ၾၢႆႇပၢႆးယူႇလီ RCSS လူင်းပိုၼ်ႉတီႈ ထတ်းထွင် ႁႄႉၵင်ႈ ၵုမ်ႈၵမ် တၢင်းပဵၼ် ၶူဝ်ႊဝိတ်ႉ 19 ၼႂ်းၵိင်ႇၸႄႈဝဵင်း ၵဵင်းတွင်းၼၼ်ႉ ၺႃးတပ်ႉပလိၵ်ႈမၢၼ်ႈ ပႃးလုင်းႁဵင် ႁႄႉႁၢမ်ႈ ၼိူဝ်သဵၼ်ႈတၢင်း ၼႂ်းၵႄႈ မိူင်းၼၢႆး – ၵဵင်းတွင်း ဝႃႈၼႆ။

မိူဝ်ႈၼႆႉ ဝၼ်းတီႈ 18/6/2020 ယၢမ်းၵၢင်ၼႂ် 9 မူင်းပၢႆ လုင်းႁဵင်လွႆဝွတ်းလႄႈ ၽူႈမၢႆဢိူင်ႇ ဢိၵ်ႇပႃး ပလိၵ်ႈမၢၼ်ႈ 2 ၵေႃႉ ႁူမ်ႈၵၼ်သေ ၵႂႃႇႁႄႉႁၢမ်ႈ ၾၢႆႇပၢႆးယူႇလီ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ဢၼ်ပႂ်ႉၵူတ်ႇထတ်းတၢင်းပဵၼ်ပၼ် ၵူၼ်းမိူင်းၵႂႃႇမႃး တီႈၵုၼ်ၼွင် ၼိူဝ်သဵၼ်ႈတၢင်း ၼႂ်းၵႄႈၼႃးၶၢၼ်လႄႈ ၵဵင်းတွင်း ၸႄႈဝဵင်းမိူင်းၼၢႆး ၸိုင်ႈတႆး ပွတ်းၸၢၼ်း ၼႆယဝ်ႉ။

ၸဝ်ႈသိုၵ်း ဢုမ်ႈၶိူဝ်း ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ပလိၵ်ႈမၢၼ်ႈတင်း လုင်းႁဵင်။ ပလိၵ်ႈမၢၼ်ႈ 2 ၵေႃႉၼၼ်ႉတႄႉ ပဵၼ်ပလိၵ်ႈမိူင်းၼၢႆး။ လႅပ်ႈၶဝ်ဢမ်ႇၶႂ်ႈႁႂ်ႈမုၵ်ႉၸုမ်း RCSS ႁဝ်းၶႃႈ မီးၼႃႈ မီးတႃ၊ ဢွၵ်ႇၸိုဝ်ႈဢွၵ်ႇသဵင်၊ တေၶႂ်ႈဝႃႈ တုမ်ႉတိူဝ်ႉၾၢႆႇဢုပ်ႉပိူင်ႇၽွင်းငမ်းၶဝ်ၼႆယူဝ်ႉ” ဝႃႈၼႆ။

“တၢင်းသၢႆၼၼ်ႉ ၵူၼ်းသိုၵ်း RCSS/SSA တူင်ႉၼိုင်ယူႇသဝ်းဝႆႉ တင်းၼမ်။ ဢိင်ၼိူဝ်လွင်ႈၼႆႉသေ ၾၢႆႇတပ်ႉသိုၵ်း ႁဝ်းၶႃႈ လႆႈငိူင်ႉဝႄႈပၼ်ဝႆႉၸူဝ်ႈၶၢဝ်း” ၸဝ်ႈသိုၵ်းဢုမ်ႈၶိူဝ်း သိုပ်ႇလၢတ်ႈထႅင်ႈၼင်ႇၼႆ။

ႁွင်ႈၵၢၼ်ပိုၼ်ၽၢဝ်ႇၶွင် RCSS ဝႅပ်ႊသၢႆႊတႆးလွတ်ႈလႅဝ်းတႄႉ ဢွၵ်ႇဝႆႉဝႃႈ “ ယွၼ်ႉလုင်းႁဵင်လွႆဝွတ်းလႄႈ ပလိၵ်ႈမၢၼ်ႈ ဢမ်ႇယွမ်းပၼ် မေႃယႃၾၢႆႇပၢႆးယူႇလီ RCSS ၵူတ်ႇထတ်း တၢင်းပဵၼ်ၶူဝ်ႊဝိတ်ႉ – 19 ပၼ်ပေႃႈမႄႈၵူၼ်းမိူင်းလႄႈ ယူႇတီႈ မေႃယႃၾၢႆႇပၢႆးယူႇလီ RCSS လႆႈထွၼ်ပွၵ်ႈၶိုၼ်း။ ဢိင်ၼိူဝ်လွင်ႈပိူင်ပဵၼ်ၼႆႉသေ သပ်းလႅင်းတၢင်ႇလၢတ်ႈၼႄ တီႈၽူႈမီးပုၼ်ႈၽွၼ်းတၢင်းၼိူဝ်ၵႂႃႇ” ဝႃႈၼႆ။

ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၼႆႉ ပဵၼ်ၸုမ်းဢၼ်လူင်းလၢႆးမိုဝ်းၵိုတ်းတိုၵ်း ပတ်းပိုၼ်ႉတူဝ်ႈမိူင်း NCA ဝႆႉၸုမ်းၼိုင်ႈ။

မိူဝ်ႈပူၼ်ႉမႃး ဝၼ်းတီႈ 7 တင်း 12 လိူၼ်ဢေႊပရိူဝ်ႊ 2020 ၼၼ်ႉၵေႃႈ ၸုမ်းၾၢႆႇပၢႆးယူႇလီ RCSS လူင်းပိုၼ်ႉတီႈ ပၼ်ပိုၼ်းႁူႉ လွင်ႈလွၵ်းလၢႆးႁႄႉၵင်ႈတၢင်းပဵၼ်ၶူဝ်ႊဝိတ်ႉ – 19 လႄႈ ၵူတ်ႇထတ်းတၢင်းပဵၼ်ၵူၼ်းမိူင်း တၢင်းပွတ်းဝၢၼ်ႈ မႆႉပူၵ်ႇ တင်း ဝၢၼ်ႈၼႃးဝွၼ် ဢိူင်ႇၼႃးဝွၼ် ၸႄႈဝဵင်းမိူင်းပၼ်ႇ၊ မိူဝ်ႈၼၼ်ႉၵေႃႈ ထုၵ်ႇသိုၵ်းလူင်ပွင်ၸိုင်ႈမၢၼ်ႈ တပ်ႉၶမယ 153 ၸွမ်းႁႄႉၸွမ်းႁၢမ်ႈသေဢမ်ႇၵႃး ပၢႆတဵင်ၵႂၢမ်းၼၵ်းလွၵ်ႇငိုတ်ႈၵူၼ်းမိူင်း၊ သူင်ႇႁႅင်းသိုၵ်း လိုပ်ႈလမ်းလႄႈ ထိုင်တီႈ သွင်ၾၢႆႇ လႆႈပဵၼ်ပၢင်တိုၵ်းၵၼ်။

ၸုမ်းမေႃယႃ ၾၢႆႇပၢႆးယူႇလီ RCSS ၼႆႉ လူင်းပိုၼ်ႉတီႈပၼ်ပိုၼ်ႉႁူႉ ၵဵဝ်ႇလူၺ်ႈလွင်ႈလွၵ်းလၢႆးႁႄႉၵင်ႈ တၢင်းပဵၼ်ၶူဝ်ႊဝိတ်ႉ – 19 ပၼ်ၵူၼ်းမိူင်းသေ ၵူတ်ႇထတ်းတၢင်းပဵၼ်ပၼ်ၵူၼ်းမိူင်း ၸိူဝ်းၼႆႉ တႄႇဢဝ် မိူဝ်ႈႁၢင်လိူၼ်မတ်ႉၶျ်မႃး တေႃႇထိုင်ယၢမ်းလဵဝ် တိုၵ်ႉလူင်းၵူတ်ႇထတ်းၼႂ်းပိုၼ်ႉတီႈ ဢၼ် RCSS တူင်ႉၼိုင်ယူႇသဝ်းဝႆႉ ၸိူဝ်းၼၼ်ႉ ၼႆယဝ်ႉ။

တႃႇၸွႆႈထႅမ် ၵူၼ်းမိူင်းၼၼ်ႉ မိူဝ်ႈဝၼ်းတီႈ 4/6/2020 ၸွမ်ႁၢၼ် ပွင်ၶိူဝ်း ၽႅဝ်ထိုင် ၼႂ်းလုမ်းတိူင်းသိုၵ်း ဝၼ်းဢွၵ်ႇ ယပၶ တူၼ်ႈတီးသေ ႁပ်ႉဢဝ်ၶူဝ်းၶွင် ဢၼ်ၾၢႆႇသိုၵ်းမၢၼ်ႈ ၸွႆႈထႅမ်၊ ဝၼ်းတီႈ 8/6/2020 သမ်ႉ ၸဝ်ႈသိုၵ်း ဢုမ်ႈၶိူဝ်း ဢွၼ်ႁူဝ်သေ ႁပ်ႉဢဝ် ၶဝ်ႈသၢၼ် 300 ထူင်၊ ၼမ်ႉမၼ်း 30 ပုင်း ဢၼ်လူင်ပွင်ၸိုင်ႈမိူင်းတႆး ၸွႆႈထႅမ် – ၸိူဝ်းၼႆႉ ပဵၼ် တႃႇၸွႆႈထႅမ်ၶိုၼ်းၵူၼ်းမိူင်း – ၵူၺ်းၵႃႈ ၾၢႆႇၼိုင်ႈသမ်ႉ ဢမ်ႇပၼ်လူင်းပိုၼ်ႉတီႈ ၸွႆႈထႅမ်လွတ်ႈလႅဝ်း ထၢင်ႇႁၢင်ႈ၊ ၵူၼ်းမိူင်း ၵႂင်ၸႂ်ၸွမ်း ၶၵ်ႉၵၢၼ်ငမ်းယဵၼ် NCA ဢၼ် RCSS/SSA လူင်းလၢႆးမိုဝ်းဝႆႉ။