆႇၼႆႉသေ ဢၼ်တေမိူဝ်းၶိုၼ်ႈႁူင်းႁဵၼ်းတၢင်းမႄႈသၢႆၵေႃႈ မီးတင်းၼမ်။ လွင်ႈၼႆႉ ယူႇတီႈၽူႈမီးပုၼ်ႈၽွၼ်ႈၶဝ် တေဝူၼ်ႉပႃးယူႇၶႃႈယူဝ်ႉ” ဝႃႈၼႆ။

ၽၵ်းတူၶဝ်ႈဢွၵ်ႇ တၢင်းလႅၼ်လိၼ်တႆး – ထႆးၼႆႉ မိူၼ်ၼင်ႇ လၢၼ်ႇ PB1 ၼႃးမူၼ်း၊ ၼမ်ႉယွၼ်း၊ လၵ်းတႅင်ႇလႄႈ လၢၼ်ႇပႃၶီး ၸိူဝ်းၼႆႉၵေႃႈ လႆႈပိၵ်ႉဢိုတ်းဝႆႉတင်းမူတ်း။

ၸၢႆးၼုမ်ႇတုၺ်ႈ ႁူဝ်ပဝ်ႈပႃႇတီႇႁူဝ်သိူဝ် ၸႄႈဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ဢၼ်သင်ႇပိၵ်ႉဢိုတ်းၶူဝ်ၵေႃႈ ပဵၼ်လူင်ပွင်ၸိုင်ႈထႆးၵူၺ်းၶႃႈလူး၊ လွင်ႈတေပိုတ်ႇၼႆႉၵေႃႈ မၼ်းယူႇတီႈလူင်ပွင်ၸိုင်ႈထႆးၵူၺ်းၶႃႈယဝ်ႉ” ဝႃႈၼႆ။

မိူဝ်ႈဝၼ်းတီႈ 19/6/2020 ၼၼ်ႉ ယူႇတီႈၽူႈမီးပုၼ်ႈၽွၼ်း တင်းသွင်မိူင်း ႁူပ်ႉဢုပ်ႇၵၼ်ယဝ်ႉၵမ်းၼိုင်ႈ လွင်ႈႁႃတၢင်း တႃႇတေပိုတ်ႇၶူဝ်ၼႆႉ။ ပေႃးထိုင်မႃး ဝၼ်းတီႈ 23 မိူဝ်ႈၽုၵ်ႈၼႆႉ တေႁူပ်ႉဢုပ်ႇၵၼ်ထႅင်ႈၵမ်းၼိုင်ႈ ယူႇတီႈ သိုဝ်ႇၶၢဝ်ႇ TNA ဢွၵ်ႇဝႆႉၼင်ႇၼႆ။

သင်ဝႃႈၶူဝ်ၼႆႉ ပိုတ်ႇမႃးၸိုင် ပိူင်တႅၵ်ႈမၼ်း မိူဝ်ႈၵူႈပွၵ်ႈၼႆႉ မီးၵူၼ်းၵႂႃႇတၢင်းမႄႈသၢႆ တေႃႇဝၼ်း 100 ၵေႃႉပၢႆလႄႈ တၢင်းၼႃႈၼႆႉ တၢင်းမိူင်းထႆးၶဝ် တေဢမ်ႇပၼ်ၶဝ်ႈတင်း 100 ၵေႃႉယဝ်ႉ၊ ၶဝ်တေမၵ်းမၼ်ႈၼိုင်ႈဝၼ်း တေပၼ်ၶႂၢင်ႉၶဝ်ႈလႆႈ လၢႆၵေႃႉ ၸိူဝ်းၼႆႉၵူၺ်းယဝ်ႉ။ လိူဝ်ၼၼ်ႉ တၢင်းမိူင်းထႆးၵေႃႈ ၶဝ်တေၵူတ်ႇထတ်းလီလီ ၼင်ႇႁိုဝ် ၸိူဝ်ႉမႅင်းတေဢမ်ႇၵႂႃႇၽႄႈတၢင်းမိူင်းၶဝ်ၼၼ်ႉ ယူႇတီႈၵူၼ်းပိုၼ်ႉတီႈ တႃႈၶီႈလဵၵ်း တင်းၼမ်ထတ်းသၢင်ႁၼ်ဝႆႉၼင်ႇၼႆ။

ဝဵင်းတႃႈၶီႈလဵၵ်း ၸႄႈတွၼ်ႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်းၼႆႉ ပဵၼ်ဝဵင်းၵိုၵ်းလႅၼ်လိၼ် တႆး-ထႆး၊ ၾင်ႇမိူင်းထႆးပဵၼ်ဝဵင်းမႄႈသၢႆ၊ မီးမႄႈၼမ်ႉသၢႆတတ်းၶႅၼ်ႈၵၼ်ဝႆႉသေ မီးၶူဝ်မိုတ်ႈၵိုဝ်းမၢႆ 1 တင်းမၢႆ 2 ၵၢႆႇၶၢမ်ႈၸူးၵၼ်ဝႆႉ။ ပဵၼ်ဝဵင်းၵူၼ်းၵိုၼ်း ငိုၼ်းၶွၼ်ႈလိူင်ႇ ဝဵင်းၵၢၼ်ၵႃႉၶၢႆပၢႆးမၢၵ်ႈမီးၶိုၼ်ႈဝဵင်းၼိုင်ႈ၊ ပၼ်ႁႃလၢႆလၢႆလွင်ႈၵေႃႈၼမ်။