ပၢင်ၵုမ်သၽႃးၸႄႈမိူင်းတႆး ပွၵ်ႈၵမ်း 2 ၵမ်းထူၼ်ႈ 19 တႄႇၸတ်းႁဵတ်းမိူဝ်ႈၼႆႉ၊ ဢုပ်ႇလွင်ႈငိုၼ်းၵွင်ၵၢင်။
ဝၼ်းတီႈ 22/6/2020 ၼႆႉ ပၢင်ၵုမ်သၽႃးၸႄႈမိူင်းတႆး ပွၵ်ႈၵမ်း 2 ၵမ်ႈထူၼ်ႈ 19 ၸတ်းႁဵတ်းတီႈလုမ်းသၽႃး ၸႄႈမိူင်းတႆး ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း။
ၸၢႆးၸၢမ်ႇမိူင်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းၵေးသီး လၢတ်ႈတီႈၽူႈတွႆႇႁွၵ်ႈဝႃႈ “ၸႂ်ႈၶႃႈယဝ်ႉ ပၢင်ၵုမ်သၽႃး တႄႇမိူဝ်ႈၼႆႉၵႂႃႇ တေႃႇထိုင်ဝၼ်းၽတ်းၶႃႈ။ ဢၼ်လမ်ႇလွင်ႈဢုပ်ႇဢူဝ်းၵၼ်တႄႉၵေႃႈ တေပဵၼ်လွင်ႈငိုၼ်းၵွင်ၵၢင် ပီ 2019 -2020 ၵူၺ်း” ဝႃႈၼႆ။
ပၢင်ၵုမ်သၽႃးၸႄႈမိူင်းတႆး ပွၵ်ႈၵမ်း 2 ၵမ်းထူၼ်ႈ 19 ၼႆႉ တႄႇမိူဝ်ႈၼႆႉ ဝၼ်းတီႈ 22-25/6/2020 တႃႇၶၢဝ်းတၢင်း 4 ဝၼ်း ၸၢႆးၸၢမ်ႇမိူင်း လၢတ်ႈၼႄၼင်ႇၼႆ။
ၽူႈတႅၼ်းၸိူဝ်းၶဝ်ႈႁူမ်ႈပၢင်ၵုမ်သၽႃး ၸႄႈမိူင်းတႆး ပွၵ်ႈၵမ်း 2 ၼႆႉ ပႃႇတီႇသၢင်ႇသီႈ 31 ၵေႃႉ၊ ပႃႇတီႇႁူဝ်သိူဝ် 27 ၵေႃႉ၊ ပႃႇတီႇၼူၵ်ႉယုင်း 24 ၵေႃႉ၊ ပႃႇတီႇတဢၢင်း 7 ၵေႃႉ၊ ပႃႇတီႇပဢူဝ်း 6 ၵေႃႉ၊ ပႃႇတီႇလႃးႁူႇ 2 ၵေႃႉ၊ ပႃႇတီႇဝႃႉ ၻီႊမူဝ်ႊ ၶရႅတ်ႉတိၵ်ႉ 2 ၵေႃႉ၊ ပႃႇတီႇသိူဝ်ၽိူၵ်ႇ 1 ၵေႃႉ၊ ပႃႇတီႇၵူဝ်းၵၢင်ႉ 1 ၵေႃႉ၊ ပႃႇတီႇၸိူဝ်ႉၸၢတ်ႈၽွမ်ႉႁူမ်ႈဝႃႉ 1 ၵေႃႉ၊ ပႃႇတီႇ ဢႃးၶႃႇ 1 ၵေႃႉ၊ ပႃႇတီႇလီႇသူး 1 ၵေႃႉ၊ သုၼ်ႇတူဝ် 1 ၵေႃႉလႄႈ တူဝ်တႅၼ်းတပ်ႉသိုၵ်းလူင်ပွင်ၸိုင်ႈမၢၼ်ႈ 36 ၵေႃႉ မီးၽူႈတႅၼ်းၶဝ်ႈႁူမ်ႈ တင်းမူတ်း 140 ၵေႃႉ ၼႆယဝ်ႉ။
