ထူပ်းႁၼ်တူဝ်တၢႆ ၼၢင်းယိင်း 2 ၵေႃႉ တီႈႁိမ်းဝၢၼ်ႈမၢၵ်ႇၶီႈၼူ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။
ဝၼ်းတီႈ 16/6/2020 ယၢမ်းၵၢင်ၼႂ် ထူပ်းႁၼ် တူဝ်တၢႆ ၼၢင်းယိင်း 2 ၵေႃႉ တီႈၼႂ်းယုမ်း ႁိမ်းၶၢင်ႈတၢင်း ဢၼ်ၵႂႃႇၸူးတီႈ ဝၢၼ်ႈမၢၵ်ႇၶီႈၼူ ဢိူင်ႇတႃႈပုင်ႇ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ ၶၢပ်ႈတူဝ်တၢႆ ၼၢင်းယိင်း 2 ၵေႃႉၼၼ်ႉ ပူၺ်ႇလၢၼ်ႈ မဵၼ်တူႇဝႆႉယဝ်ႉ ၼႆယဝ်ႉ။
ၸၢႆးဝတူင်ႇထုၼ်း ၸုမ်းၸွႆႈထႅမ် ၵူၼ်းၼုမ်ႇလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပဵၼ်လွင်ႈသင်သေ ထုၵ်ႇၶႃႈႁႅမ်တၢႆၼၼ်ႉတႄႉ ႁဝ်းၶႃႈဢမ်ႇလႆႈႁူႉၶႃႈ။ ၵူၼ်းတၢႆ 2 ၵေႃႉၼၼ်ႉတႄႉ ၼိူဝ်ႉပေႃးလၢၼ်ႈ မဵၼ်တူႇၶႃႈယဝ်ႉ” ဝႃႈၼႆ။
မိူဝ်ႈဝႃးၼႆႉ ၾူၼ်တူၵ်းႁႅင်းသေ သဵၼ်ႈတၢင်းၵေႃႈမိုၼ်ႈ၊ ၸုမ်းၸွႆႈထႅမ် ၵူၼ်းၼုမ်ႇလႃႈသဵဝ်ႈ ၵႂႃႇဢဝ်တူဝ်ၶဝ်ဢွၵ်ႇမႃး ပဵၼ်ဢၼ်ယၢပ်ႇၽိုတ်ႇ၊ ၽိူဝ်ႇၽႅဝ်ႁွတ်ႈဢွင်ႈတီႈၵူၼ်းတၢႆၼၼ်ႉၵေႃႈ ၶၢပ်ႈတူဝ်တၢႆ ၼၢင်းယိင်း 2 ၵေႃႉၼၼ်ႉ ပေႃးၶႂ်ႈလၢၼ်ႈမူတ်းယဝ်ႉ ဝႃႈၼႆ။
ၼၢင်းယိင်း 2 ၵေႃႉ ဢၼ်လႆႈလူႉတၢႆဝႆႉၼၼ်ႉ ဢႃယုမီးမွၵ်ႈ 40 ပၢႆတင်းသွင်။ ထုၵ်ႇၸိူၵ်ႈမတ်ႉမိုဝ်းပႄႈလင်ဝႆႉသေ ၶႃႈႁႅမ်တၢႆ မူၵ်းယုမ်းဝႆႉ တင်း 2 ၵေႃႉ။ တေႃႈလဵဝ် ယူႇတီႈၸုမ်းၸွႆႈထႅမ်ၵူၼ်းၼုမ်ႇလႃႈသဵဝ်ႈ လႆႈတေႃႉသူင်ႇ ဝႆႉတီႈႁူင်းယႃလႃႈသဵဝ်ႈယဝ်ႉ ဝႃႈၼႆ။
ၼႂ်းၸႄႈဝဵင်းလႃႈသဵဝ်ႈၼႆႉ ယၢမ်းလဵဝ် ၵူၼ်းလၵ်ႉ ၵူၼ်းၸူၼ် ၵေႃႈမီးလိူင်ႇၼမ်သေ ၵၢၼ်လၵ်ႉၵၢၼ်ၸူၼ်ၸိူဝ်းၼႆႉၵေႃႈ ၵႆႉၵႆႉပဵၼ်ယူႇတႃႇသေႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ