ၾႆးမႆႈႁိူၼ်းလင်ၼိုင်ႈတီႈဝဵင်းလူင်တူၼ်ႈတီး ၽွင်းၸဝ်ႈႁိူၼ်းဢမ်ႇယူႇ

ၾႆးမႆႈႁိူၼ်းၵူၼ်းဝၢၼ်ႈလင်ၼိုင်ႈ ၼႂ်းၸႄႈဝဵင်းတူၼ်ႈတီး၊ ၵမ်ႈၼမ်ဝႃႈ ပဵၼ်ၾႆးၾႃႉသျွတ်ႉ။

မိူဝ်ႈၼႆႉ ဝၼ်းတီႈ 16/6/2020 ယၢမ်းၵၢင်ၼႂ် မွၵ်ႈ 9 မူင်း ၾႆးမႆႈႁိူၼ်းၵူၼ်းဝၢၼ်ႈ တီႈပွၵ်ႉယေႇဢေးၵုၼ်း ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။ လွင်ႈၼႆႉ ပဵၼ်ယွၼ်ႉသင်လႄႈမႆႈ ဢၼ်ဝႃႈၼၼ်ႉ ပႆႇႁူႉ။ ၵူၼ်းပိုၼ်ႉတီႈ ၵမ်ႈၼမ်လၢမ်းၶၢတ်ႈဝႃႈ ပဵၼ်ၾႆးၾႃႉသျွတ်ႉ ၼႆယဝ်ႉ။

ၼၢင်းမူဝ် ၵူၼ်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ“ ၸႂ်ႈၶႃႈဢေႃႈ ၾႆးမႆႈႁိူၼ်းၵူၼ်းဝၢၼ်ႈ တီႈပွၵ်ႉယေႇဢေးၵုၼ်း လင်ၼိုင်ႈ။ လွင်ႈတၢင်းၾႆးမႆႈၼၼ်ႉ ပဵၼ်ယွၼ်ႉသင်တႄႉတႄႉ ပႆႇလႆႈႁူႉတႅတ်ႈတေႃးလီ၊ လွင်ႈၵူၼ်းမၢတ်ႇၸဵပ်းလူႉတၢႆၵေႃႈပႆႇလႆႈငိၼ်းၶႃႈ။ ငိၼ်းဝႃႈ ႁိူၼ်းၾႆးမႆႈၼၼ်ႉ ၸဝ်ႈႁိူၼ်းဢမ်ႇယူႇ” ဝႃႈၼႆ။

ပိူင်ပဵၼ်ၾႆးမႆႈပွၵ်ႈၵမ်းၼႆႉ ယူႇတီႈၽူႈမီးပုၼ်ႈၽွၼ်းၾၢႆႇၶႄၾႆးလႄႈ ၵူၼ်းၼႂ်းပွၵ်ႉၼၼ်ႉ ႁူမ်ႈၵၼ်သေ ၸွႆႈၶႄႁူတ်းၾႆးၵႂႃႇ ဝႃႈၼႆ။

ၼႂ်းဝၼ်းလဵဝ်ၼႆႉၵူၺ်းၼင်ႇၵဝ်ႇ တီႈၼႂ်းၵၢတ်ႇလူင် ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၵေႃႈ ၾႆးမႆႈႁၢၼ်ႉၶၢႆၶဝ်ႈၽၵ်း လင်ၼိုင်ႈ ဝႃႈၼႆ။

ၸၢႆးၼေႃႇ ၵူၼ်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ပဵၼ်ႁၢၼ်ႉၶၢႆၶဝ်ႈၽၵ်း မီးၼႂ်းၵၢတ်ႇလူင်လႃႈသဵဝ်ႈ ၸၼ်ႉတၢင်းၼိူဝ်။ ၵမ်ႈၼမ်တႄႉၵေႃႈဝႃႈ ယွၼ်ႉၾႆးထၢၼ်ႇသေ လၢမ်းမႆႈၼႆၶႃႈ။ လွင်ႈလူႉသုမ်းတႄႉ မီးယူႇသေတႃႉ လွင်ႈၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီးၶႃႈ” ဝႃႈၼႆ။

ပိူင်ပဵၼ်ၾႆးမႆႈတီႈႁၢၼ်ႉၶၢႆၶဝ်ႈၽၵ်း ၼႂ်းၵၢတ်ႇဝဵင်းလႃႈသဵဝ်ႈၼႆႉ ပဵၼ်မိူဝ်ႈၼႆႉ ယၢမ်းၵၢင်ၼႂ် မွၵ်ႈ 4 မူင်း၊ ယူႇတီႈၽူႈမီးပုၼ်းၽွၼ်းတီႈၵၢတ်ႇ တင်းၾၢႆႇလိူမ်ႈလႆႇ လႆႈၸွႆႈၵၼ်ႁူတ်း၊ ထိုင်မႃး မွၵ်ႈ 4 မူင်းၶိုင်ႈၼႆႉ ၾႆးၸင်ႇတေမွတ်ႇ ။ ၾႆးတၼ်းမႆႈ ၽိူၼ် ၊တင်ႇလႄႈၽၵ်းတူ ၸိူဝ်းၼႆႉ ဝႃႈၼႆ။