ၵႃးတၢင်ႇၵူၼ်း ပိၼ်ႈတူၵ်းႁူၺ်ႈၵိုတ်ႈ ၼႂ်းၸႄႈဝဵင်းၼွင်ၶဵဝ် မီးၵူၼ်းလူႉတၢႆထင်တီႈ 2 ၵေႃႉလႄႈ မၢတ်ႇၸဵပ်းၸွမ်း 10 ပၢႆ ဝႃႈၼႆ။
မိူဝ်ႈၼႆႉ ဝၼ်းတီႈ 17/6/2020 ယၢမ်းၵၢင်ၼႂ် မွၵ်ႈ 3 မူင်းပၢႆ ၵႃးတၢင်ႇၵူၼ်း Express ဢၼ်လုၵ်ႉတၢင်းမၵူၺ်း တေၶိုၼ်ႈမႃး တၢင်းဝဵင်းလႃႈသဵဝ်ႈၼၼ်ႉ လႆႈပဵၼ်ၽေးဢုပၢတ်ႈ(ၽေးၵိုင်ႉၵၢင်ႉ) သေ ပိၼ်ႈတူၵ်းႁူၺ်ႈၵိုတ်ႈ တီႈၵူတ်ႉမႄႈၵလႃး (ၵလမ ၵူၺ်ႉ) ၼႂ်းၵႄႈ ၼွင်ၶဵဝ် – ၵျွၵ်ႉမႄး ၼႂ်းၸႄႈဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။
ၸၢႆးဢွင်ႇမိူင်း ႁူဝ်ပဝ်ႈ ပႃႇတီႇႁူဝ်သိူဝ် ၸႄႈဝဵင်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ “ၸႂ်ႈၶႃႈဢေႃႈ ပဵၼ်ၵႃးတၢင်ႇၵူၼ်း ပိၼ်ႈတူၵ်းႁူၺ်ႈၵိုတ်ႈ၊ ၵူၼ်းမႃးၸွမ်းၼႂ်းၵႃးၼၼ်ႉ လႆႈလူႉတၢႆ ထင်တီႈ 2 ၵေႃႉ၊ မၢတ်ႇၸဵပ်း 10 ပၢႆ၊ ယၢမ်းလဵဝ် လႆႈတေႃႉသူင်ႇဝႆႉတီႈ ႁူင်းယႃပၢင်ဢူႈ” ဝႃႈၼႆ။
မိူဝ်ႈပူၼ်ႉမႃး ဝၼ်းသွင်ဝၼ်းၼႆႉ ၾူၼ်တူၵ်းႁႅင်းသေ ၼမ်ႉႁူၺ်ႈၼမ်ႉပႃႇ လႆလူင်းၸွမ်းသဵၼ်ႈတၢင်း ႁူၺ်ႈၵိုတ်ႈၼၼ်ႉ ႁၢဝ်ႈႁႅင်းလႄႈ တေႃႈလဵဝ်ၸွမ်းသဵၼ်ႈတၢင်းၼၼ်ႉ ပဵၼ်ၶီႈၵူမ်ႇၶီႈဢုင် သဵၼ်ႈတၢင်းမိုၼ်ႈ ရူတ်ႉၵႃးၶိုၼ်ႈလူင်းၵႂႃႇမႃး ယၢပ်ႇၽိုတ်ႇလိူဝ်ႁႅင်း ၼႆယဝ်ႉ။
ဢူးၼေႇဢွင်ႇ ၸုမ်းၸွႆႈထႅမ် ၵၢၼ်းလိၼ်ႉလႅတ်ႉမျႃး (ၼွင်ပိင်) လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်ယွၼ်ႉပရိၵ်ႈရူတ်ႉၶၢတ်ႇ ၊ သမ်ႉပဵၼ်တၢင်းလူင်းၵုင်းလႄႈ ဢမ်ႇၵုမ်းလႆႈသေ သဵၼ်တူၵ်းႁိုၵ်း တူၵ်းလူင်းသႂ်ႇၼိူဝ်သဵၼ်ႈတၢင်း တၢင်းၶိုၼ်ႈမႃးၼၼ်ႉ ၶိုၼ်း။ ၵူၼ်းၼႂ်းရူတ်ႉပႃးမႃး 17 ၵေႃႉ။ တၢႆထင်တီႈ 2 ၵေႃႉ ၵူၼ်းႁေႃႈရူတ်ႉလႄႈ ၵူၼ်းၶီႇမႃးၸွမ်း ရူတ်ႉ၊ ထႅင်ႈၵေႃႈၼိုင်ႈၵႂႃႇ တၢႆတီႈႁူင်းယႃ။ ဢၼ်မၢတ်ႇၸဵပ်းလိူဝ်ႁႅင်းမီး 5 ၵေႃႉ။ လိူဝ်ၼၼ်ႉတႄႉမၢတ်ႇၸဵပ်းဢိတ်းဢွတ်း – သူင်ႇယူတ်းယႃတူဝ်ဝႆႉ တီႈႁူင်းယႃ ပၢင်ႇဢူႈလူင် လႄႈ ၼွင်ၶဵဝ်ဝႆႉ ”- ဝႃႈၼႆ။
ၼႂ်းပီႈ သွင်ပီမႃးၼႆႉ ပေႃးၾူၼ်တူၵ်းႁႃႇယႂ်ႇ ၼမ်ႉလွႆလႆႁႅင်း၊ လူင်းထူမ်ႈသဵၼ်ႈတၢင်း၊ သမ်ႉပဵၼ်တၢင်းၶိုၼ်ႈလႄႈ ၸဝ်ႈရူတ်ႉၸဝ်ႈၵႃးတၵ်းလႆႈ ၾၢင်ႉသေ ႁေႃႈရူတ်ႉလွႆးလွႆး ဝႃႈၼႆ။
