SSRC ၶွမ်ႊမတီႊၵူၼ်းပၢႆႈၽေးသိုၵ်းသိုဝ် လူင်းပိုၼ်ႉတီႈ ၸွႆႈထႅမ်ၵူၼ်းပၢႆႈၽေး ၸွမ်းလႅၼ်လိၼ်တႆး – ထႆး ၸိူဝ်းႁူပ်ႉတၢင်းယၢပ်ႇၽိုတ်ႇ ယွၼ်ႉတၢင်းပဵၼ်ၶူဝ်ႊဝိတ်ႉ – 19 လၢမ်းၽႄႈ ၼႆႉ ဝႃႈၼႆ။

ဝၼ်းတီႈ 17/6/2020 ယူႇတီႈၶွမ်ႊမတီႊၵူၼ်းပၢႆႈၽေးလႅၼ်လိၼ်တႆး – ထႆး SSRC – Shan State Refugee Committee (Thai Border) ၵႂႃႇၸွႆႈထႅမ်ပၼ်ၵူၼ်းပၢႆႈၽေး တီႈပၢင်သဝ်းလွႆၵေႃႇဝၼ်း ဢၼ်တိတ်းၸပ်းၵၼ်တင်း ဝၢၼ်ႈႁိၼ်တႅၵ်ႇ တေႃႇၼႃႈၸႄႈဝဵင်းမႄႈၾႃႉလူင် ၸိုင်ႈထႆး တႃႇၶဝ်ႈသၢၼ် 13.5 တၼ်ႊ ၼႆယဝ်ႉ။

ၼၢင်းငိုၼ်းႁွမ် ၽူႈၵပ်းသၢၼ် ၵေႃႇမတီႇၵူၼ်းမိူင်းတႆးပၢႆႈၽေးလႅၼ်လိၼ်တႆး- ထႆး SSRC – TB လၢတ်ႈတီႈ ၽူႈတွႆႇ ႁွၵ်ႈဝႃႈ “ယွၼ်ႉၽၵ်းတူ ၸွမ်းလႅၼ်လိၼ်တႆး – ထႆး (ပဵၼ်တၢင်းၵၢၼ်/ဢမ်ႇပဵၼ်) ၸိူဝ်းၼႆႉ ပႆႇပိုတ်ႇသေ တီႈ။ ႁဝ်းၶႃႈ မႃးၸွႆႈ တၢင်းလွႆၵေႃႇဝၼ်းၼႆႉ ဢၼ်တိတ်းၸပ်းမိူင်းထႆး ဝႆႉၼႆႉထႆးၵမ်းလဵဝ်။ ဢၼ်ၵိုတ်း ႁဝ်းၶႃႈ 5 တီႈၼၼ်ႉတႄႉ ႁဝ်းၶႃႈ တေၶတ်းၸႂ်သူင်ႇ/ၸွႆႈၶဝ်ႈသၢၼ်ၵႂႃႇယူႇ ဢၢၼ်းဝႆႉလိူၼ်ၼႆႉသဵင်ႈဢေႃႈ။ ” ဝႃႈၼႆ။

ယွၼ်ႉတၢင်းပဵၼ်ၶူဝ်ႊဝိတ်ႉ – 19 လၢမ်ႈၽႄးႁၢဝ်ႈႁႅင်းလႄႈ ယူႇတီႈလူင်ပွင်ၸိုင်ႈမိူင်းထႆး ၸီႉသင်ႇပိၵ်ႉဢိုတ်းၽၵ်းတူ ၸွမ်းလႅၼ်လိၼ်တႆး – ထႆး (တီႈပိုတ်ႇပဵၼ်တၢင်းၵၢၼ်လႄႈ တီႈဢမ်ႇပိုတ်ႇပဵၼ်တၢင်းၵၢၼ်) ၵူႈႁူး ၼင်ႇႁိုဝ် တေၵုမ်း ၵမ်လႆႈ တၢင်းပဵၼ်ၶူဝ်ႊဝိတ်ႉ 19 ပေႃးတေဢမ်ႇလၢမ်းၽႄႈ ႁၢဝ်ႈႁႅင်း၊ တၢင်းမိူင်းထႆး တႄႇပိၵ်ႉဢိုတ်းလၢၼ်ႇမႃး တင်ႈတႄႇ ဝၼ်းတီႈ 23/3/2020 တေႃႇထိုင် ယၢမ်းလဵဝ် ပႆႇပိုတ်ႇၶိုၼ်း။

ၼၢင်းငိုၼ်းႁွမ် သိုပ်ႇလၢတ်ႈဝႃႈ “ မိူဝ်ႈႁဝ်းၶႃႈၵႂႃႇၸွႆႈထႅမ် တီႈလွႆၵေႃႇဝၼ်းၼၼ်ႉ ႁဝ်းၶႃႈဢမ်ႇလႆႈၶဝ်ႈၵႂႃႇတၢင်း လွႆၵေႃႇဝၼ်းၶႃႈ၊ လႆႈယူႇတၢင်းၾင်ႇထႆးသေ သူင်ႇၶဝ်ႈသၢၼ်ၶဝ်ႈၵႂႃႇၵူၺ်း။ တၢင်းၾင်ႇတႆးႁဝ်းၶႃႈၵေႃႈ ယူႇတီႈၽူႈမီးပုၼ်ႈၽွၼ်းၶဝ် မႃးႁပ်ႉဢဝ်တီႈၽၵ်းတူလၢၼ်ႇႁဵတ်းၼၼ်ၵူၺ်း။ ၵႃႈၸူဝ်ႈမိူင်းထႆး ပိၵ်ႉၽၵ်းတူၸွမ်း လႅၼ်လိၼ်ၼႆႉမႃး ၵူၼ်းပၢႆႈၽေးႁဝ်းၶႃႈ ဢမ်ႇလႆႈၶဝ်ႈမႃး ယူတ်းယႃတူဝ် ၼႂ်းမိူင်းထႆးၸိူဝ်းၼႆႉ၊ ယဝ်ႉၵေႃႈ ၵၢၼ်ႁႃၵိၼ်လဵင်ႉတွင်ႉ ၸိူဝ်းၼႆႉၵေႃႈ ပဵၼ်ဢၼ်ယၢပ်ႇၽိုတ်ႇတႃႇၵူၼ်းပၢႆႈၽေးႁဝ်းၶႃႈတႄႉတႄႉ” – ဝႃႈၼႆ။

ၶဝ်ႈသၢၼ် တီႈဢၼ်လႆႈမိူဝ်းၸွႆႈထႅမ်ပၼ်ၵူၼ်းပၢႆႈၽေး တီႈပၢင်သဝ်းလွႆၵေႃႇဝၼ်းၼႆႉ ယူႇတီႈၽူႈမီးၼမ်ႉၸႂ်ၸေႇတၼႃႇ တၢင်းမိူင်းထႆး ၵမ်ႉၸွႆႈမႃးၽွင်ႈသေ ယူႇတီႈၶွမ်ႊမတီႊၵူၼ်းပၢႆႈၽေး လႆႈၸွႆႈၵၼ်ႁႃ ၵဵပ်းႁွမ်တွမ်ဝႆႉၽွင်ႈ။ ယူႇတီႈၸုမ်း Chiang Mai Let’s Go Team လႆႈဢဝ်ၵႃး 5 လမ်းသေ တေႃႉသူင်ႇၶဝ်ႈသၢၼ်ၸွႆႈ ၼႆယဝ်ႉ။

ပၢင်သဝ်းၵူၼ်းပၢႆႈၽေး ၸွမ်းလႅၼ်လိၼ်တႆး – ထႆး 6 တီႈၼႆႉ တင်းမူတ်းမီးႁူဝ်ၵူၼ်း 6,101 ၵေႃႉ။ မိူၼ်ၼင်ႇ တီႈပၢင်သဝ်း ၵူၼ်းပၢႆႈၽေးတီႈလွႆၵေႃႇဝၼ်း မီး 2,559 ၵေႃႉ၊ လွႆတႆးလႅင်း 2,381 ၵေႃႉ၊ လွႆသၢမ်သိပ်း 390 ၵေႃႉ၊ ၵုင်းၵျေႃႇ 303 ၵေႃႉ၊ လွႆလမ် 253 ၵေႃႉလႄႈ ၵွင်းမုင်ႈမိူင်း 221 ၵေႃႉ ၼႆယဝ်ႉ။