ၾင်ႇမိူင်းၶႄႇပွႆႇလၢႆႇၼမ်ႉႁူင်းၸၢၵ်ႈလႄႈ ၼမ်ႉမၢဝ်းၶုၼ်ႇဢူၼ် တုမ်ႉတိူဝ်ႉသတ်းၼမ်ႉတၢႆၼမ် ၊ ယၢမ်းလဵဝ်သမ်ႉပၢႆႁဵတ်းႁႂ်ႈၼမ်ႉႁႅင်ႈလႅင်ႉလိူဝ်ႁႅင်း တုမ်ႉတိူဝ်ႉၵူၼ်းၽုၵ်ႇသွမ်ႈ။ 

Photo by – ထုင်ႉႁူၺ်ႈလီႈ/ ၼမ်ႉမၢဝ်း ယၢမ်းလဵဝ်တႄႇဝၼ်းတီႈ 12/6/2020 ၼႆႉမႃး  ၼမ်ႉမၢဝ်း ၶုၼ်ႇလႅင် ပွတ်းမူႇၸေႊၼၼ်ႉ ၶိုၼ်းသႂ်မႃးယဝ်ႉသေတႃႉ ဢၼ်ႁႅင်ႈတႄႉ ႁႅင်ႈလိူဝ်ၵူႈပွၵ်ႈ ဝႃႈၼႆ။

ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီႈ လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းသွင်သၢမ်ဝၼ်းၼႆႉ ၾူၼ်တူၵ်းမႃးႁႅင်းၶႃႈ။ မိူဝ်ႈဝႃးၼႆႉ ႁဝ်းၶႃႈလူင်းပိုၼ်ႉတီႈသေ ၵႂႃႇလဵပ်းတူၺ်း ၵႄးၼမ်ႉမၢဝ်းၶုၼ်ႇလႅင်ၼၼ်ႉ  ၶိုၼ်းသႂ်မႃးယဝ်ႉၶႃႈ။  ပိူင်လူင်မၼ်းတီႈၼမ်ႉယၢင်းၼၼ်ႉၵူၺ်း သင်ဝႃႈ ႁူင်းၸၢၵ်ႈၾင်ႇမိူင်းၶႄႇ ဢမ်ႇဢဝ်တႅင်တဝ်ႈ/ ၾၢင် တူၵ်းသႂ်ႇတႄႉ တေဢမ်ႇလႅင်ၶႃႈ။ ႁဝ်းၶႃႈ ၵႂႃႇတူၺ်းတီႈႁူဝ်ၼမ်ႉယၢင်းၼၼ်ႉတႄႉ ဢမ်ႇလႅင်ၶႃႈ” ဝႃႈၼႆ။

သိုပ်ႇလၢတ်ႈဝႃႈ “ၼမ်ႉမၢဝ်းၼႆႉ ၵွၼ်ႇတေမႃးၸပ်းၵၼ်တင်းၼမ်ႉယၢင်းၼၼ်ႉ ဢမ်ႇလႅင်။ ၵူၺ်းၵႃႈ ၼမ်ႉႁူၺ်ႈၼမ်ႉလွႆ လႆလူင်းသႂ်ႇ မိူၼ်ၵူႈပီပီၼၼ်ႉလႄႈ မၢင်တီႈၵေႃႈတေလႅင်ယူႇ။ ၽိူဝ်ႇမႃးတူၺ်း တီႈၼမ်ႉယၢင်းတင်းၼမ်ႉမၢဝ်း ၸပ်းၵၼ်ၼၼ်ႉတႄႉ ၼမ်ႉယၢင်းတႄႉ တိုၵ်ႉလႅင်ယူႇ ၵူၺ်းၵႃႈ ဢမ်ႇပေႃးလႅင်မိူၼ်မိူဝ်ႈပူၼ်ႉမႃး သွင်သၢမ်ဝၼ်းၼၼ်ႉယဝ်ႉ” ဝႃႈၼႆ။

လွင်ႈၼမ်ႉယၢင်းၶုၼ်ႇလႅင်သေ လႆၶဝ်ႈၸူးၼႂ်းၼမ်ႉမၢဝ်း မိူဝ်ႈပူၼ်ႉမႃး သွင်သၢမ်ဝၼ်းၼႆႉ ယွၼ်ႉဝႃႈ ႁူင်းၸၢၵ်ႈတႅင်တဝ်ႈ/ ၾၢင် တၢင်းမိူင်းၶႄႇ ပွႆႇၼမ်ႉလၢႆႇတူၵ်းသႂ်ႇၼႂ်းၼမ်ႉယၢင်း၊ ႁဵတ်းႁႂ်ႈၼမ်ႉၶုၼ်ႇလႅင် ၵူၼ်းဝၢၼ်ႈ ၼမ်ႉသွၼ်းလၢတ်ႈၼႄၼင်ႇၼႆ။

ၸၢႆးႁိၼ်လဵၵ်း သိုပ်ႇလၢတ်ႈဝႃႈ “ ယၢမ်းလဵဝ်ၼႆႉ ယၢပ်ႇၽိုတ်ႇၸဝ်ႈသူၼ် ၸဝ်ႈၼႃးႁဝ်းၶႃႈဢေႃႈ ဢမ်ႇၸၢင်ႈတပ်ႉ ၼမ်ႉယၢင်းသႂၢင်းၶဝ်ႈၼႃး ႁူတ်းသူၼ်ၶဝ်ႈၵၢပ်ႇၵၼ်ၶႃႈယဝ်ႉ။ တေႃႈၼင်ႇဝူဝ်းၵႂၢႆး ၵႂႃႇၵိၼ်မႅၼ်ႈၼမ်ႉၼၼ်ႉၵူၺ်းၵေႃႈ တေၸၢင်ႈထိုင်တၢႆလူးၵွၼ်ႇ။ ၽွင်းၼမ်ႉမၢဝ်းၶုၼ်ႇလႅင်မႃးသွင်သၢမ်ဝၼ်းၼႆႉ ပႃၼႂ်းၼမ်ႉယၢင်း ၼမ်ႉမၢဝ်း ၸိူဝ်းၼႆႉၵေႃႈတၢႆၼမ်ဝႆႉၶႃႈဢေႃႈ။ ယၢမ်းလဵဝ် ၼမ်ႉမၢဝ်းၵေႃႈႁႅင်ႈ ယွၼ်ႉတၢင်းမိူင်းၶႄႇၶဝ် တဵင်ၾၢႆဝႆႉလႄႈ ၶဝ်ပွႆႇၼမ်ႉလူင်းမႃးဢေႇ” ဝႃႈၼႆ။

တႄႇဢဝ် ဝၼ်းတီႈ 9/6/2020 ယၢမ်းဝၢႆးဝၼ်း မွၵ်ႈ 3 မူင်းမႃး ၵႄႈၼမ်ႉမၢဝ်း (မႄႈၼမ်ႉလႅၼ်လိၼ်တႆး – ၶႄႇ) ပွတ်းဝဵင်းမူႇၸေႊ ၸိုင်ႈတႆးပွတ်းႁွင်ႇၼႆႉ တႄႇယဵၼ်းပဵၼ်သီလႅင်မႃး ယွၼ်ႉႁူင်းၸၢၵ်ႈတႅင် တၢင်းၾင်ႇမိူင်းၶႄႇ ဢိတ်ႇတႅင်ပႅတ်ႈတူၵ်းလူင်းသႂ်ႇၼႂ်းၵႄးၼမ်ႉယၢင်း ဢၼ်လႆၶဝ်ႈၼႂ်းၵႄးၼမ်ႉမၢဝ်း ၼႆယဝ်ႉ။

ၼမ်ႉမၢဝ်းၼႆႉ တႄႇႁူဝ်မႃးတၢင်းမိူင်းမႅၼ်း(ယုၼ်ၼၢၼ်/မိူင်းၶႄႇ) လႆလတ်း ၼႃႈလိၼ်ၽွင်းငမ်းတူဝ်ၵဝ်ႇပီႈၼွင်ႉတႆးတႂ်ႈၶူင်း၊ လႆလတ်း တတ်းပဵၼ် လႅၼ်လိၼ် မိူင်းႁူမ်ႈတုမ်မၢၼ်ႈ တင်း မိူင်းၶႄႇ ၸႄႈမိူင်းယုၼ်ၼၢၼ်၊ လတ်းဝၢႆႈၼႂ်းၸႄႈဝဵင်းမူႇၸေႊ ၼမ်ႉၶမ်း မၢၼ်ႈတူင်ႈ မၢၼ်ႈပဵင်း မိူင်းမိတ်ႈၸိူဝ်းၼႆႉသေ ၶဝ်ႈႁူမ်ႈၼမ်ႉၵဵဝ် တီႈၵဝ်ႇၸၢင်ႉပေႃႈ ၸႄႈဝဵင်းၸၢင်ႉပေႃႈ(သိၼ်ႇပူဝ်ႇ)။