ဢွင်ႈတီႈဝႆႉၶိူင်ႈၸၢၵ်ႈ တႃႇၵူတ်းထတ်းတၢင်းပဵၼ် တီႈႁူင်းယႃလူင် ၸဝ်ႈၸၢမ်ႇထုၼ်း ဝဵင်းလူင်တူၼ်ႈတီးၼၼ်ႉ တေယဝ်ႉတူဝ်ႈ ႁၢင်လိူၼ်ၼႆႉ ဝႃႈၼႆ။

တေႃႈလဵဝ် ဢွင်ႈတီႈတႃႇတေဝႆႉၶိူင်ႈၸၢၵ်ႈ ၵူတ်ႇထတ်းတၢင်းပဵၼ်ၼႆႉ တိုၵ်ႉၵေႃႇသၢင်ႈႁဵတ်းယဝ်ႉၵႂႃႇ မွၵ်ႈ 50 % ၊ လိူၼ်ၵျုၼ်ႊ 2020 ၼႆႉသဵင်ႈ တေဢၢၼ်းႁဵတ်းႁႂ်ႈယဝ်ႉမူတ်း။ လိူဝ်သေၼၼ်ႉ ၶိူင်ႈၸၢၵ်ႈၵမ်ႈၽွင်ႈ ႁွတ်ႈၽႅဝ်ဝႆႉတီႈ ႁူင်းယႃၸဝ်ႈၸၢမ်ႇထုၼ်း ယဝ်ႉ ဝႃႈၼႆ။

ၻွၵ်ႊတိူဝ်ႊ မပူဝ်းပူဝ်းလိၼ်း မေႃယႃလူင် ၶိုၵ်ႉၶၵ်ႉ ႁွင်ႈၵၢၼ်ၾၢႆႇသွၵ်ႈႁႃတၢင်းပဵၼ် တီႈႁူင်းယႃလူင် တူၼ်ႈတီး (စဝ်စံထွန်း ဆေးရုံကြီး ရောဂါ ရှာဖွေရေးဌာန အထူးကု ဆရာဝန်ကြီး ဒေါက်တာပိုးပိုးလင်း) လၢတ်ႈတီႈၽူႈတွႆႇႁွၵ်ႈဝႃႈ“ ၶိူင်ႈၸၢၵ်ႈမၢင်ဢၼ်တႄႉ ႁွတ်ႈၽႅဝ်မႃးတီႈတူၼ်ႈတီးယဝ်ႉ မိူဝ်ႈဝူင်ႈပူၼ်ႉၼၼ်ႉ။ သင်ဝႃႈ သၢင်ႈဢွင်ႈတီႈဝႆႉမၼ်းယဝ်ႉ တေၵပ်းတေႃႇၶိူင်ႈၸၢၵ်ႈမၼ်းၵမ်းလဵဝ်ယဝ်ႉ။ လိူဝ်ၼၼ်ႉ မွၵ်ႈၵၢင်လိူၼ်ၵျူႊလၢႆႊၼႆႉ ၸင်ႇတေတႄႇၵူတ်ႇထတ်းၵႂႃႇယဝ်ႉ” ဝႃႈၼႆ။

ၶိူင်ႈၸၢၵ်ႈဢၼ်မႃးဝႆႉတီႈႁူင်းယႃလူင် ၸဝ်ႈၸၢမ်ႇထုၼ်းၼႆႉ တွၼ်ႈတႃႇတေၵူတ်ႇထတ်းတၢင်းပဵၼ်ၶူဝ်ႊဝိတ်ႉ – 19 ၊ ၼွၵ်ႈလိူဝ်ၼၼ်ႉ တႃႇၵူတ်ႇထတ်းၸိူဝ်ႉမႅင်းထႅင်ႈတၢင်ႇဢၼ်ပႃး။ လွင်ႈၵၢၼ်ၵူတ်ႇထတ်းတႄႉ လႅပ်ႈတေပဵၼ် ၵၢင်လိူၼ်ၵျူႊလၢႆႊ တေမႃးၼႆႉ ဝႃႈၼႆ။

ၶိူင်ႈၸၢၵ်ႈၵူတ်ႇထတ်း တွၼ်ႈတႃႇ တၢင်းပဵၼ်ၶူဝ်ႊဝိတ်ႉ 19 ၼႆႉ ၼိုင်ႈပွၵ်ႈလႂ် တေၵူတ်ႇထတ်းလႆႈတၢင်းပဵၼ် 96 ဢၼ် တႃႇၶၢဝ်းတၢင်း 2 ၸူဝ်ႈမူင်း ထိုင် 3 ၸူဝ်ႈမူင်း ဝႃႈၼႆ။

ဢွင်ႈတီႈဢၼ်တေဝႆႉၶိူင်ႈၸၢၵ်ႈ တႃႇၵူတ်ႇထတ်းတၢင်းပဵၼ်တီႈႁူင်းယႃ ၸဝ်ႈၸၢမ်ႇထုၼ်းၼႆႉ ယူႇတီႈငိုၼ်းလူင်ပွင်ၸိုင်ႈ မိူင်းတႆးဢွၵ်ႇပၼ်တင်းမူတ်း ဝႃႈၼႆ။

ၶိူင်ႈၸၢၵ်ႈ တႃႇၵူတ်းထတ်းတၢင်းပဵၼ် ဢၼ်ဝႆႉတီႈႁူင်းယႃၸဝ်ႈၸၢမ်ႇထုၼ်း ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းလႄႈ ႁူင်းယႃလူင် လႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉ ပဵၼ်ၸဝ်ႈတႃႇၼၵေႃႉလဵဝ်လူႇတၢၼ်းဝႆႉ တင်းသွင်တီႈ။ ပဵၼ်ၶွမ်ႊပၼီႊ ငူၺ်ႇဢွင်ႇၵႃႇပႃႇ ၵျွၵ်ႉမဵတ်ႉ လူႇတၢၼ်းဝႆႉ ဝႃႈၼႆ။