ၵူၼ်းမိူင်းႁူမ်ႈတုမ် ၸိူဝ်းၶဝ်ႈႁဵတ်းၵၢၼ် ႁဵၼ်းလိၵ်ႈလၢႆး လုၵ်ႉတၢင်းမိူင်းထႆး ပွၵ်ႈၶိုၼ်းၾင်ႇမိူင်းတႆး တႃႈၶီႈလဵၵ်းထႅင်ႈ 60 ပၢႆ။

မိူဝ်ႈၼႆႉ ဝၼ်းတီႈ 9/6/2020 ၵူၼ်းမိူင်းႁူမ်ႈတုမ် ၸိူဝ်းၵႂႃႇႁဵတ်းၵၢၼ်တၢင်းမိူင်းထႆး ဢွၼ်ၵၼ်ပွၵ်ႈၶဝ်ႈမႃးထႅင်ႈ တၢင်းလႅၼ်လိၼ် တႆး – ထႆး (မႄႈသၢႆ – တႃႈၶီႈလဵၵ်း) တီႈၶူဝ်မိုတ်ႈၵိုဝ်း မၢႆ 2 ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း တင်းမူတ်း 63 ၵေႃႉ။ ၼႂ်းၼၼ်ႉ ပႃးလုၵ်ႈႁဵၼ်းလႄႈ ႁႅင်းၵၢၼ် ဢိၵ်ႇၵူၼ်းတူၵ်းၶွၵ်ႈ ၸိူဝ်းပူၼ်ႉဢွၵ်ႇၶွၵ်ႈမႃး ဝႃႈၼႆ။

ၸၢႆးၼုမ်ႇတုၺ်ႈ ႁူဝ်ပဝ်ႈပႃႇတီႇႁူဝ်သိူဝ် SNLD ၸႄႈဝဵင်းတႃႈၶီႈလဵၵ်း လႄႈ ၸုမ်းၸွႆႈထႅမ် ႁႅင်းၵၢၼ် လႅၼ်လိၼ်တႆး-ထႆး လၢတ်ႈတီႈၽူႈတွႆႇႁွၵ်ႈဝႃႈ “ၵူၼ်းမိူင်းႁူမ်ႈတုမ် ပွၵ်ႈၶဝ်ႈမႃးထႅင်ႈ တီႈၶူဝ်မိုတ်ႈၵိုဝ်းမၢႆ 2 ။ ၵမ်ႈၼမ်တႄႉ တေပဵၼ်ႁႅင်းၵၢၼ် ၸိူဝ်းလူင်းၸိုဝ်ႈသဵၼ်ႈမၢႆဝႆႉ ၸိူဝ်းၼၼ်ႉ” ဝႃႈၼႆ။

ၵူၼ်းမိူင်းႁူမ်ႈတုမ် ဢၼ်ပွၵ်ႈၶဝ်ႈမႃး ဝၼ်းတီႈ 9 ၼႆႉ ပဵၼ်ႁႅင်းၵၢၼ် 32 ၵေႃႉ၊ လုၵ်ႈႁဵၼ်းတီႈၸၼ်ႉၸွမ် မႄႈၾႃႉလူင် 19 ၵေႃႉလႄႈ ႁႅင်းၵၢၼ် ၸိူဝ်းၵႂႃႇတူၵ်းၶွၵ်ႈ 13 ၵေႃႉ တင်းမူတ်း 64 ၵေႃႉ ယူႇတီႈသိုဝ်ႇၶၢဝ်ႇတႃႈၶီႈလဵၵ်း (TNA) ဢွၵ်ႇဝႆႉ ၼင်ႇၼႆ။

တေႃႈလဵဝ် ၵူၼ်းမိူင်းႁူမ်ႈတုမ် 63 ၵေႃႉၼႆႉ လႆႈၵုမ်းတူဝ်ဝႆႉတီႈ ႁူမ်ႈယဵၼ်မူဝ်းၵူၵ်ႉဝိပသ်ႉသၼႃႇ တီႈတႃႈၶီႈလဵၵ်းဝႆႉယဝ်ႉ။

ပူၼ်ႉမႃးမိူဝ်ႈဝၼ်းတီႈ 5 လိူၼ်ၵျုၼ်ႊၼႆႉၵေႃႈ ႁႅင်းၵၢၼ်ၸိူဝ်းပူၼ်ႉဢွၵ်ႇၶွၵ်ႈတၢင်းမိူင်းထႆးၼၼ်ႉ သူင်ႇပွၵ်ႈမႃးထႅင်ႈ 70 ပၢႆ တေႃႈလဵဝ် လႆႈၵုမ်းတူဝ်ဝႆႉတီႈႁူမ်ႈယဵၼ်မူဝ်းၵူၵ်ႉဝိပသ်ႉသၼႃႇ တီႈတႃႈၶီႈလဵၵ်းဝႆႉ။ မိူဝ်ႈဝၼ်းတီႈ 2/6/2020 ၼၼ်ႉၵေႃႈ ပွၵ်ႈမႃး 92 ၵေႃႉ ၸိူဝ်းၼၼ်ႉတႄႉ လႆႈပွၵ်ႈႁိူၼ်းယေးၵၼ်မူတ်းယဝ်ႉ ဝႃႈၼႆ။