ၵူၼ်းမိူင်းႁူမ်ႈတုမ် ပွၵ်ႈၶဝ်ႈမႃးတၢင်းတႃႈၶီႈလဵၵ်းထႅင်ႈ 100 ပၢႆ ၊ မိူဝ်ႈလဵဝ် တီႈၵုမ်းတူဝ်တီႈၶီႈလဵၵ်း မီးလွင်ႈယၢပ်ႇၽိုတ်ႇမႃး၊ ယွၼ်ႉၵူၼ်းၵဝ်ႇပႆႇဢွၵ်ႇ ၵူၼ်းမႂ်ႇမႃးထႅင်ႈ။
ဝၼ်းတီႈ 15/6/2020 ႁႅင်းၵၢၼ်မိူင်းႁူမ်ႈတုမ် ဢၼ်ၵႂႃႇႁဵတ်းၵၢၼ် တၢင်းမိူင်းထႆးၼၼ်ႉ ဢွၼ်ၵၼ်ပွၵ်ႈၶဝ်ႈမႃးတၢင်း ၶူဝ်မိုတ်ႈၵိုဝ်း မၢႆ 2 ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း လႅၼ်လိၼ်တႆး – ထႆး (မႄႈသၢႆ – တႃႈၶီႈလဵၵ်း) တႃႇႁူဝ်ၵူၼ်း 104 ၵေႃႉ ဝႃႈၼႆ။
ၸၢႆးသၢမ် ၵူၼ်းပိုၼ်ႉတီႈ တႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ၸႂ်ႈၶႃႈဢေႃႈ မိူဝ်ႈဝႃးၼႆႉ ၵူၼ်းမိူင်းႁူမ်ႈတုမ် ႁႅင်းၵၢၼ် ႁူမ်ႈၵၼ်ပွၵ်ႈမႃးထႅင်ႈ 100 ပၢႆ။ လႆႈငိၼ်းဝႃႈ ယၢမ်းလဵဝ်ၼႆႉ တႃႇတေဝႆႉၵူၼ်းပွၵ်ႈမႃးၼႆႉ ၶႂ်ႈမီးလွင်ႈယၢပ်ႇၽိုတ်ႇ၊ ယွၼ်ႉဢွင်ႈတီႈမၼ်းၶႂ်ႈၵႅပ်ႈယဝ်ႉ၊ လႆႈႁၼ်ဢဝ်မႃးဝႆႉတီႈႁူင်းႁေႃ တၢင်းၼႃႈဝတ်ႉမၢၵ်ႇၵႃႇႁူဝ်ၶမ်း ၵေႃႈမီးယူႇ၊ ယွၼ်ႉဝႃႈ ပေႃးႁပ်ႉၶဝ်ႈမႃး ၵူၼ်းၵဝ်ႇသမ်ႉ ပႆႇလႆႈပွၵ်ႈၵၼ် ၵူၼ်းမႂ်ႇသမ်ႉမႃးၽိူမ်ႉမႃးထႅင်ႈၸိုင် ႁူဝ်ၵူၼ်းမၼ်းၼမ်ၶိုၼ်ႈမႃးၼၼ်ႉယဝ်ႉ” ဝႃႈၼႆ။
ႁႅင်းၵၢၼ် မိူင်းႁူမ်ႈတုမ် ဢၼ်ပွၵ်ႈၶဝ်ႈမႃးတၢင်းၾင်ႇတႃႈၶီႈလဵၵ်း 104 ၵေႃႉ ၽူႈၸၢႆး 45 ၵေႃႉ၊ ၼၢင်းယိင်း 59 ၵေႃႉ ယူႇတီႈၽူႈမီးပုၼ်ႈၽွၼ်း လုမ်းၽွင်းတၢင် မိူင်းႁူမ်ႈတုမ် တင်း ၽူႈမီးပုၼ်ႈၽွၼ်းတၢင်းမိူင်းထႆး ႁူမ်ႈၵၼ်သေ သူင်ႇမွပ်ႈပၼ် ၽူႈမီးပုၼ်ႈၽွၼ်း တၢင်းတႃႈၶီႈလဵၵ်းၼႆႉ ယူႇတီႈသိုဝ်ႇၶၢဝ်ႇ TNA ဢွၵ်ႇဝႆႉၼင်ႇၼႆ။
ၸၢႆးသၢမ် သိုပ်ႇလၢတ်ႈဝႃႈ “မိူဝ်ႈၵူႈပွၵ်ႈတႄႉ မီးၵူၼ်းၵႂႃႇလဵင်ႉလူၸႃႇၵပၼ်ႁႅင်းၵၢၼ် ဢၼ်ထုၵ်ႇၵုမ်းတူဝ်ဝႆႉၼၼ်ႉ။ ယၢမ်းလဵဝ်ၼႆႉ ပေႃးပဵၼ်ၶၢဝ်းယၢဝ်းမႃး ၵူၼ်းၵႂႃႇၸႃႇၵၶဝ်ၵေႃႈ တေဢမ်ႇပေႃးမီးယဝ်ႉ။ ထႅင်ႈလွင်ႈၼိုင်ႈၵေႃႈ ယွၼ်ႉတၢင်းပဵၼ်ၶူဝ်ႊဝိတ်ႉၼႆႉသေ တုမ်ႉတိူဝ်ႉၵၢၼ်ႁႃၵိၼ်လဵင်ႉတွင်ႉ ပၢႆးမၢၵ်ႈမီးၵၼ်၊ ၵူၼ်းပိုၼ်ႉတီႈတႃႈၶီႈလဵၵ်း ၵမ်ႈၼမ်ၼႆႉ ဢွၼ်ၵၼ်ပႅင်းၵိၼ်ပႅင်းၸၢႆႇၵၼ်ၶႃႈယဝ်ႉ” ဝႃႈၼႆ။
ႁႅင်းၵၢၼ် ဢၼ်သူင်ႇပွၵ်ႈၶဝ်ႈမႃး တၢင်းၾင်ႇတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်းၼႆႉ ၵမ်ႈၼမ်တေဢဝ်မႃးၵုမ်းတူဝ် Quarantine ဝႆႉတီႈ ႁူင်းယဵၼ်မူဝ်းၵူၵ်ႉဝိပသ်ႉသႃႇၼႃႇ တႃႈၶီႈလဵၵ်း ၼႆယဝ်ႉ။
ႁႅင်းၵၢၼ်မိူင်းႁူမ်ႈတုမ် ဢၼ်ပွၵ်ႈၶဝ်ႈမႃး တၢင်းၾင်ႇတႃႈၶီႈလဵၵ်း ၼႂ်းလိူၼ်ၵျုၼ်ႊၼႆႉ မိူဝ်ႈဝၼ်းတီႈ 9 ၼၼ်ႉ ပွၵ်ႈၶဝ်ႈမႃး 63 ၵေႃႉ၊ ဝၼ်းတီႈ 5 ၶဝ်ႈမႃး 70 ၵေႃႉလႄႈ မိူဝ်ႈဝၼ်းတီႈ 2 ၼၼ်ႉ ၶဝ်ႈမႃး 92 ၵေႃႉ။ ၵမ်ႈၼမ် ပဵၼ်ႁႅင်းၵၢၼ် ဢၼ်ပၼ်သဵၼ်ႈသၢႆမၢႆၸိုဝ်ႈဝႆႉတီႈ လုမ်းၽွင်းတၢင် မိူင်းႁူမ်ႈတုမ် ဢၼ်ပၵ်းလုမ်းဝႆႉတီႈ ၼႂ်းမိူင်းထႆးၼၼ်ႉ ဝႃႈၼႆ။
